U Breście pazbavili hramadzianstva 27-hadovaha žychara. Jon naradziŭsia i vyras u Biełarusi
Cikavy kiejs razhledzieli ŭ Viarchoŭnym sudzie. 27-hadovy chłopiec sprabavaŭ abskardzić rašeńnie bresckaj milicyi i suda: jaho pazbavili hramadzianstva, choć jon naradziŭsia i vyras u Biełarusi.
Jak paviedamlaje Viarchoŭny sud, małady čałaviek naradziŭsia 26 červienia 1994 hoda ŭ Breście. Stała žyŭ i vučyŭsia na terytoryi Biełarusi. U 2009 hodzie jamu vydali pašpart hramadzianina Respubliki Biełaruś. Da apošniaha času nijakich pytańniaŭ da jaho nie ŭźnikała.
I voś spačatku ŭ 2020, a paśla i ŭ 2021 hodzie supracoŭniki bresckaj milicyi pačali pravierku, u vyniku jakoj pryjšli da vysnovy, što małady čałaviek nie maje prava być hramadzianinam našaj krainy. Pa jakoj pryčynie raspačali pravierku, nie paviedamlajecca, ale ŭ milicyi jość prava rabić heta pa svajoj inicyjatyvie.
Baćka chłopca — hramadzianin Ukrainy, maci ŭ 1989 hodzie atrymała va Ukrainie pašpart SSSR, ź jakim i naradžała syna, a ŭ 1997 hodzie joj vydali biełaruski pašpart. Paźniej, u 2020-m, milicyja i pa jaje spravie pryznała, što hramadzianstva prysvoili niezakonna.
Voś i vychodzić: raz nichto z baćkoŭ novanarodžanaha nie mieŭ biełaruskaha hramadzianstva, to i jon nie maje prava na hramadzianstva pa naradžeńni.
Toje, što prajšło bolš za 20 hadoŭ, nie stała arhumientam na karyść maładoha čałavieka. Chłopiec danosiŭ, što atrymaŭ u Biełarusi adukacyju, pracavaŭ tut, stajaŭ na vajskovym uliku.
Usio heta, pastanaviŭ sud, pravavoha značeńnia nie maje. Tak što ŭradženiec Bresta zastaŭsia bieź biełaruskaha hramadzianstva.
U pastanovie suda adznačajecca, što zajaŭnik maje prava z momantu naradžeńnia na hramadzianstva Ukrainy, jakoje majuć baćki.
