«Biełavija» zastaniecca ŭ vyjhryšy? Što budzie z avijakampanijaj, kali ŭziatyja ŭ lizinh 17 samalotaŭ daviadziecca viarnuć
U piaty pakiet sankcyi płanujuć uklučyć «Biełaviju». Padrabiaznaściaŭ pakul niama, ale Jeŭrasajuz pahražaje razarvać kantrakty na lizinh samalotaŭ. Ciapier u avijakampanii 17 samalotaŭ, uziatych u lizinh u Irłandyi. Heta bolš za pałovu parka. Što budzie, kali ich zabiaruć? Praznoz ekśpiertaŭ moža vas ździvić.
Fota avijakampanii «Biełavija»
Čartary i rejsy ŭ Picier vykonvaje tolki «Biełavija»
Usiaho ŭ parku «Biełavii» 29 samalotaŭ. Ź ich 14 — Boeing (madeli 737-8, 737-800, 737-500, 737-300), 15 — Embraer (195-E2, 195, 175).
Pad lizinham u aviacyi zvyčajna majecca na ŭvazie arenda pavietranaha sudna. Kampanija spłačvaje košt samalota tolki za čas jaho ekspłuatacyi, što bolš vyhadna dla jaje. Ale pry hetym samalot nie naležyć pieravozčyku, jon zastajecca va ŭłasnaści vytvorcy.
Ź minskaha aeraporta lotajuć roznyja avijakampanii.
Ale jość kirunki, pa jakich rejsy vykonvaje tolki «Biełavija». Ciapier heta, naprykład, Jerevan, Batumi, Picier, Sočy, Taškient, Baku. Plus za joj zamacavanyja čartary (u tuju ž Turcyju ci Jehipiet).
«Hałoŭnym paciarpiełym budzie lizinhavaja kampanija, jakoj daviadziecca šukać, kudy b prystroić samaloty»
Acanić mahčymyja ryzyki dla «Biełavii» składana — my nie viedajem detalova, jakoj była palotnaja prahrama pad hetyja samaloty.
«Ale davajcie pahladzim šyrej na pytańnie, — prapanuje vykanaŭčy dyrektar ahienctva «AvijaPort» Aleh Pancialejeŭ. — Ciapier usio ž taki rynak na baku avijakampanii.
U tym płanie, što ŭ vyniku pandemii i ŭviedzienych abmiežavańniaŭ na mižnarodžnyja paloty popyt na pavietranyja sudny adnosna dapandemijnaha pieryjadu dramatyčna skaraciŭsia.
Tamu składaniej prystroić samaloty ŭ dobryja ruki, pieravozčyku, jaki spraŭna budzie płacić lizinhavyja płaciažy, čym znajści na rynku svabodnyja samaloty pa dobraj canie.
Kali hladzieć na situacyju nie ŭ karotkaterminovaj pierśpiektyvie, što zaŭtra zabrali samaloty, a jany ŭžo byli ŭ raskładzie, a ŭ pierśpiektyvie paŭhoda-hoda, to, vidavočna, hałoŭnym paciarpiełym budzie lizinhavaja kampanija, jakoj daviadziecca šukać, kudy b prystroić samaloty, prytym što jany rynku nie asabliva patrebnyja.
Dla avijakampanii, biezumoŭna, buduć karotkaterminovyja prablemy — jakim čynam pierafarmatavać raskład i pastupić ź piersanałam, bo kahości patrebna budzie adpravić u adpačynak, u vymušany prastoj.
Ale jość usie šancy ŭžo da letniaha siezonu, kali avijakampanii zarablajuć asnoŭnyja hrošy, całkam nivielavać nastupstvy ad sankcyj, źviazanych z kanfiskacyjaj pavietranych sudnaŭ».
Z ekśpiertam zhodny i Alaksandr Łaniecki, dyrektar kansałtynhavaj kampanii Friendly Avia Support. Jon ličyć, što ŭ «Biełavii» i tak lišak samalotaŭ, bo paśla kiejsa z Pratasievičam kampanija straciła pałovu rynku.
«Dumaju, avijakampanija z zadavalnieńniem viarnuła b samaloty, ale nie maje dla hetaha farmalnaj nahody. Viartańnie biez nahody — vializnyja štrafy z-za parušeńnia lizinhavaj damovy. Uviadzieńnie sancyj jakraz stanie takoj nahodaj — to-bok mahčymaść dla «Biełavii» bieź finansavych strat viarnuć samaloty ŭłaśniku.
I Irłandyja heta taksama razumieje. I nie choča zabirać sabie samaloty, bo rynkaŭ dla ich ciapier niama. Zabrać samalot — heta 3-4 miljony dalaraŭ niedaatrymanych dachodaŭ na hod u siarednim.
To-bok 17 samalotaŭ — 60 miljonaŭ dalaraŭ strat na hod. I heta biez mahčymych sudovych strat z-za iskaŭ da «Biełavii»», — padličvaje ekśpiert.
Jość i jašče adna pryčyna, čamu samaloty naŭrad ci zabiaruć, — jeŭrapiejskija sankcyi zvyčajna nie majuć zvarotnaj siły. Ban na novyja damovy mahčymy, ale staryja skasoŭvać, chutčej za ŭsio, nie buduć.
«Kali b samaloty brali ŭ litoŭskich kampanij — sankcyi imhnienna ŭviali b. Ale tut intaresy irłandcaŭ i amierykancaŭ, jakija stajać za imi. I heta my jašče nie kazali pra intaresy kancerna Boeing, jaki pradaŭ i jašče nie pastaviŭ usie samaloty «Biełavii»».
«Dachody, napeŭna, upaduć na tracinu»
Letaś praz pandemiju «Biełavija» syšła ŭ minus. Kolkaść pasažyraŭ upała na 58% u paraŭnańni z 2019 hodam. A čystyja straty kampanii — 92 miljony rubloŭ. Zarobki źmienšilisia ŭ siarednim na 19%.
U hetym hodzie karanavirus taksama ŭpłyvaje na pasažyrapatok. Na jeŭrapiejskich rejsach nie było šmat narodu. Mahčyma, zakryćcio nieba nad Jeŭropaj dla biełaruskich samalotaŭ mahło navat palepšyć finansavyja pakazčyki. Atrymlivajecca, što stratnyja rejsy praz adsutnaść pasažyrapatoku syšli. Plus asnoŭnym dachodam kampanii byli čartarnyja rejsy. Adkrylisia taksama novyja napramki pa Rasii.
Ale prybytkaŭ čakać nie varta, miarkuje ekśpiert.
«Dumaju, Biełavija budzie stratnaj pa vynikach hetaha hoda, — prahnazuje Alaksandr Łaniecki. —
Dachody, napeŭna, upaduć na tracinu ŭ paraŭnańni ź minułym užo pandemijnym hodam. Kali paraŭnoŭvać tolki druhija paŭhodździ — padzieńnie dachodaŭ moža być bolš istotnym.
A prybytkaŭ tam nie čakajecca. Takaja ž situacyja va ŭsioj avijacyjnaj halinie ŭ śviecie. I dakładna va ŭsioj Jeŭropie — usie avijakampanii stratnyja».
