Litoŭskija śpiecsłužby: Minsk sprabuje ŭkaranić infarmataraŭ u asiarodździe apazicyjnych palitykaŭ
Litoŭskaja raźviedka fiksuje aktyvizavanyja sproby biełaruskaha režymu pa viarboŭcy i ŭkaranieńni infarmataraŭ, a taksama mahčymych pravakataraŭ u atačeńnie i arhanizacyi apazicyjnych palitykaŭ, jakija atrymali prytułak u Litvie, piša Delfi.
Departamient dziaržbiaśpieki krainy infarmavaŭ, što takimi dziejańniami sprabujuć źbirać infarmacyju ab Śviatłanie Cichanoŭskaj i jaje asiarodździ.
Pavodle źviestak litoŭskaj raźviedki, 17 kastryčnika Łukašenka sklikaŭ kiraŭnictva KDB i vysokapastaŭlenych aficeraŭ dla «pavyšeńnia efiektyŭnaści zamiežnaj raźviedki» — dla ŭzmacnieńnia jaje mocy, pavyšeńnia patencyjału ahienckaj raźviedki i «inšych mietadaŭ i formaŭ».
Pakolki ŭsio bolš i bolš biełarusaŭ źviartajucca pa humanitarnyja vizy ci palityčny prytułak, litoŭskaja raźviedka papiaredziła, što biełaruski KDB moža pasprabavać zavierbavać niekatorych uciekačoŭ abo ŭkaraniać svaich ahientaŭ u ich atačeńnie. Takim čynam imknucca sabrać infarmacyju pra lidara biełaruskaj apazicyi Śviatłanu Cichanoŭskuju i jaje atačeńnie, pra biełaruskija hramadskija arhanizacyi i ich siabraŭ, jakaja dapamahła b vyjavić ich patencyjnuju ŭraźlivaść, a taksama pasprabavać dyskredytavać, paŭpłyvać na ich dziejańni, rašeńni i vystupleńni.
Litoŭskaja raźviedka zaklikaje biełaruskich uciekačoŭ, jakija mohuć być zavierbavanyja minskim režymam, ustrymacca ad udziełu ŭ złačynnaj dziejnaści ŭ Litvie.
