U Raterdamie akcyja suprać kavid-abmiežavańniaŭ pierarasła ŭ biesparadki
Pratestoŭcy zładzili niekalki pažaraŭ u Raterdamie, zakidvali palicejskich kamianiami i abstrelvali ich fiejervierkami. Praz pavieličeńnie kolkaści vypadkaŭ zaražeńnia karanavirusam u Niderłandach dziejničaje častkovy łakdaŭn, paviedamlaje dw.com.
Načnyja biesparadki ŭ Raterdamie
Siem čałaviek paciarpieli padčas masavych biesparadkaŭ padčas akcyi praciŭnikaŭ kavidnych abmiežavańniaŭ u Raterdamie ŭ noč na subotu, 20 listapada. Pratestoŭcy zładzili niekalki pažaraŭ u partovym horadzie, zakidvali palicejskich kamianiami i abstrelvali ich fiejervierkami. Palicyja vymušanaja była adkryć papieradžalny ahoń i prymianić vadamioty suprać demanstrantaŭ.
Mer Raterdama Achmied Abutaleb paviedamiŭ ab zatrymańni jak minimum 20 čałaviek. Padziei, jakija adbylisia ŭ horadzie, jon apisaŭ jak «orhiju hvałtu». Dla padtrymańnia hramadskaha paradku haradskija ŭłady zabaranili praviadzieńnie schodaŭ u rajonie, dzie zdarylisia biesparadki.
Praz pavieličeńnie kolkaści vypadkaŭ zaražeńnia karanavirusam urad Niderłandaŭ uvioŭ častkovy łakdaŭn. Bary, restarany i supiermarkiety pavinny začynicca nie paźniej za 20-ju hadzinu, inšyja kramy — užo a 18-j hadzinie. Bolšaść rabotnikaŭ pavinny pierajści na addalenuju pracu, žycharam dazvalajecca źbiracca doma hrupami nie bolš za čatyry čałavieki. Iznoŭ uviedziena praviła abaviazkovaj sacyjalnaj dystancyi 1,5 mietra pamiž ludźmi.
Pavodle źviestak internet-partała Worldometers, u Niderłandach z pačatku pandemii vyjaŭlena 2 399 849 vypadkaŭ zaražeńnia virusam SARS-CoV-2. Ad vyklikanaha im lohačnaha zachvorvańnia COVID-19 i jaho nastupstvaŭ pamierli 18 900 žycharoŭ krainy. Pa danych urada Niderłandaŭ, u krainie z nasielnictvam kala 17,2 młn čałaviek całkam vakcynavany ad karanavirusa bolš za 12,6 młn čałaviek (73,42%). Jak minimum adnu dozu vakcyny atrymali amal 13,2 młn čałaviek (76,63%).
Akcyi praciŭnikaŭ abmiežavalnych mier, jak čakajecca, projduć u vychodnyja dni ŭ Amsterdamie i Bredzie.
