U Maskvie abrabavali ŭdavu Hradskaha ŭ duchu 90-ch. Palicyja padazraje insceniroŭku
Na vychadnych pad Maskvoj abrabavali ŭdavu rasijskaha śpievaka Alaksandra Hradskaha. U jaje skrali 100 młn rubloŭ — bolš za miljon dalaraŭ. Palicyja nie vyklučaje, što heta była insceniroŭka.
Alaksandr Hradski i Maryna Katašenka. Fota: mk.ru
Pavodle słoŭ Maryny Katašenka, udavy Hradskaha, u rajonie vioski Hłaholeva troje mužčyn padstroili DTZ ź jaje «Leksusam», padsieli ŭ mašynu, pačali pahražać zbrojaj i prymusili jechać dadomu. Joj zahadali papiaredzić ludziej, što znachodzilisia ŭ domie, kab jany syšli. U domie ŭ toj čas była prysłuha.
Złačyncy zabrali sto miljonaŭ rasijskich rubloŭ najaŭnymi (3,4 młn biełaruskimi), skazali Katašenka padkinuć ich da stancyi «Apreleŭka». Tam jany pierasieli na bieły «Miersiedes» i źjechali. Raspačataja kryminalnaja sprava pa artykule «Razboj».
Ale na dumku palicejskich, usio mahło być padstrojena śpiecyjalna, kab nie dzialić hrošy pamiž naślednikami, jakich ciapier piaciora, uklučajučy Marynu Katašenka, paviedamlaje Mash.
Na heta pakazvaje šerah pryčyn: pa-pieršaje, vykradzienyja 100 młn najaŭnymi prosta lažali doma, hruzili ich doŭha, i ŭvieś hety čas žančyna nikomu nie paviedamlała pra toje, što adbyvajecca.
Da taho ž u palicyju jana źviarnułasia tolki praz čatyry hadziny paśla rabavańnia i paśla kansultacyi z advakatam.
Taksama ŭ pakazańniach Katašenki i jaje prysłuhi jość niestykoŭki.
***
Viadomy rasijski śpiavak i kampazitar Alaksandr Hradski pamior 28 listapada va ŭzroście 72 hadoŭ. Jon byŭ trojčy žanaty, ale apošnija 17 hadoŭ pražyŭ u hramadzianskim šlubie z Marynaj Katašenka — ukrainskaj madellu i aktrysaj, na 35 hadoŭ maładziejšaj za jaho. U ich naradziłasia dvoje dziaciej.
Ad treciaha šlubu z Volhaj Fartyšavaj u jaho jość dvoje darosłych dziaciej — syn Daniił, biznesmien i muzykant, i dačka Maryna, televiadučaja i art-mieniedžar.
Paśla śmierci Hradskaha zastałasia vialikaja spadčyna, u tym liku vielizarnaja kvatera na Ćviarskoj u centry Maskvy, raskošnaja kvatera na Maśfilmaŭskaj vulicy i zaharadny dom.
