Ci zmoža prezident zajmać pasadu staršyni UNS? Nie, nie zmoža. Ale Łukašenka — zmoža
Na naradzie ŭ Łukašenki, dzie abmiarkoŭvali prajekt źmianieńniaŭ u Kanstytucyju, padyskutavali ab mahčymaści sumiaščeńnia pasad prezidenta i staršyni UNS. I jašče bolš usio zabłytali.
Člen Kanstytucyjnaj kamisii Ryhor Vasilevič źviarnuŭ uvahu na pytańnie, źviazanaje z mahčymaściu dla prezidenta adnačasova ŭznačalvać Usiebiełaruski narodny schod, piša Biełta.
Alaksandr Łukašenka ŭ suviazi z hetym adznačyŭ, što prapanova pa sumiaščeńni pasad prezidenta i staršyni UNS była b pryncypovym źmianieńniem padrychtavanaha ŭžo prajekta.
«Zychodzim z taho, što prezident nie moža zajmać inšyja pasady», ‒ skazaŭ Łukašenka.
Ale dadaŭ:
«Pradastaŭlena heta prava pieršamu prezidentu, ciapierašniamu. Čamu? Zychodzili z taho, što ciapierašni prezident niasie adkaznaść za hetu Kanstytucyju i vybudoŭvańnie taho, jak budzie žyć naša kraina paśla taho, jak my ŭsio naša žyćcio i zakony padhonim pad tuju Kanstytucyju,
‒ patłumačyŭ jon vyklučeńnie dla siabie. ‒ Kab nie było razdvajeńnia: prezident adno, a staršynia UNS ‒ druhoje».
To-bok, dla Łukašenki patrebna, kab nie było «razdvajeńnia: prezident adno, a staršynia UNS ‒ druhoje», ale što tyčycca inšaha prezidenta, to tut łohika zusim inšaja.
«Niezrazumieła, jaki budzie zaŭtra prezident. Tamu patrebny strymki, procivahi,
‒ skazaŭ Łukašenka. ‒ I my znajšli ich u vyhladzie UNS u tym liku. Kali ŭsio heta «źlivajem» na prezidenta, to jakija buduć strymki i procivahi?»
Uskładniła situacyju namieśnik kiraŭnika Administracyi prezidenta Volha Čuprys. Jana prapanavała, u tym liku na budučaje, usio ž zamacavać u Kanstytucyi mahčymaść staršynstva prezidenta na UNS, kali jon budzie vybrany na hetu pasadu.
«Takija ž prapanovy niekatoryja hramadzianie ahučvali. Ja prynamsi tysiač piać prahartała sama. Nie skažu, što jany mieli masavy charaktar, ale asobnyja hramadzianie, zadumvajučysia nad mahčymymi prablemami ŭ častcy kiravańnia krainaj, prapanoŭvali takija mierkavańni», ‒ skazała jana.
Volha Čuprys ličyć, što na peŭnym etapie heta moža pasłužyć stvareńniu adzinaha centra siły, kali ŭ hetym budzie nieabchodnaść.
«Dyk my ž havaryli ab tym, što heta nam nie treba. U nas jość centr siły. Ale UNS — heta orhan, jaki pavinien umiašacca ŭ patrebny momant ‒ adreahavaŭ Łukašenka. ‒ Jość taki punkt hledžańnia. I ŭ čymści vy majecie racyju. Ale tut nam treba ŭžo rabić rašučy krok, kali my idziom na toje, kab zabiaśpiečyć strymki-procivahi. Tut užo nie treba pryviazvać da kiraŭnika dziaržavy hety orhan. Heta pryncypovaje pytańnie. Adno ź vielmi pryncypovych».
«Ja pakul nie pierakanany ŭ tym, što nam treba znoŭ usio, jak ciapier, zaviazać na prezidenta. Tady adna z važniejšych pryčyn źmianieńnia Kanstytucyi stračvajecca», ‒ dadaŭ Łukašenka.
Jašče adnoj dyskusijnaj temaj na naradzie stała pytańnie raboty pravavoj sistemy. «Zakładvajecca padychod, što ŭkazy prezidenta pavinny adpaviadać zakonam. Tady heta parłamienckaja respublika. Kanstrukcyja ŭžo zusim inšaja. Jość ukazy, jakija vydajucca na asnovie Kanstytucyi, tady jany na adnym uzroŭni z zakonam. Jość ukazy, jakija vydajucca na asnovie zakonaŭ, tady jany majuć padzakonny charaktar», ‒ skazaŭ Ryhor Vasilevič.
Alaksandr Łukašenka pahadziŭsia, što heta pytańnie treba dadatkova surjozna praanalizavać. «Niešta tut, što vyklikaje naściarožanaść, jość. Ryhor Alaksiejevič, vidać, maje racyju. Treba nam pahladzieć. Moža, nam niejak raźmiežavać tut śfieru narmatvorčaści i prymianieńnia narmatyŭnych aktaŭ, ‒ skazaŭ jon. ‒ Treba pahladzieć, kab my sapraŭdy voś hetym adnym krokam nie źniščyli prezidenckuju respubliku».
UNS zmoža admianić rašeńnie luboha dziaržaŭnaha orhana, akramia suda
Łukašenka pra pryniaćcie novaj Kanstytucyi: Kali ŭžo ščyra, to mnie hety praces absalutna nie patrebny
