Na bierazie la Novaj Ziełandyi znajšli źniasilenaje pinhviniania — za try tysiačy kiłamietraŭ ad doma. Jak jano tudy trapiła?
Žychary ŭźbiarežža Novaj Ziełandyi vyjavili na adnym ź plažaŭ redkaha hościa — pinhviniatka vidu Adeli. Hety vid hniazdujecca vyklučna la bierahoŭ Antarktydy i na najbližejšych da macieryka vyspach, i ŭbačyć jaho dzie-niebudź jašče amal niemahčyma, piša Bi-bi-si.
Pinhviniania vyhladaje vielmi razhublenym, Harry Singh
Heta ŭsiaho tolki treci zarehistravany vypadak, kali pradstaŭnik vidu Adeli zaŭvažany ŭ Novaj Ziełandyi — za try tysiačy kiłamietraŭ ad miesca pražyvańnia. Pieršyja dva adbylisia ŭ 1962 i 1993 hadach.
Pieršym pinhviniania na novaziełandskim plažy zaŭvažyŭ miascovy žychar Hary Sinhch, ale spačatku padumaŭ, što heta zabytaja na bierazie vialikaja miakkaja cacka. «Jon nie ruchaŭsia na praciahu cełaj hadziny i vyhladaŭ zmučanym i razhublenym», — kaža Sinhch.
Pavodle jaho słoŭ, pakul jon čakaŭ prybyćcia śpiecyjalnaj hrupy ratavalnikaŭ, jon bolš za ŭsio chvalavaŭsia, kab pinhvin nie pajšoŭ znoŭ u vadu, bo ŭ jaho stanie jon staŭ by lohkaj zdabyčaj marskich drapiežnikaŭ, jakich bahata la bierahoŭ Novaj Ziełandyi.
Akramia taho, na plažy, kudy prybiła pinhviniania, časta vyhulvajuć sabak biez pavadkoŭ. Lačeńniem pinhvina, jakoha novaziełandcy ŭžo paśpieli nazvać Pinhu, zaniaŭsia śpiecyjalist pa vyratavańni pinhvinaŭ ź dziesiacihadovym stažam, bijołah Tomas Strekł razam z kamandaj vieterynaraŭ.
Pavodle jaho słoŭ, za doŭhija hady pracy jamu traplalisia asobiny roznych vidaŭ, ale nikoli jon nie bačyŭ u hetych krajach pinhvina Adeli.
Analizy Pinhu pakazali, što žyvioła źniasilena i abiazvodžana. Užo niekalki dzion pinhvin atrymlivaje charčavańnie praź śpiecyjalnuju trubačku.
Kali jon całkam akryjaje, jaho vypuściać la vady, ale ci zachoča jon prarabić zvarotny šlach u Antarktydu, navukoŭcy nie viedajuć.
