«Pa nas niama rašeńnia ŭžo 10 miesiacaŭ». Biełaruskaja siamja raskazała, jak zachrasła ŭ niamieckim łahiery dla biežancaŭ
Na fonie mihracyjnaha kryzisu na biełaruska-polskaj miažy roznyja siły ŭ Hiermanii dyskutavali, ci varta prymać uciekačoŭ ź Iraka, jakija traplajuć u ES nielehalna. U irakcaŭ byli svaje prychilniki. Ale razam z hetym u Hiermanii ŭžo chutka hod jak dabivajucca prytułku niekalki biełaruskich siemjaŭ. Kolki ich dakładna, my nie viedajem. My pahavaryli z Alenaj (imia źmienienaje z metaŭ biaśpieki — zaŭv. «NN»), siamja jakoj pryjechała ŭ Hiermaniju ź Minskaj vobłaści. Darosłyja i dvoje dziaciej užo dziesiać miesiacaŭ žyvuć u łahiery, žančyna raskazała, jak heta vyhladaje.
Łahier dla biežancaŭ niedaloka ad Niurnbiernha. Fota: YouTube Refugee Camp.
Alena i jaje muž byli siabrami stačkama adnaho ź biełaruskich pradpryjemstvaŭ. Muž žančyny adpracavaŭ na hetym pradpryjemstvie bolš za 10 hadoŭ.
«Mianie nie zatrymlivali, ale sprabavali zavierbavać u KDB»
«Ustupiła ŭ stačku — mianie zvolnili. Muž taksama ŭstupiŭ — i jaho zvolnili, — raskazvaje žančyna. — Mianie nie zatrymlivali, ale sprabavali zavierbavać u KDB. Sprava była takaja: ja chvareła i try tydni ŭvohule nie vychodziła z domu, a jak vyjšła — paviała dačku ŭ sad.
Viartajusia — kala padjezda sustrakajuć dvoje ŭ štackim, prapanujuć prajechać na razmovu: «Kali nie pahodziciesia, pierastaniem być vietlivymi».
Dazvolili, praŭda, padniacca i papiaredzić muža, potym pajechali ŭ rajonny KDB. Mnie tam pryhadvali strajk, prapanoŭvali ŭładkavać mianie nazad na rabotu z umovaj dalejšaha supracoŭnictva, prapanoŭvali padumać pra dziaciej — jak ich budzie ŭtrymlivać biespracoŭnaja? I hetak dalej».
Fota: YouTube Refugee Camp.
Situacyja z vyklikam u KDB Alenu mocna spałochała. Da taho ž na sutki adpraŭlalisia inšyja ludzi sa stačkama, danosiłasia infarmacyja, što ŭ hetych śpisach i jany. Tamu para vyrašyła nie ryzykavać.
«My atrymali humanitarnyja vizy ŭ pasolstvie Hiermanii — u polskim była vialikaja čarha, — uspaminaje žančyna. — U vyniku vyjechali — tady jašče lotali samaloty. Minsk — Bierlin. U aeraporcie sustreŭ vałancior i advioz tudy, dzie padajucca na biežanstva.
Tam było intervju, padčas jakoha raskazvaješ svaju historyju, pakazvaješ dokazy. Usio zapisvajecca i potym na padstavie hetaha vyrašajecca, ci adpaviadaješ ty kryteryjam. Nu, my raskazali, addali ŭsie dakumienty i pačali čakać. Nas raźmierkavali ŭ Bavaryju.
Fota: YouTube Refugee Camp.
«Vydajuć nievialikuju sumu na drobnyja vydatki, nam na čatyroch čałaviek davali 600 jeŭra»
«Pieršyja paŭhoda žyli ŭ łahiery dla biežancaŭ u Niurnbierhu. Heta taki vialiki internat kalidornaha typu, na vychadzie achova. Na siamju dajuć pakoj, ale kuchnia, tualet i duš ahulnyja.
Pakul žyvieš u łahiery — vydajuć nievialikuju sumu na drobnyja vydatki, nam na čatyroch čałaviek davali 600 jeŭra. Adzin raz na sutki kormiać haračym i vydajuć taki «suchpaj»: chleb, jorhurt, syr, kaŭbasu, małako, — raskazvaje biełaruska. — Žyli my tam paŭhoda, bo takija praviły.
Fota: YouTube Refugee Camp.
Pryjezdžyja nie ź jeŭrapiejskich krain nie viedajuć časam, jak karystacca tualetam, pralnaj mašynaj, nie viedajuć movy i hetak dalej. Tam jany prachodziać sacyjalizacyju.
Praz paŭhoda nas pierasialili ŭ inšy łahier, užo biez achovy. Ale zajmacca pakul što ničym nie možam, dakumientaŭ niama. Siadzim, vučym movu, čakajem. Dapamahaje biełaruskaja dyjaspara. Aproč nas, tut jašče jak minimum niekalki biełaruskich siemjaŭ pa toj ža vizie».
«Takoje ŭražańnie, što z nami prosta nie viedajuć, što rabić»
«Ale jość i biełaruskija cyhanie, jakija sa słovaŭ vialikija revalucyjaniery. Ja dumaju, heta ŭsio machlarstva. U ich tut proćma svajakoŭ niejkich, niejkija spravy. Kažuć, što jany «palityčnyja».
My ŭ padviešanym stanie. Takoje ŭražańnie, što z nami prosta nie viedajuć, što rabić. Z adnaho boku, kvotaŭ dla nas, imavierna, niama, ź inšaha — niamieckija palityki kažuć, što ŭ Biełarusi ŭsio kiepska, katujuć i zabivajuć ludziej. Čynoŭniki ŭ takich umovach nie mohuć nam admović i vysłać nazad.
Prosta siadzim i čakajem. Viartacca ŭ Biełaruś pakul što nie varyjant. U łahiery ciažka, heta praŭda — biez movy pradziracca praź niamieckuju biurakratyju, ale i žyć u krainie, dzie nie pracuje zakon, — jašče ciažej».
