Što cikavaha adbyłosia ŭ biełaruskaj muzycy za vosień?
Niahledziačy na ciomny čas dla biełaruskaj kultury, jana nie staić na miescy. Padrychtavali dla vas padborku muzyčnych navin, a taksama novych albomaŭ, klipaŭ i piesień, jakija vyjšli ŭvosień.
Jakija naviny ŭ industryi?
▪️ 2 vieraśnia byŭ zatrymany dydžej Alaksandr Bahdanaŭ, bolš viadomy jak Papa Bo.
Jaho zatrymali ŭ kulturnym centry «Korpus», razam sa scenohrafam Maksimam Krukom i arhanizatarkaj imprez Lizavietaj Nieŭmiaržyckaj.
Spačatku ŭsim traim prysudzili sutki, ale pa ich skančeńni Bahdanaŭ i Kruk na volu nie vyjšli. Pravaabaroncy pryznali ich palitviaźniami.
▪️ U kastryčniku pa BT pačaŭsia pakaz biełaruskaha «X-faktara».
U našym artykule, jaki my zrabili razam z ekśpiertam Siarhiejem Budkinym, sfarmulavali hałoŭnyja pytańni da realizacyi Biełteleradyjokampanii.
▪️ Biełaruś znoŭ prapuścić «Jeŭrabačańnie».
U śpisie krain-udzielnic papularnaha konkursu Biełarusi niama. Nahadajem, sioleta BT chacieła nakiravać na konkurs hurt «Hałasy ZMiesta», ale Jeŭrapiejski viaščalny sajuz zabaniŭ abiedźvie viersii konkursnaj pieśni. A paśla i BT vyklučyli ź Jeŭrapiejskaha viaščalnaha sajuza.
▪️ 29 kastryčnika 3 hady chimii atrymaŭ dudar Źmicier Šymanski, udzielnik hurta «Javaryna».
Jaho razam z udzielnikami hurta Irdorath zatrymali 3 žniŭnia. Paśla suda Šymanski źjechaŭ ź Biełarusi.
«Ja telepartavaŭsia ź Biełarusi». Asudžany na «chimiju» muzyka i palitviazień pra Vaładarku, prysud i pabieh z krainy
▪️ 17 listapada pamior Siarhiej Filimonaŭ, aŭtar i viadučy viadomaj pieradačy «Vidźmo-nievidźmo».
Prahrama źjaviłasia na BT u 1992 hodzie. U joj raskazvałasia pra suśvietny šou-biznes, navinki kino i muzyki. Filimonavu było 62 hady.
10 albomaŭ i sinhłaŭ vosieni
Chočam adznačyć 10 relizaŭ, jakija pabačyli śviet u papiarednija try miesiacy. Siarod ich jak doŭhačakanyja navinki topaŭ, tak i cikavyja debiutniki.
Pomidor/OFF — Raźvitańnie z radzimaj
Da hadaviny Nočy rasstralanych paetaŭ Alaksandr Pamidoraŭ vydaŭ sinhł ź dźviuch piesień. Vydańnie stała mahčymym pry padtrymcy Biełaruskaj rady kultury.
Bez.not — Nie rvi niervy
Jak charaktaryzujuć albom muzyki, «Nie rvi niervy» — heta viniehret emocyj, jakija śpieli dzieści na zavuholli padśviadomaści vielmi doŭha i, narešcie, dačakalisia svajho naradžeńnia.
NAVIBAND — Odnaždy
U pačatku vosieni adzin z najbolš viadomych biełaruskich pop-hurtoŭ paradavaŭ svaich prychilnikaŭ novym pazityŭnym sinhłam.
Pietla Pristrastija — Nie tot čiełoviek
«Hałoŭnaj temaj alboma źjaŭlajecca tema raźvitańnia i viečnaj razłuki z saboj raniejšym, sa starym śvietam, sa zdaroŭjem, u niekatorym sensie, a taksama z usimi, dla kaho padarožža skončyłasia. My zapisali heta ŭ dastatkova składanych umovach i fizičnaha, i psichałahičnaha charaktaru, ciapier rady padzialicca svajoj maleńkaj pieramohaj. Pačastujciesia pładami biełaruskaj vosieni, jakija zabradzili», — piša hrupa pra navinku.
