Treci ziać Nazarbajeva i jaho plamieńnik syšli ŭ adstaŭku z-za pratestaŭ
Cimur Kulibajeŭ žanaty ź siaredniaj dačkoj eks-prezidenta Dzinaraj. Da hetaha ŭ adstaŭku syšli mužy jaho małodšaj i starejšaj dačok, jany kiravali bujnymi kampanijami. BYŭ zvolnieny taksama i plamieńnik Nazarbajeva. Jon byŭ pieršym namieśnikam kiraŭnika KNB.
Cimur Kulibajeŭ. Fota ria.ru
Ziać byłoha prezidenta Kazachstana Nursułtana Nazarbajeva Cimur Kulibajeŭ pakinuŭ pasadu kiraŭnika Nacyjanalnaj pałaty pradprymalnikaŭ «Atamiekien», paviedamlaje RBK.
«Ź siońniašniaha dnia ja vyrašyŭ skłaści ź siabie paŭnamoctvy abranaha staršyni prezidyuma Nacyjanalnaj pałaty pradprymalnikaŭ «Atamiekien»», — paviedamiŭ Kulibajeŭ.
U zvarocie jon taksama padvioŭ vyniki svajoj vaśmihadovaj pracy na pasadzie, u pryvatnaści, zajaviŭšy, što za hety čas byŭ naładžany «kanstruktyŭny dyjałoh biznesu i ŭłady», a taksama paśladoŭna sfarmavany «spryjalny biznes-klimat».
Kulibajeŭ žanaty ź siaredniaj dačkoj eks-kiraŭnika dziaržavy Dzinaraj. Raniej svaich pastoŭ pazbavilisia dva inšyja ziaci Nazarbajeva — staršynia praŭleńnia AT «KazTransOjł» Dzimaš Dasanaŭ, žanaty z małodšaj dačkoj eks-prezidenta, Alijaj, i staršynia praŭleńnia AT «Nacyjanalnaja kampanija QazaqGaz» Kajrat Šarypbajeŭ, jakoha nazyvajuć mužam starejšaj dački, Daryhi.
Syšoŭ ŭ adstaŭku taksama i plamieńnik Nazarbajeva Samat Abiš. Jon byŭ pieršym namieśnikam kiraŭnika Kamiteta nacyjanalnaj biaśpieki.
Sam pieršy prezident Kazachstana Nursułtan Nazarbajeŭ z kanca śniežnia nie źjaŭlajecca na publicy. A 11 studzienia prezident Kasym-Žamart Takajeŭ, kamientujučy situacyju paśla pratestaŭ u krainie, jakija prajšli ŭ krainie pad łozunham «Nazarbajeŭ, sychodzić», zajaviŭ, što dziakujučy jaho papiaredniku, u krainie «źjaviłasia hrupa vielmi prybytkovych kampanij i prasłojka bahatych ludziej navat pa mižnarodnych mierkach». Jon dadaŭ, što dla ich pryjšoŭ čas «addać naležnaje» narodu Kazachstana i dapamahać jamu. Takajeŭ prapanavaŭ stvaryć fond «Naroda Kazachstana», kudy kampanii, jakija ŭvajšli ŭ peŭny pieralik, ździajśniali b rehularnyja adličeńni.
