Krynicy: Čyžu vystavili abvinavačvańnie. Artykuł niečakany
Jak daviedałasia «Naša Niva» sa svaich krynic, kolišniamu aliharchu Juryju Čyžu vystaŭlenaje abvinavačvańnie pa č. 4 art. 209 Kryminalnaha kodeksa. Heta machlarstva, ździejśnienaje hrupaj asob abo ŭ asabliva bujnym pamiery. Karajecca pazbaŭleńniem voli na termin ad troch da dziesiaci hadoŭ sa štrafam.
Nahadajem, Juryja Čyža zatrymali viečaram 15 sakavika minułaha hoda paśla taho, jak jon viarnuŭsia z Maskvy. I voś užo amal 10 miesiacaŭ jon znachodzicca ŭ SIZA.
Razam z Čyžom zatrymali kiraŭnikoŭ niekalkich kampanij, jakija zastalisia ŭ biznesmiena paśla razhromu jaho impieryi.
Pretenzii ŭ siłavikoŭ tady ŭźnikli da top-mieniedžmientu «Kvarckrejdaprama» — pradpryjemstva ŭ Małaryckim rajonie, jakoje zabiaśpiečvała krejdaj biarozaŭski zavod pa vyrabie budmateryjałaŭ (taksama naležyć Čyžu).
Taksama nibyta byŭ zatrymany adzin z kiraŭnikoŭ «Danprada» — pradpryjemstva na Vałožynščynie, jakoje vyrablała śvininu.
Narešcie, pryjšli i ŭ «NaftaChimTrejdynh» — adzin z apošnich biznesaŭ Čyža, jaki paśpiachova praciahvaŭ pracavać. U sietki z 11 zapravak, try ź jakich znachodziacca ŭ Minsku, napiaredadni zabrali licenziju na prodaž paliva.
Juryj Čyž, fota Siarhieja Hudzilina
Čyža ŭžo aryštoŭvali ŭ 2016-m pa padazreńni va ŭchileńni ad spłaty padatkaŭ i zboraŭ u asabliva bujnym pamiery.
Tady sprava da suda nie dajšła, bo Čyž pryznaŭ vinu i kampiensavaŭ škodu. Ale, jak viadoma, na 2021 hod jon nibyta zastavaŭsia vinien i dziaržavie, i biznes-partnioram, jakija spahaniali z Čyža daŭhi praz sud.
«Čyž pa abaviazalnictvach nibyta nie płaciŭ, chacia asobnyja jašče «žyvyja» jaho biznesy prynosili hrošy», — adznačaje naša krynica.
Za čas znachodžańnia Čyža ŭ SIZA na jaho kolišniuju impieryju praciahvaŭsia cisk: 1 vieraśnia 2021-ha byŭ źmienieny daŭni ŭkaz Łukašenki ab prefierencyjach čyžoŭskamu «Trajpłu», jaki ciapier maje viarnuć u biudžet atrymanyja 13 hadoŭ tamu ilhoty.
Častka biznes-supolnaści tłumačyła «Našaj Nivie» novuju apału Čyža tym, što ŭłady ličać, nibyta jon u svaje najlepšyja kamiercyjnyja hady vyvieŭ ź Biełarusi i schavaŭ za miažoj značnuju sumu hrošaj — kala miljarda dalaraŭ. Inšaja častka sumniavajecca, što ŭ Čyža mohuć być takija hrošy, bo niahledziačy na toje, što ŭ svoj čas jon rasparadžaŭsia miljardami, značnaja častka hetaha była ŭ vyhladzie aktyvaŭ, jakimi ciapier kirujuć inšyja biznesoŭcy.
Litaralna na dniach stała viadoma pra toje, što Čyž dziŭnym čynam pravioŭ uzajemazalik starych daŭhoŭ sa svaim kolišnim mieniedžaram Mikałajem Čukisavym, jaki atrymaŭ prava spahnańnia doŭhu z Čyža ad Uładzimira Japryncava.
Čytajcie taksama: Kaniec historyi pra sudovych vykanaŭcaŭ i Čyža: były aliharch pryznaŭ doŭh, a raźlik praviali pa chitraj schiemie
