«Pryjedzieš u Maskvu, i ciabie sa «Sputnikam» pasadziać na karancin». Vyśviatlajem, čamu Rasija nie pryznaje svaju ž vakcynu
Akazvajecca, biełarusy, jakija vakcynavalisia rasijskim «Cputnikam» u Biełarusi, u Rasii ličacca niepryščeplenymi. Pra heta «Našaj Nivie» raskazali čytačy. Čamu tak adbyvajecca?
Fota:senatinform.ru
«Praz tydzień na ciahniku jechać u Maskvu. Dva miesiacy tamu ukałoła sabie druhuju dozu «Sputnika», — havoryć Nadzieja Ivanaŭna z Oršy. — Dumała, usio narmalna, možna jechać, nijakich testaŭ rabić nie treba i na karancinie siadzieć taksama.
Dobra choć susiedka papiaredziła. Kazała: «Pryjedzieš u Maskvu, i ciabie z tvaim «Sputnikam» pasadziać na karancin. Spačatku nie pavieryła: bo nijakaj łohiki ŭ hetam niama. «Sputnik» — rasijskaja vakcyna. Jak jaje mohuć tam nie pryznać?
Na ŭsialaki vypadak patelefanavała ŭ daviedačnuju biełaruskaj čyhunki. Jakoje ž było ździŭleńnie, kali jany paćvierdzili słovy majoj susiedki».
Našaj čytačcy rastłumačyli, što adpraŭlajučysia ŭ Rasiju, biełarusy navat z pryščepkaj «Sputnikam», musiać zrabić PŁR-test, vyniki jakoha treba budzie ŭnieści ŭ dadatak «Padarožničaju biez COVID-19». Test pavinien być vykanany nie paźniej za try kalandarnyja dni da prybyćcia ŭ kančatkovy punkt pryznačeńnia.
Fota: ria.ru.
«Heta značyć, pryščepka «Sputnik» na terytoryi Rasii nie daje nijakaj pieravahi, u toj čas jak rasijanie, jakija pryjazdžajuć da nas z hetaj vakcynaj, nie abaviazanyja zdavać navat PŁR-test. Što za niespraviadlivaść?» — aburajecca žančyna.
My ŭvažliva pačytali praviły vyjezdu i ŭjezdu ŭ Biełaruś i ŭ Rasiju dla hramadzian Sajuznaj dziaržavy. I sapraŭdy: dla pajezdki ŭ Biełaruś rasijanam, kali jany nie pryščeplenyja ad karanavirusa, patrabujucca pašpart i admoŭny PŁR-test, u tym liku dzieciam, starejšym za šeść hadoŭ, zrobleny nie paźniej za 72 hadziny da ŭjezdu ŭ krainu. Kali čałaviek vakcynavany, jamu dastatkova pradjavić svoj siertyfikat ab vakcynacyi.
Voś tak vyhladaje staronka dadatka «Padarožničaju biez COVID-19», dzie prapanujuć uvieści dadzienyja pra vakcynu. Biełarusi ŭ śpisie niama
Što tyčycca biełarusaŭ, to im dla ŭjezdu ŭ Rasiju admoŭny PŁR-test patrebny niezaležna ad taho, pryščeplenyja jany ci nie.
Kali ž hramadzianie Rasii viartajucca ź Biełarusi dadomu, PŁR im nie spatrebicca, navat kali jany nie pryščeplenyja. Takija ž praviły i dla biełarusaŭ, kali jany pierasiakajuć miažu svajoj krainy, i niama nijakaj roźnicy, pryščepleny čałaviek ci nie. Anałahičnaja situacyja i z avijapieravozkami.
Z takoj prablemaj patencyjna mohuć sutyknucca bolš za 1,8 miljona biełarusaŭ
Nahadajem, pryščepačnuju kampaniju suprać karanavirusa ŭ Biełarusi pačali ŭ śniežni minułaha hoda, a ŭžo ŭ kancy lutaha 2021 hoda Biełaruś zapuściła sumiesnuju z Rasijaj vytvorčaść «Sputnika». Ciapier pieravažnaja bolšaść vakcyny, što vykarystoŭvajecca ŭ Biełarusi, prypadaje mienavita na «Sputnik».
Pavodle źviestak Ministerstva achovy zdaroŭja, jakija jano ahučvała u siaredzinie listapada, poŭny kurs vakcynacyi ŭ Biełarusi ŭžo prajšli 2,5 młn čałaviek. Heta značyć, my možam dumać, što «Sputnik» sabie ŭkałoli nie mienš za 1,8 młn biełarusaŭ, bo miedyki čaściakom kažuć, što ź liku tych, chto vakcynavaŭsia, 75% pryščapilisia mienavita «Sputnikam». To-bok ŭsie hetyja ludzi patrapili ŭ tuju ž pastku, što i naša čytačka Nadzieja Ivanaŭna z Oršy.
Što budzie ź imi, kali jany pryjeduć u Rasiju?
Pa rasijskich zakonach, akramia abaviazkovaha PŁR-testu i trochdzionnaha karancinu paśla ŭjezdu, vakcynavanyja «Sputnikam» biełarusy buduć abmiežavanyja ŭ svabodzie pieramiaščeńnia pa Rasii, a zdavać PŁR im pryjdziecca kožnyja try dni. Kali chtości pryjedzie nadoŭha, pryjdziecca paŭtorna vakcynavacca chacia b tym ža «Sputnikam», ale tolki na terytoryi Rasii.
