U Vilni były deputat trapiŭsia ŭ kramie na niezvyčajnym pravaparušeńni. Chacieŭ atrymać dva jeŭra
Zdareńnie adbyłosia ŭ paniadziełak. Były deputat, ciapier pamočnik deputata Piatrasa Hražulisa, 57-hadovy Nahlis Puciejkis trapiŭsia na niezvyčajnym pravaparušeńni, piša Delfi.lt.
Delfi
Achoŭnik kramy Norfa zatrymaŭ mužčynu, jaki ŭnios u aŭtamat pa pryjomie tary 20 butelek z naleplenymi znakami depazitu, a potym abnaličyŭ atrymany ček na dva jeŭra.
Mužčyna nie kampiensavaŭ naniesienuju kramie škodu na dva jeŭra. Achoŭnik vyklikaŭ palicyju. Tyja i vyśvietlili, što heta były deputat.
Puciejkis skazaŭ palicejskim, što ŭ siabie ŭ haražy jon vyjaviŭ butelki i vyrašyŭ zdać ich. Jon zapeŭnivaje, što ničoha na butelki nie kleiŭ. Navat paśla razmovy z palicejskimi Puciejkis nie kampiensavaŭ naniesienuju kramie škodu. Byŭ składzieny pratakoł ab administracyjnym pravaparušeńni, pryznačanaja data pasiadžeńnia pa hetaj spravie.
U Litvie ŭžo niekalki hod pry pakupcy vady, ci inšych napojaŭ da cany aŭtamatyčna dadajecca 10 jeŭracentaŭ za taru. Kali na etykietcy na butelcy jość značok (butelka sa strełkaj), heta aznačaje, što taru možna zdać u taramacie i atrymać ček, jaki potym abnaličvajecca ŭ kasie. Sistema ŭviedienaja dla palapšeńnia stanu ekałohii.