Polyn — Ledokoł
Polyn — heta prykład ajčynnaha supierhurta, u jaki ŭvajšli viadomyja muzyki: Alaksiej Vančuk dy Siarhiej Kraŭčanka z Port Mone, a taksama Illa Čarapko-Samachvałaŭ z užo zhadanaj vyšej «Pietli Pristrastija».
«Ledokoł» — heta chałodnaja historyja ab ałkaholnaj zaležnaści i ŭnutranaj samaizalacyi, jakaja dakładna traplaje ŭ adčuvańnie siońniašniaha dnia.
Biaz Nazvy — Majaki
Hurt Alesia Lutyča apublikavaŭ sinhł «Majaki» pra nadziei i śviatło, pra sapraŭdnuju blizkaść. Muzykanty ŭpeŭnienyja, što z padtrymkaj siabroŭ atrymajecca ŭsio — navat niemahčymaje.
Ań Chitryk band — Tień
Apošni raz byłaja aktrysa Kupałaŭskaha i salistka hurtoŭ «Dietidietiej» dy «S°unduk» Hanna Chitryk davała kancert bolš za čatyry hady tamu, jašče da emihracyi ŭ Izrail. Vosieńniu 2021 hoda prychilniki jaje tvorčaści narešcie dačakalisia novych piesień: novy albom nie taki pazityŭny, jak raniejšyja, ale poŭny ciepłyni, nadziei i viery ŭ čałavieka.
Dlina Volny — Dazed
Biełaruski anhłamoŭny hurt sabraŭ u svaim albomie pačućci i ŭspaminy za apošnija hady, a taksama ŭvasobiŭ u im ciomnyja fantazii.
Bakiej — BELMO
Paśla ekśpierymientaŭ z pop-muzykaj Bakiej viartajecca ŭ rep i vypuściŭ mini-albom.
CHORNABROVA — Słova
Akciorka i śpiavačka Palina Dabravolskaja zapisała debiutny albom, chacia pryznałasia ŭ sacyjalnych sietkach, što «zaŭsiody sabie kazała, što nie zdolnaja pisać muzyku i što ja nikoli nie zmahu napisać navat adnu pieśniu». Chornabrova kaža, što robić muzyku ad serca i zaŭsiody dla hledača/słuchača.
A jakija klipy vyjšli?
Vosień była dosyć uradžajnaj na muzyčnyja videa. U naš top my vybrali piać.
Zakharik — Tajna
Śpiavačka Saša Zacharyk i pradziusar Jarasłaŭ Tamiła zasnavali prajekt ZAKHARIK, u jakoha vyjšaŭ pieršy sinhł «Tajna». Pieśniu ŭchvalili Ivan Dorn i Alaksandr Hudkoŭ.
Yann Zhanchak — Živoj
Jan Žančak napisaŭ pieśniu paśla taho, jak jahonyja lubimyja muzyki pamierli, nie spraviŭšysia sa škodnymi zvyčkami. U vyniku atrymaŭsia trek pra viečnuju hulniu z samim saboj.
RSP — Sieryj kvadrat
U apošni dzień leta RSP vydali albom «Aščuščenija», a vosieńniu źniali videa na adnu ź piesień.
TryNici — Carkoŭka
Premjera klipa na kupalskuju pieśniu ad prajekta TryNici (u im udzielničajuć Marharyta Laŭčuk, Siaržuk Doŭhušaŭ i Ivan Kirčuk) musiła adbycca jašče ŭletku 2020 hoda, ale sumnyja padziei ŭ Biełarusi pieraškodzili relizu.
BAK — Ziamla
«Ziamla» — vynik kałabu mastaka Doctor Oy, Michaiła Dajlidava i Mikity Arłova, jakich šyrokaja publika viedaje pa prajektach Michael Dailida i «SOJUZ». Heta tvor pra pieražyvańnie, źniavoleńnie, adzinotu i, biezumoŭna, nadzieju na lepšaje.