U Interpała novy kiraŭnik z AAE, u piaci krainach jaho abvinavačvajuć u katavańniach
Novym prezidentam Mižnarodnaj arhanizacyi kryminalnaj palicyi (Interpała) abrany hienieralny inśpiektar Ministerstva ŭnutranych spraŭ Abjadnanych Arabskich Emirataŭ, hienierał-major Achmied Nasier Al-Raisi. Ab jaho abrańni Interpał paviedamiŭ u čaćvier, 25 listapada, u Tvitary, pieradaje dw.com.
Al-Raisi abrany prezidentam arhanizacyi na čatyrochhadovy termin, źmianiŭšy na hetaj pasadzie Kim Čon Jana z Paŭdniovaj Karei.
Krytyki Achmieda Nasiera Al-Raisi nazyvajuć jaho prychilnikam ahresiŭnych siłavych viedamstvaŭ, jakija padviarhajuć praciŭnikaŭ uładaŭ advolnym aryštam i katavańniam. Prynamsi ŭ piaci krainach suprać jaho padadzienyja sudovyja iski ŭ suviazi z abvinavačvańniami ŭ katavańniach.
Pavodle źviestak brytanskaha vydańnia The Daily Maíl, Al-Raisi datyčny da katavańniaŭ brytanskaha navukoŭca Mećju Chiedžesa, zatrymanaha ŭ AAE ŭ 2018 hodzie pavodle łžyvaha abvinavačvańnia ŭ špijanažy. U źniavoleńni jaho ŭtrymlivali ŭ kajdanach, pazbaŭlali snu i prymušali prymać roznyja miedycynskija preparaty. Paźniej navukoviec padaŭ suprać čatyroch čynoŭnikaŭ AAE, uklučajučy Al-Raisi, sudovy isk ab kampiensacyi škody ŭ pamiery 350 tysiač funtaŭ sterlinhaŭ.
Štab-kvatera Interpała znachodzicca ŭ francuzskim Lijonie, arhanizacyja isnuje na ŭnioski 195 dziaržaŭ-členaŭ. Ułady AAE nie tolki płaciać unioski (u 2019 hodzie — kala 243 tysiač jeŭra, što skłała 0,425% biudžetu interpała), ale i z 2015 hoda aktyŭna achviarujuć vialikija sumy hrošaj na karyść arhanizacyi, što vyklikaje padazreńni ŭ sprobach kupić u joj upłyŭ, nahadvaje ahienctva dpa.
