«Mis Biełaruś» paviedamiła, što nie pajedzie na suśvietny konkurs pryhažości praz karonu
Pieramožca nacyjanalnaha konkursu pryhažości «Mis Biełaruś — 2021» Darja Hančarevič paviedamiła, što jana i jaje baćki zachvareli na karonu. Z-za chvaroby, piša dziaŭčyna, jana nie patrapić na konkurs «Mis śvietu — 2021».
U Instagram dziaŭčyna zaklikała nasić maski, pa mahčymaści vykonvać sacyjalnuju dystancyju i vakcynavacca.
Nahadajem, 10 vieraśnia ŭ Pałacy sportu prajšoŭ finał konkursu «Mis Biełaruś 2021». Pieramožcaj stała 18-hadovaja Darja Hančarevič. Jana pracuje madellu i vykładčycaj defile ŭ Nacyjanalnaj škole pryhažości.
Raniej pieramožca konkursu «Mis Biełaruś» — 2021 Darja Hančarevič raspaviała ŭ intervju dziaržaŭnaj «Minskaj praŭdzie», što ŭ razhar biełaruskich pratestaŭ u vieraśni 2020 hoda jaje vykarystali «ŭ radykalnych namierach».
Nibyta jana «vypadkova» ŭziała ŭdzieł u «apazicyjnaj fotasiesii», dzie dziaŭčyny fatahrafavalisia pieraviazanymi čyrvonymi stužkami «pa schiemie BČB»: «Mnie tady ledź spoŭniłasia 17 hadoŭ. Maja znajomaja, dyzajnier, ź jakoj ja supracoŭničała ŭžo na praciahu niekalkich hadoŭ, zaprasiła mianie ŭ čarhovy prajekt. Ja joj całkam daviarała, ale, mabyć, darma. Heta nie było prajavaj majoj hramadzianskaj pazicyi, a było vykarystańniem mianie ŭ svaich radykalnych namierach».
I zajaviła, što škaduje ab tym, što ŭdzielničała ŭ «palityčnaj fotasiesii: «Mnie treba było zahadzia pacikavicca tematykaj i być aściarožniejšaj».