Chutka śviet pabačyć praciah lehiendarnaha sieryjała «Seks u vialikim horadzie». Raskazvajem, čym jon cikavy
U śniežni amierykanski stryminhavy servis HBO Max pakaža praciah «Seksu ŭ vialikim horadzie». Čaho čakać ad premjery?
Fota flickr.com.
«Seks u vialikim horadzie» vychodziŭ na amierykanskija ekrany z 1998 pa 2004 hod. Heta była historyja pra čatyroch žycharak Ńju-Jorka, siabrovak va ŭzroście «trochi za 30», što svabodna hutaryli pamiž saboj pra seks, kachańnie i karjeru. Mahčyma, upieršyniu na vialikim ekranie raspaviali, što žančyny mohuć być samastojnymi ŭ hetych pytańniach i atrymlivać ad svajoj svabody zadavalnieńnie.
Sieryjał vyklikaŭ furor i atrymaŭ miljony fanataŭ va ŭsim śviecie. Važnym i pryjemnym dadatkam da pośpiechu stali stanoŭčyja vodhuki krytykaŭ i prestyžnyja ŭznaharody. «Seks u vialikim horadzie» atrymaŭ 6 prestyžnych premij «Emi», 8 nie mienš pavažanych «Załatych hłobusaŭ» i 36 inšych uznaharod.
Paśla zakančeńnia sieryjała vyjšła dva poŭnamietražnyja filmy, što raskryvali dalejšuju historyju siabrovak, a taksama moładzievy sieryjał «Dziońniki Kery» pra junactva hałoŭnaj hieraini Kery Bredšou. I kali pra sieryjał vodhuki byli nieadnaznačnyja, to poŭnamietražki akazalisia paśpiachovymi ŭ prakacie.
Viartańnie Kery i kampanii
Pra toje, što hieraini «Seksa ŭ vialikim horadzie» viartajucca na ekrany, stała viadoma ŭ studzieni hetaha hoda. «I prosta tak…» zdymali viasnoj 2021-ha ŭ Ńju-Jorku, abiacajuć pakazać u efiry 10 epizodaŭ sieryjała. Servis HBO Max, na jakim jon vyjdzie, uskładaje na «I prosta tak…» vialikija nadziei — kažuć, što sieryjał moža radykalna pašyryć aŭdytoryju servisa.
Trejler sieryjała «I prosta tak…»
«I prosta tak…» pakaža nam žyćcio hieraiń «Seksu ŭ vialikim horadzie» praz 20 hadoŭ. Amatary aryhinalnaha sieryjała adrazu zaŭvažać, što siarod asnoŭnych zorak niama Kim Ketrał, vykanaŭcy roli Samanty. Ketrał patłumačyła admovu ad zdymak pryčynami, nie źviazanymi ź sieryjałam, adnak viadoma, što jana maje praciahły kanflikt z hałoŭnaj zorkaj sieryjała — aktrysaj Saraj Džesikaj Parkier.
Nieviadoma, jak scenarysty patłumačać adsutnaść Samanty. Ale jasna, chto jaje zamienić. Čaćviortuju i pakul samuju nieviadomuju ź siabrovak, Lizu Tod Ueśli, syhraje aktrysa Nikol Ary Parkier, zusim nieviadomaja biełaruskamu hledaču.
«I prosta tak…» pakul nie vyjšaŭ, adnak niekatoryja krytyki ŭžo niehatovyja pryznać stratu Samanty. Kažuć, nibyta «Seks u vialikim horadzie» staŭ takim paśpiachovym mienavita praz toje, što kožnaja z hieraiń dapaŭniała adna adnu. I kali z hetaha pazła prybrać adzin elemient, to mahija sieryjała źniknie. Tym bolš kali hety elemient taki jarki, jak niastrymanaja i dziorzkaja Samanta.
Styl
Jakim by ni atrymaŭsia «I prosta tak…», jość niešta, čaho amatary pieršapačatkovaha sieryjała dakładna buduć čakać ad premjery. Razmova pra aryhinalny styl hieraiń.
Prajšło 17 hadoŭ z vychadu apošniaj sieryi «Seksu ŭ vialikim horadzie», ale zamiežnyja miedyja dahetul vučać žančyn apranacca ŭ styli ńju-jorkskich modnic. Taki paśpiachovy sieryjalny harderob (dakładniej, čatyry harderoby — pa adnym dla kožnaj hieraini) stvaryła dyzajnierka Patrysija Fiłd.
Vobrazy ź sieryjała «Seks u vialikim horadzie». Fota depositphotos.com.
Fiłd nie prosta padabrała dla kožnaj ź siabrovak takoje adzieńnie, što dapamahło maksimalna raskryć ich historyju. Jana pryvučyła viadomych dyzajnieraŭ supracoŭničać z televizijnymi kaściumierami i pazyčać im adzieńnie dla zdymak, a taksama na prykładzie hieraiń «Seksu…» pakazała žančynam va ŭsim śviecie, jak vyražać siabie praz adzieńnie.
Asablivuju viadomaść nabyŭ harderob Kery Bredšou. Fiłd zdoleła abjadnać u vobrazie Bredšoŭ rečy nibyta z roznych płaniet — naprykład, tam možna znajści spadnicu-pačku, kuplenuju stylistami, pa čutkach, za piać dalaraŭ, i šubu z naturalnaha futra. Nielha nie ŭzhadać lubimyja tufli Kery ad firmy Manolo Blanhik — sieryjał zrabiŭ ich viadomymi na ŭvieś śviet.
Uzrost
Kali vychodziŭ «Seks u vialikim horadzie», jaho hierainiam było trochi za 30. Sieryjał staŭ adnoj ź pieršych źjavaŭ masavaj kultury, što dali zrazumieć: žančyny ŭ takim uzroście mohuć być nie tolki chatnimi haspadyniami.
Ciapier ńju-jorkskim siabroŭkam užo za 50, i jany znoŭ trapili pad dyskryminacyju. Vykanaŭca hałoŭnaj roli Sara Džesika Parkier raspaviała ŭ niadaŭnim intervju, što i jana, i inšyja asnoŭnyja aktrysy sieryjała atrymali šmat niehatyŭnych vodhukaŭ za toje, što ŭ novym sieryjale jany vyhladajuć pastarełymi. Parkier śviedčyć, što staŭleńnie da aktrys stała horšym praź isnavańnie sacsietak:
«Amal što zdajecca, nibyta ludzi nie chočuć, kab my byli całkam zadavolenyja svaim ciapierašnim žyćciom, nibyta im padabajecca, kali nam baluča ad taho, jakija my siońnia. Pry hetym nie važna, ci my vybirajem stareć naturalna i nie vyhladać pry hetym idealna, ci my robim niešta, kab vyhladać lepiej».
Čamu ŭ halivudskim kino ŭsio mienš seksu?
Film «Minułaj nočču ŭ Socha». Čamu varta pahladzieć
