Jeŭrakamisija prapanuje palehčyć dla Polščy, Litvy i Łatvii pracedury pa mihrantach
Jeŭrapiejskaja kamisija prapanavała pryniać časovyja pravavyja i praktyčnyja miery dla Polščy, Litvy i Łatvii, jakija sutyknulisia ź mihracyjnym kryzisam na svaich miežach, kab dapamahčy dziaržavam spravicca ź situacyjaj.
«ES vyrazna daŭ zrazumieć, što sproby padarvać naš Sajuz tolki ŭmacujuć našu salidarnaść. Siońnia my dajom žyvuju prajavu hetaj salidarnaści: u vyhladzie naboru časovych i vyklučnych mier, jakija daduć Łatvii, Litvie i Polščy srodki, nieabchodnyja dla taho, kab reahavać na hetyja nadzvyčajnyja abstaviny, kantralavanym i chutkim čynam, i dziejničać va ŭmovach pravavoj vyznačanaści», — zajaviŭ vice-prezident Jeŭrakamisii Marharycis Schinas, pradstaŭlajučy prapanovu.
Miarkujecca, što prapanavanyja miery buduć prymianiacca na praciahu 6 miesiacaŭ, kali jany nie buduć padoŭžanyja abo admienienyja, i buduć tyčycca hramadzian krain — nie členaŭ ES, jakija niezakonna prybyli tudy z terytoryi Biełarusi, abo znachodziacca pablizu miažy, abo prybyli da punktaŭ pierasiačeńnia na miažy.
Try dziaržavy-členy mohuć prymianiać sproščanyja i bolš chutkija nacyjanalnyja pracedury dla viartańnia ludziej, čyje chadajnictvy ab mižnarodnaj abaronie byli adchilenyja.
Akramia taho, Jeŭrakamisija prapanuje krainam praktyčnuju padtrymku.
Kab prapanova Jeŭrakamisii nabyła moc, Rada ES pavinna ŭchvalić rašeńnie paśla kansultacyi ź Jeŭrapiejskim parłamientam.
