Amal sutki trymali na kaleniach i tvaram da ściany. Novyja padrabiaznaści zatrymańnia rasijskich bajevikoŭ pad Minskam
Žurnalisty Bellingcat i The Insider vypuścili rasśledavańnie pra śpiecapieracyju pa zatrymańni rasijskich najomnikaŭ, što vajavali na terytoryi Ukrainy. Havorka idzie ab pryvatnaj vajskovaj kampanii Vahniera, udzielnikaŭ jakoj letam 2020-ha zatrymali biełaruskija siłaviki. Pra toje, jak ukrainskija śpiecsłužby vyjšli na bajevikoŭ i zamanili ich u Biełaruś, možna pračytać pa spasyłcy. My ž źviarnuli ŭvahu na toje, jak zatrymlivali vahnieraŭcaŭ pad Minskam, jak im sprabavali pryšyć udzieł u masavych biesparadkach i suviaź sa Statkievičam i Cichanoŭskim.
Zatrymanaha vahnieraŭca hruziać u aŭtazak, lipień 2020.
Usie pamiatajuć hučnyja zajavy Łukašenki i siłavikoŭ pra bajevikoŭ, jakija «chavajucca pa biełaruskich lasach» napiaredadni vybaraŭ. Što było nasamreč?
Adzin z najomnikaŭ, jakoha apytali žurnalisty Bellingcat, raskazaŭ, što 28 lipienia kala 7 hadzin ranicy jon razam z paplečnikami zaŭvažyŭ niezvyčajny mikraaŭtobus, pryparkavany kala sanatoryja «Biełarusačka» ŭ Ždanovičach, dzie jany spynilisia.
Bajeviki imhnienna vyznačyli, što heta aŭto dla sačeńnia KDB. Ale nie nadali hetamu vialikaj uvahi, vyrašyli, što biełaruskija śpiecsłužby prosta pryhladajuć za imi, kab upeŭnicca, što jany pakinuć krainu, nie stvorać tut nijakich prablem.
«Uličvajučy paŭsiudnuju prysutnaść KDB u Biełarusi, jany dakładna pavinny byli viedać, što nam zamovili vylet praz dva dni, 30 lipienia», — dadaŭ surazmoŭca Bellingcat. Tym bolš Biełaruś nie pieršy raz była tranzitnaj krainaj dla rasijskich bajevikoŭ.
Adnak uviečary zdaryŭsia niepryjemny siurpryz dla 32 z 33 najomnikaŭ (adzin ź ich spyniŭsia na načoŭku ŭ svajakoŭ, jaho zatrymali krychu paźniej). Kamanda śpiecnaza «Alfa» KDB uziała šturmam sanatoryj.
U numary praz bałkony kinuli śvietašumavyja hranaty. Čalcy šturmavoj hrupy ŭ bałakłavach padniali zbroju na rasijan i nadzieli na ich kajdanki.
Zatym prymusili ich lehčy na łožki tvaram uniz, zakryli hałovy paduškami, kab tyja nie mahli bačyć, što adbyvajecca. Adnak adzin z bajevikoŭ zmoh padhledzieć, u intervju RT jon raskazaŭ, što siłaviki treśli bahaž, adzieńnie — šukali zbroju, adnak tak i nie znajšli.
Paśla doŭhaha čakańnia na miescy źjaviŭsia AMAP, jaki advioz bajevikoŭ u adździaleńnie milicyi. Tam ich 22 hadziny pratrymali ŭ kajdankach, na kaleniach i tvaram da ściany.
Nočču 29 lipienia im začytali dakumienty ab aryšcie i pradjavili abvinavačvańnie. Dalej pieravieźli ŭ centralnaje adździaleńnie milicyi, dzie ich dapytvali supracoŭniki KDB.
Jany pytali, ci viedajuć zatrymanyja Mikałaja Statkieviča i Siarhieja Cichanoŭskaha. Najomniki adkazvali, što nie viedajuć hetych ludziej.
Adzin z bajevikoŭ, jaki pahadziŭsia na razmovu z Bellingcat, skazaŭ, što siłaviki byli ŭpeŭnienymi, što majuć spravu z udzielnikami budučaha pieravarotu. Navat pytali, ci mahčyma, što najomniki prosta nie viedajuć, što ich źbiralisia vykarystoŭvać dla źviaržeńnia ŭłady ŭ Biełarusi.
Toje ž paźniej raspaviadali RT i jašče niekalki ŭdzielnikaŭ hrupy.
Niahledziačy na toje, što bajeviki admaŭlali suviaź ź biełaruskimi apazicyjanierami, ich abvinavacili ŭ padrychtoŭcy dziaržaŭnaha pieravarotu i masavych biesparadkach sumiesna z aryštavanymi na toj momant Cichanoŭskim i Statkievičam.
Voś vytrymka z pastanovy ab pryciahnieńni ŭ jakaści abvinavačanaha: «(proźviščy zatrymanych) dziejničali naŭmysna, hrupaj asobaŭ pa papiaredniaj zmovie, znachodzilisia na terytoryi Respubliki Biełaruś, u tym liku ŭ Minsku i Minskaj vobłaści, raźmierkavali roli i ŭzhadnili dziejańni, u pieryjad nie paźniej za maj 2020 hoda pa ciapierašni čas pravodzili mierapryjemstvy pa padrychtoŭcy da ŭdziełu ŭ masavych biesparadkach, jakija supravadžalisia hvałtam nad asobaj, pahromami, padpałam, źniščeńniem majomaści ci ŭzbrojenym supracivam pradstaŭnikam ułady». Hienieralny prakuror Alaksandr Kaniuk (ciapier jon ambasadar u Armienii) asabista padpisaŭ sankcyju, kab adpravić rasijan u SIZA.
Što było dalej? Łukašenka publična abvinavaciŭ rasijskich najomnikaŭ u tym, što jany pryjechali ŭ Biełaruś, kab pieraškodzić vybaram, terminova sklikaŭ Radu biaśpieki. Ale chutka stała zrazumieła, što nijakaha Cichanoŭskaha i Statkieviča bajeviki nie viedajuć i nie majuć dačynieńnia da ŭnutranaj palityki Biełarusi.
Što ž stałasia z kryminalnaj spravaj? Ciapier Cichanoŭskaha i Statkieviča akurat sudziać u zakrytym režymie na terytoryi SIZA. A ŭłady robiać vyhlad, što historyi z rasijskimi bajevikami, jakija nibyta chacieli sarvać vybary i zładzić u Biełarusi pieravarot, i nie było.
33 vahnieraŭcy paśpiachova viarnulisia ŭ Rasiju. Ich na aŭtobusie advieźli pad Smalensk pry asabistym supravadžeńni starejšaha syna Łukašenki, Viktara.
«Adzin ź ich — ich kiraŭnik — pytajecca: «Viktar Alaksandravič, a možna my ŭ Biełaruś pryjedziem da vas? Nie, nie pa hetym pytańni — tak…» Viktar adkazaŭ, što možna, prezident nie kazaŭ, što ŭjezd zabaronieny. Niekatoryja zapłakali. Da hetaha času my zastalisia ź imi siabrami», — zajaviŭ Łukašenka.
Nijakaha kryminalnaha pieraśledu z boku Biełarusi ŭ adnosinach da ich nie było, jakimi b hučnymi ni byli zajavy pra bajevikoŭ, jakija nibyta chavajucca pa lasach i nie dajuć pravieści vybary.
