Z hałami hetaha futbalista źviazvajuć praklon. U subotu jon dvojčy zabiŭ biełarusam
Kažuć, što kali Aaran Remzi zabivaje hały, pamiraje niechta viadomy. U śpisie «achviaraŭ» valijca — bolš za 20 imion, u tym liku Uitni Chjustan i Ŭsama bien Ładen. Zbornaj Biełarusi 13 listapada Remzi zabiŭ dvojčy.
Fota manunitedcore.com.
13 listapada biełaruskaja futbolnaja zbornaja vyjšła na dvuboj suprać nacyjanalnaj kamandy Ŭelsa. To była apošniaja hulnia adbora na čempijanat śvietu-2022 u Katary, i, zdajecca, vyniki adbora možna nazvać biassłaŭnymi dla biełarusaŭ. Hladzicie sami — 8 parazaŭ, 1 pieramoha (u matčy z Estonijaj) i apošniaje miesca ŭ hrupie.
Kančatkovy lik hulni - 5:1. Dva z zabitych hałoŭ naležać paŭabaroncu italjanskaha «Juvientusa» Aaranu Remzi, hulcu, što maje cikavuju historyju.
Remzi ŭziali ŭ dziciačuju kamandu najlepšaha valijskaha kłuba «Kardyf Sici», i paźniej, va ŭzroście 16 hadoŭ, jon zrabiŭsia samym maładym hulcom u darosłaj kamandzie kłuba.
Z 2008 da 2019 hoda Remzi vystupaŭ za łondanski «Arsienał». U hety čas ź im zdaryłasia surjoznaja traŭma, paśla jakoj hulec adnaŭlaŭsia niekalki hadoŭ i byŭ nakiravany hulać u inšych kamandach, u tym liku u rodnym «Kardyf Sici».
Usio atrymałasia, i praź niekalki hadoŭ Remzi ŭžo ličyli adnym z najlepšych paŭabaroncaŭ Jeŭropy.
Fota: Instahram Aarana Remzi.
Praklon
Ale tym, chto mała cikavicca sportam, Remzi bolš viadomy praź inšaje. Kažuć, što kali Aaran zabivaje hoł, pamiraje niechta viadomy. I takich prykładaŭ užo kala dvuch dziesiatkaŭ.
Heta pačałosia ŭ 2009 hodzie. Remzi adznačyŭsia hołam u matčy z «Portsmutam», a praz try dni pamior viadomy amierykanski sienatar Edvard Kienedzi, małodšy brat amierykanskaha prezidenta Džona Kienedzi.
Praz dva hady Remzi zabiŭ «Mančester Junajted», a na nastupny dzień stała viadoma pra zabojstva, jak tady kazali, terarysta №1 — Usamy bien Ładena.
Praz try dni paśla hołu «Totenchemu» źjaviłasia navina pra śmierć Styva Džobsa, a na nastupny dzień — paśla hołu ŭ varoty «Marselu» — byŭ zabity Muamar Kadafi.
Voś tolki niekatoryja ź imionaŭ znakamitaściej, što pamirali paśla hałoŭ Remzi: śpiavačka Uitni Chjustan, akciory Robin Uiljams, Ałan Rykman i Poł Uokier, piśmieńnik Hiunter Hras, navukoviec Styvien Chokinh i byłaja pieršaja łedzi ZŠA Nensi Rejhan.
Tym nie mienš, zusim nie zaŭsiody paśla hołu Remzi źjaŭlajecca navina pra śmierć znakamitaści.
Paru hadoŭ tamu žurnalisty padličyli, što takoje adbyvajecca prykładna paśla 25% hałoŭ valijca. Adnak fanaty ŭsio roŭna ŭspaminajuć pra praklon paśla kožnaha hoła Remzi.
Zdajecca, apošni raz praklon «spracavaŭ» hetym letam. 16 červienia valijcy vyjhrali ŭ Turcyi ź likam 2:0 na čempijanacie Jeŭropy. Remzi zabiŭ tady pieršy hoł toj hulni, a na nastupny dzień stała viadoma pra śmierć pieršaha prezidenta Zambii Kieneta Kaŭndy.
Sam Aaran stavicca da historyi z praklonam z humaram i kaža, što jon usio ž taki «zabiŭ» niekatorych «drennych chłopcaŭ», majučy na ŭvazie bien Ładena i Kadafi.
U jaho dobry imidž, i lahčej pačuć pra dabračynnyja akcyi z udziełam Remzi, čym pra skandały. U minułym hodzie, naprykład, valijec pieraličyŭ 10 tysiač funtaŭ brytanskaj Nacyjanalnaj słužbie achovy zdaroŭja, a praź niejki čas padtrymaŭ centr dapamohi biazdomnym u valijskim Ńjuparcie.