Ale i paśla paŭtornaj vakcynacyi vy možacie trapić ŭ zajmalny kvest. Akazvajecca, kab atrymać pryščepačny QR-kod u Rasii, vam pryjdziecca zarehistravacca na adzinym partale dziaržaŭnych pasłuh. Ale zarehistravacca tam možna tolki z najaŭnaściu strachavoha numara indyvidualnaha asabovaha rachunka (ŚNIAR).
Biełaruski pašpart ab vakcynacyi, jaki ŭ Rasii da ŭvahi nie biaruć. Fota: pres-słužba ministerstva achovy zdaroŭja.
ŚNIAR — heta takaja zialonaja kartka z numaram, jakaja paćviardžaje rehistracyju ŭ sistemie indyvidualnaha ŭliku ŭ RF. Na hetym rachunku adlustroŭvajecca ŭsia infarmacyja ab pracoŭnaj dziejnaści čałavieka, jaki pražyvaje ŭ RF, strachavyja ŭnioski, infarmacyja ab pracoŭnym stažy i h.d.
Ale ž my žychary Sajuznaj dziaržavy, i dla nas heta nie abaviazkova. Nam, kab atrymać pryščepačny QR-kod u Rasii, rasijskija čynoŭniki rajać pradstaŭlać daviedku ad miedycynskaj arhanizacyi, ale na spravie ŭ niekatorych punktach vakcynacyi vydavać daviedku bieź ŚNIAR biełarusam usio roŭna admaŭlajucca.
Što z hetaj nahody kažuć zakony?
Akazvajecca, pytańnie ab lehalizacyi «zamiežnaha» «Sputnika» ŭ Rasii paŭstała jašče minułaj zimoj. Bo ŭ takoj ža situacyi apynulisia i inšyja krainy. Da prykładu, Sierbija (tam «Sputnik» sabie ŭkałoli prykładna 25% usich pryščeplenych žycharoŭ), Kazachstan (hetaj vakcynaj tam skarystalisia amal 6,5 młn čałaviek) i Małdova (tam «Sputnikam» taksama pryščaplajecca bolšaść).
U vyniku amal za hod isnavańnia prablemy, vyrašyć jaje čynoŭnikam tak i nie ŭdałosia. Pa fakcie vakcynavanych «Sputnikam» zamiežnikaŭ, jakija nie viedajuć ab takoj prablemie, u aeraporcie abo na vakzałach prosta nie puskajuć u samaloty i ciahniki. Ludzi hublajuć hrošy i čas.
Uličvajučy, što pa danych MUS Rasii, kožny miesiac u RF naviedvajecca prykładna miljon zamiežnikaŭ, patencyjna hetaja prablema mahła zakranuć vielizarnuju kolkaść ludziej. I heta pry tym, što dziasiatki inšych krain «Sputnik» luboha raźlivu pryznajuć. Tak, naprykład, ź im možna lohka trapić u tuju ž Vienhryju, Hrecyju, Hruziju, Turcyju, Kazachstan, Małdovu i Biełaruś.
A što kažuć biełaruskija čynoŭniki?
U najaŭnaści vidavočnaja niespraviadlivaść: rasijanam da nas možna sa «Sputnikam», a nam da ich nielha. U žniŭni ambasadar Biełarusi ŭ RF Uładzimir Siamaška pravioŭ pasiadžeńnie hrupy vysokaha ŭzroŭniu Sajuznaha Saŭmina, na jakim abmiarkoŭvałasia pytańnie ŭzajemnaha pryznańnia dakumientaŭ ab vakcynacyi. Ale pra vyniki hetych abmierkavańniaŭ čamuści nidzie nie paviedamlajecca.
My źviarnulisia za kamientaryjem u pradstaŭnictva Pastajannaha Kamiteta Sajuznaj dziaržavy ŭ Minsku, adnak za sutki nijakaha adkazu tak i nie atrymali. Jak tolki heta adbudziecca (kali adbudziecca), my abaviazkova hety adkaz apublikujem.
Pakul ža my možam skarystacca tolki kamientaryjem z hetaj nahody ad namieśnika kiraŭnika pradstaŭnictva Pastajannaha kamiteta Sajuznaj dziaržavy ŭ Minsku Uładzimira Žałniaka, jaki jon daŭ miedyjachołdynhu «SB». U im jon paviedamiŭ, što ŭzajemnaje pryznańnie siertyfikataŭ ab vakcynacyi aktyŭna abmiarkoŭvajecca na ŭzroŭni abiedźviuch krain.
Kali ŭsio atrymajecca, biełarusy ŭ elektronnym dadatku (mabyć, havorka idzie pra dadatak «Padarožničaju biez COVID-19», — «NN») zmohuć uvodzić QR-kod sa svajho siertyfikata, što sprościć pieramiaščeńnie, dazvolić adnavić turystyčnyja patoki, vizity da rodnych i dziełavyja pajezdki.
Razychodžańni, jakija jość pry pieramiaščeńni žycharoŭ abiedźviuch krain, čynoŭnik patłumačyŭ niuansami praviłaŭ unutranaha ŭjezdu ŭ Biełaruś i Rasijskuju Fiederacyju.
Ale pakul ničoha tak i nie vyrašyłasia.
