Jak kantralavać, kudy dzieci łaziać u internecie. I jakimi chitraściami dzieci abychodziać kantrol
Niekatoryja baćki prydumlajuć svaje ŭłasnyja rašeńni, piša amierykanskaje vydańnie «Uoł-stryt džornał».
Łens Uokier i jaho dačka Piejtan. Jana abyšła niekalki sprob svajho baćki vykarystoŭvać elemienty kiravańnia Apple Time, kab zabłakavać jaje ad peŭnych prahram. Fota Džošua Uokiera.
Spačatku Łens Uokier ličyŭ TikTok biaskryŭdnaj zabavaju. Hladzić jaho dačka Piejtan tancavalnyja klipy ŭ Tyktoku, i chaj hladzić. Ale paśla tata daviedaŭsia, što jana atrymlivaje paviedamleńni ad nieviadomych darosłych mužčyn.
Jany pačali joj pisać, paśla taho jak jana zapościła duraślivaje videa, u jakim dla prykołu siadała ŭ durnyja pozy. Tady Łens zajšoŭ u nałady baćkoŭskaha kantrolu Apple, kab zabłakavać dačce dostup da prahramy. Što ž, Piejtan zajšła ŭ TikTok pad inšym Apple ID.
Tata pasprabavaŭ vydalić Apple ID, tady jana źmianiła parol, kab zabłakavać jaho dostup da akaŭnta. Takoje zmahańnie ź pieramiennym pośpiecham praciahvałasia niekalki miesiacaŭ, dačka paśpiachova trymała abaronu. Tata, 43-hadovy ryełtar sa štata Kałarada, sprabavaŭ błakavać asobnyja prahramy z dapamohaj Apple Time, ale ničoha, pa vialikim rachunku, nie zmoh dabicca.
«Kašmar!» — uzdychaje Uokier. Ën z žonkaj usio jašče šukajuć sposab zabłakavać dla Piejtan TikTok.
Apple i Alphabet Inc. Google, dva asnoŭnyja vytvorcy prahramnaha zabieśpiačeńnia dla smartfonaŭ, rekłamujuć baćkoŭski kantrol jak sposab dla baćkoŭ sačyć za vykarystańniem technałohij svaimi dziećmi. Ale daśviedčanyja ŭ technałohijach dzieci znachodziać sposaby abyści kantrol, pryznačany dla ich abarony.
Asobnyja płatformy — YouTube, Instagram i TikTok, prykładam — taksama majuć svaje ŭłasnyja nałady kiravańnia, adsačyć, što hladziać na ich dzieci, składana.
Isnujuć płatnyja siervisy baćkoŭskaha kantrolu. Naprykład, Bark dapamahaje kantralavać aktyŭnaść dziaciej na niekatorych płatformach, a Circle filtruje dostup da prahram i kantraluje limity času, ale navat płatnyja prahramy majuć svaje abmiežavańni.
«My imkniomsia dać našym karystalnikam efiektyŭnyja instrumienty dla kiravańnia ich pryładami iOS i zaŭsiody pracujem nad tym, kab zrabić ich jašče lepšymi», — kaža pradstaŭnik Apple.
Apple Screen Time, u pryvatnaści, prapanuje niekatoryja rašeńni, ale jaho nie prosta naładzić.
A mnohija filtry našy zdolnyja dzieci lohka abychodziać. Miž tym zanadta doŭhaje siadzieńnie ŭ internecie i sacsietkach i aznajamleńnie z sumnieŭnym kantentam mohuć pryvodzić da prablem ź psichičnym zdaroŭjem u dziaciej.
ŚMI pisali, što Facebook, maciarynskaja kampanija Instagram, uśviedamlała, što hetaja płatforma moža być razburalnym dla psichałahičnaj raŭnavahi značnaje častki maładych karystalnikaŭ, asabliva dziaŭčatak-padletkaŭ. Facebook, ciapier viadomy jak Meta Platforms Inc., asprečyŭ takija vysnovy.
U hetym miesiacy Instagram narešcie prezientavaŭ novyja funkcyi, jakija, jak zajaŭlajecca, zrobiać sajt bolš biaśpiečnym dla padletkaŭ.
Minułym letam TikTok i YouTube taksama abviaścili pra aktyvacyju novych opcyj baćkoŭskaha kantrolu i palepšanych instrumientaŭ biaśpieki. Da hetaha ich padšturchnuła novaje zakanadaŭstva Vialikabrytanii, jakoje ciapier patrabuje, kab internet-siervisy davali mahčymaść baćkam filtravać kantent dla svaich dziaciej.
U toj ža čas Apple nie abnaŭlała Screen Time z momantu jaho zapusku ŭ 2018 hodzie ŭ ramkach iOS12. A iPhone — heta ž bazavy telefon, u ZŠA ŭ 87% padletkaŭ jość ajfony.
A što prydumlajuć dzieci? Jany padhladajuć u baćkoŭ paroli. Chitrejšyja navat tajkom uklučajuć zapis ekrana pierad tym, jak paprasić baćkoŭ nabrać pin-kod.
Akramia taho, chitryja dzieci skidajuć nałady da zavodskich, tym samym admianiajučy ŭstanoŭlenyja baćkami abmiežavańni ekrannaha času.
Niekatoryja baćki prydumlajuć svaje ŭłasnyja rašeńni.
Stefani Palej, sacrabotnica sa štata Virdžynija, zarehistravała Apple ID svajoj dački na ŭłasnym noŭtbuku, kab mahčy sačyć za tekstavymi paviedamleńniami na vypadak, kali dačka budzie ich vydalać. Jak akazałasia, heta była razumnaja ideja. Zdaryłasia tak, što jaje dačka stała achviaraj kibierbulinhu ŭ škole. Bolšaść dziaciej paśla vydalili paviedamleńni, ale ŭ spadaryni Palej zachavałasia kopija, i baćki z nastaŭnikami vymušanyja byli raźbiracca.
Čed Bałak, 50-hadovy mieniedžar pa prodažach u IT-kampanii, vykarystoŭvaje try ŭzroŭni kiravańnia, kab trymać svajho syna pad kantrolem: Google Family Link, prahramnaje zabieśpiačeńnie dla baćkoŭskaha manitorynhu Bark i Circle. Ź pieramiennym pośpiecham.
14-hadovy Parkier Bałak piša svoj ułasny kampjutarny kod, kab prydumać abychodny šlach dla pryłady, padklučanaj da maršrutyzatara, što abmiažoŭvaje čas, jaki jon moža hulać u videahulni.
14-hadovy syn mistara Bałaka, Parkier, pryznaŭsia tatu, što spampoŭvaŭ prahramy-virusy, šukajučy sposaby abyści Circle, aparatnuju pryładu, jakaja padklučajecca da chatniaha maršrutyzatara. Dla čaho? Chacieŭ hulać u videahulni daŭžej, čym 2,5 hadziny, jakija jamu dazvolena hulać pa vychadnych.
Parkier znajšoŭ videa na YouTube, jakoje padkazała jamu, jak padmanuć adras kiravańnia dostupam da miedyja, abo MAC, na MAC-adras telefona jaho maci. Binha! U vyniku hulaŭ u videahulni da poźniaj nočy dvuch ščaślivyja miesiacy, pakul adnojčy baćka nie złaviŭ jaho na haračym a 2-j hadzinie nočy. «Tata byŭ niezadavoleny», — kaža Parkier.
Ciapier jon piša svoj ułasny kod, kab prydumać abychodny šlach. «Kali ja zmahu, ja pastaŭlu heta ŭ internecie ŭ adkryty dostup», — kaža Parkier.
