Sud u Kijevie aryštavaŭ majomaść byłoha prezidenta Ukrainy Parašenki
Piačerski sud Kijeva pryniaŭ rašeńnie aryštavać majomaść Piatra Parašenki, jakoha padazrajuć u dziaržaŭnaj zdradzie, piša Bi-bi-si Ukraina.
Sam Parašenka ciapier znachodzicca za miažoj, adnak jon užo abviaściŭ, što 17 studzienia vierniecca va Ukrainu. Były prezident pravodziŭ pracoŭnyja sustrečy ŭ Turcyi.
«Vartajusia nie dla taho, kab abaraniacca ad Zialenskaha, a dla taho, kab abaraniać Ukrainu ad niekampietentnaha kiraŭnictva i źniešniaj ahresii. Ad sprob zialonych kleptakrataŭ pabudavać aŭtarytarny režym i prydušyć apazicyju, jak heta adbyłosia ŭ Biełarusi, Rasii i Kazachstanie. I jak heta Janukovič marna namahaŭsia zrabić va Ukrainie», — napisaŭ palityk u Fejsbuku.
20 śniežnia Dziaržbiuro rasśledavańniaŭ i Słužba biaśpieki Ukrainy abjavili, što Piatra Parašenku padazrajuć u dziaržaŭnaj zdradzie z-za pastavak na ŭkrainskija TEC vuhalu z «DNR» i «ŁNR». Na dumku śledčych, hetym były prezident spryjaŭ dziejnaści terarystyčnych arhanizacyj.
Svaju vinu Parašenka całkam admaŭlaje.
