24-hadovamu minčuku dali try hady «chatniaj chimii» za padziei žniŭnia-2020. Jaho zatrymali roŭna praz hod
12 listapada ŭ sudzie Centralnaha rajona Minska vynieśli prysud 24-hadovamu palitviaźniu Kiryłu Vołachu (č. 1 art. 342) i asudzili da troch hadoŭ «chatniaj chimii».
Kirył Vołach
Kiryła zatrymali 22 žniŭnia 2021 hoda. Jon maje siarednie-śpiecyjalnuju adukacyju, u hetym hodzie ažaniŭsia. Chvareje na astmu. Z momantu zatrymańnia mužčyna byŭ pad vartaj.
Prysud vyniesła sudździa Viktoryja Šabunia. Bok dziaržabvinavačańnia padtrymaŭ pamočnik prakurora Arciom Ćviatkoŭ. Pavodle abvinavačańnia, 9 žniŭnia 2020 hoda Kirył Vołach «pryniaŭ aktyŭny ŭdzieł u hrupavych dziejańniach, jakija hruba parušajuć hramadski paradak, publična vykrykvaŭ łozunhi, plaskaŭ rukami, naŭmysna pieraškadžaŭ ruchu transpartu i admoviŭsia padparadkavacca patrabavańniam supracoŭnikaŭ milicyi».
Kirył pryznaŭ svaju vinu. Jon raspavioŭ, što ŭ toj dzień pajšoŭ špacyravać pa horadzie sa svajoj niaviestaj.
Na Mašerava sustreŭ znajomaha, parazmaŭlaŭ ź im šeść chvilin — mienavita hety čas znachodziŭsia na darozie, a ŭvieś astatni čas jany razam ź dziaŭčynaj išli pa tratuary.
Na fotazdymku, jaki stavicca jamu ŭ vinu, u jaho ničoha niama ŭ rukach, jon nie vykrykvaje łozunhi. Abvinavačany padkreśliŭ, što prosta biez mety błukaŭ pa horadzie i nie razumieŭ, što ŭdzielničaŭ u niesankcyjanavanym mierapryjemstvie.
Kala 23-j hadziny jon pajechaŭ dadomu na maršrutcy. Kirył pryznaŭ toj fakt, što znachodziŭsia na miescy, ale padkreśliŭ, što ničoha nie vykrykvaŭ i nie rabiŭ. Jon raspavioŭ, što ŭbačanaje jaho ździviła.
Sudździa pacikaviłasia pra jahony stan zdaroŭja: uvieś čas znachodžańnia ŭ kletcy Kirył byŭ u kajdankach, pastajanna kašlaŭ i karystaŭsia inhalataram. Chłopiec adkazaŭ, što ŭsio narmalna.