Łakdaŭn zaśpieŭ dziaŭčynu z kitajskaha Čženčžou na spatkańni ŭślapuju — daviałosia pravieści ź nieznajomcam niekalki dzion
Baćki 30-hadovaj dziaŭčyny pa proźviščy Van z kitajskaha horada Čženčžou vielmi pieražyvajuć, što hady iduć, a surjoznych adnosin u jaje niama. Tamu jany vybrali dla jaje dziesiać pretendentaŭ dla spatkańniaŭ uślapuju. Ale na piatym spatkańni, kali dziaŭčyna była na viačery ŭ chłopca doma, bo toj vyrašyŭ prademanstravać joj kulinarnyja zdolnaści, praz uspyšku karanavirusa rajon horada, dzie maładyja ludzi sustrelisia, byŭ terminova zabłakavany, piša CNN.
Dziaŭčynie daviałosia na niekalki dzion pravieści ŭ domie chłopca. Jana raźmiaściła videa svajho niečakanaha dośviedu sumiesnaha žyćcia ŭ sacyjalnych sietkach, pakazaŭšy, jak jaje novy znajomy hatuje dla jaje ježu, padmiataje padłohu. Videa chutka stała virusnym, a spatkańnie Van stała samaj papularnaj temaj na Weibo, kitajskaj płatformie, padobnaj da Twitter.
Kitaj rehularna izaluje cełyja rajony paśla vyjaŭleńnia siarod žycharoŭ vypadkaŭ zaražeńnia kavidam. Hetyja raptoŭnyja błakavańni naroŭni z masavym testavańniem i šyrokim karancinam źjaŭlajucca častkaj stratehii krainy pa baraćbie z karanavirusam, nakiravanaj na chutkaje spynieńnie łakalnych uspyšak.
Što dumaje Van pra svajho novaha znajomaha paśla vymušanaha praciahłaha spatkańnia? «Što ja zrazumieła za čas karancinu? Zrazumieła, što, jon strymany, jak draŭlany maniekien, a ŭ astatnim jon vydatny čałaviek. Hatuje, prybiraje ŭ domie i pracuje», — skazała jana partału the Paper.
Van skazała ŭ dopisie ŭ paniadziełak, što jana prybrała aryhinalnaje videa sa svajho akaŭnta paśla taho, jak jano stała virusnym. «Prosta ciapier ja ŭsio jašče znachodžusia ŭ domie hetaha čałavieka. Jon ścipły, sumlenny čałaviek i mała havoryć. Paśla taho, jak majo videa stała papularnym (na Weibo), niekatoryja siabry pačali telefanavać jamu — ja dumaju, heta paŭpłyvała na jaho žyćcio. Voś čamu ja vydaliła jaho», — patłumačyła jana.
«Dziakuj usim za ŭvahu… Ja spadziajusia, što pandemija chutka skončycca i što adzinokija dziaŭčaty chutka zmohuć znajści paru».
Pa stanie na čaćvier niezrazumieła, ci žyvie Van jašče ŭ domie svajho chłopca.
U Čženčžou, stalicy pravincyi Chenań, paviedamili pra bolš čym sto vypadkaŭ zachvorvańnia na Covid-19. U aŭtorak ułady zakryli ŭsie druharadnyja pradpryjemstvy, takija, jak sałony pryhažości, zabaranili abiedać u restaranach i spynili pracu aŭtobusaŭ i taksi, kab pravieryć 12,6 miljona žycharoŭ horada na najaŭnaść virusa.