Pry pamiłavańni asudžanych mohuć uličyć asabistaje paručalnictva. Jaho ŭžo prapanoŭvajuć nabyć za 700 dalaraŭ
Sioleta ŭ Biełarusi źjaviŭsia instytut paručalnictva pry pamiłavańni. Sens novaŭviadzieńnia: čałaviek, jaki, pa mierkavańni ŭładaŭ, zasłuhoŭvaje davieru, moža piśmova paručycca za asudžanaha, što toj, kali apyniecca na svabodzie, nie budzie pieraškadžać rasśledavańniu ci razhladu spravy ŭ sudzie, što bolš nie ździejśnić złačynstva. Jak stała viadoma «Našaj Nivie», svajakam viaźniaŭ stali prapanoŭvać paručalnictva za hrošy — «vynachodlivyja» biełarusy prosiać za heta 700 dalaraŭ. Adznačym, što heta niezakonnaja «pasłuha».
Pracedura paručalnictva isnavała i raniej, ale raspaŭsiudžvałasia na mieru ŭtrymańnia da suda. Kab nie znachodzicca ŭ SIZA ci pad chatnim aryštam, abvinavačany i jahonyja paručalniki prasili śledstva abrać takuju alternatyŭnuju mieru: čałaviek budzie na svabodzie, ale kali pakidaje krainu i nie źjavicca pa patrabavańni siłavikoŭ, jaho paručalnikaŭ aštrafujuć. Takija vypadki byli, u tym liku i pa palityčnych spravach.
Uviesnu zapracavała dadatkovaja forma paručalnictva — pry pamiłavańni asudžanych. Sens u tym, što asoba, jakaja zasłuhoŭvaje davieru, daje piśmovaje abaviazalnictva, što asudžany, jaki znachodzicca na svabodzie paśla pamiłavańnia, nie ździejśnić novaje złačynstva na praciahu času, roŭnaha nieadbytamu pakarańniu.
Pry hetym pamiłavańnie moža być nie tolki ŭ vyhladzie vyzvaleńnia, ale i ŭ vyhladzie zamieny nieadbytaha termina na bolš miakkaje pakarańnie, pieravodu na ŭmoŭny termin, vyzvaleńnia ad dadatkovaha pakarańnia. Paručalnikaŭ pavinna być nie mienš za dva. Svaje zajavy jany padajuć u milicyju, jakaja praviaraje, ci sapraŭdnyja źviestki ŭkazanyja ŭ dakumiencie.
Chto moža być paručalnikam? Baćki i svajaki asudžanaha, jaho kalehi ci susiedzi, — ludzi, jakija pavinny dobra viedać čałavieka. Paručalnik pavinien zasłuhoŭvać davier. Heta značyć, nie pryciahvacca da adkaznaści, karystacca pavahaj u hramadstvie, mieć prafiesijnyja i asabistyja dasiahnieńni.
Taksama z prośbaj ab pamiłavańni mohuć źviartacca pracoŭnyja kalektyvy, hramadskija arhanizacyi, palityčnyja partyi. Kali ž asudžany parušyć umovy, z paručalnikaŭ mohuć spahnać štraf — ad 30 da 500 bazavych vieličyń (na siońnia heta ad 870 da 14,5 tysiačy rubloŭ).
Jak stała viadoma «Našaj Nivie» ad niekalkich svajakoŭ asudžanych, užo źjavilisia «vynachodlivyja» biełarusy, jakija vyrašyli zarabić na hetym — prapanoŭvajuć stać paručalnikam, cana — 700 dalaraŭ.
Adrazu skažam, što nijakich harantyj takija «paručalniki» dać nie mohuć. I heta niezakonna dla ŭsich bakoŭ «damovy». Usie zajavy paručalnikaŭ pavinna praviarać milicyja. I kali supracoŭniki prapuściać dakumienty ad nieznajomaha asudžanamu čałavieka, pytańni ŭźniknuć jašče i da siłavikoŭ, jakija heta dapuścili.
Pa pracedury, svajo chadajnictva ab pamiłavańni pavinien padać i sam asudžany. Taksama na jaho składaje charaktarystyku vypraŭlenčaja ŭstanova, dzie jon adbyvaje pakarańnie. Uvieś pakiet dakumientaŭ razhladaje admysłovaja kamisija pa pamiłavańni, jakaja zasiadaje minimum raz na kvartał, u jaje skład uvachodziać pradstaŭniki siłavych struktur, Viarchoŭnaha suda, Miniusta, akademičnaj supolnaści, advakatury. Mierkavańnie kamisii nie źjaŭlajecca abaviazkovym da vykanańnia, kančatkovaje rašeńnie prymaje Łukašenka.
