Piaskoŭ: Łukašenka nie ŭzhadniaŭ z Kramlom zajavu nakont spynieńnia tranzitu hazu ŭ Jeŭropu
Pres-sakratar prezidenta Rasii Dźmitryj Piaskoŭ prakamientavaŭ słovy Alaksandr Łukašenki nakont spynieńnia tranzitu hazu ŭ Jeŭropu.
TASS
Zajava Alaksandra Łukašenki ab mahčymaści pierakryć tranzit hazu ŭ Jeŭropu nie ŭzhadniałasia z Kramlom, zajaviŭ žurnalistam u piatnicu pres-sakratar prezidenta RF Dźmitryj Piaskoŭ, piša TASS.
«Nie, jany nijak nie ŭzhodnienyja», — adkazaŭ Piaskoŭ na adpaviednaje pytańnie.
«U hetym vypadku, tak, heta naš sajuźnik, ale heta suvierennaja dziaržava, — padkreśliŭ Piaskoŭ. — Jak by kamu heta ni padabałasia, Rasija zaŭsiody była, jość i patencyjna budzie zastavacca krainaj-harantam enierhietyčnaj biaśpieki jeŭrapiejskaha kantynienta».
«Biezumoŭna», — adkazaŭ jon na ŭdakładniajučaje pytańnie, ci budzie RF harantam enierhietyčnaj biaśpieki ŭ Jeŭropie niezaležna ad dziejańniaŭ biełaruskaha boku.
Piaskoŭ taksama pakinuŭ biez kamientaroŭ zajavy Łukašenki pra sproby pierakinuć zbroju mihrantam na miežach ES.
Raniej Łukašenka vykazaŭ aściarohi z nahody taho, što ŭ łahier mihrantaŭ mohuć pierakinuć zbroju i bojeprypasy, jakija iduć u asnoŭnym z Danbasa. Jon taksama zhadaŭ ab tym, što abmiarkoŭvaŭ hetaje pytańnie z Pucinym.
Piaskovu zadali pytańnie, ci sapraŭdy była padobnaja razmova i što moža być zroblena ŭ takoj situacyi. «Ja pakidaju heta biez kamientaroŭ», — adkazaŭ pradstaŭnik Kramla.
***
U čaćvier na naradzie z Saŭminam Łukašenka pryhraziŭ Jeŭrasajuzu pierakryć tranzit hazu ŭ Jeŭropu pa transnacyjanalnym hazapravodzie «Jamał-Jeŭropa» ŭ tym vypadku, kali ES pašyryć sankcyi suprać jaho krainy praz kanflikt vakoł mihrantaŭ na biełaruska-polskaj miažy.
«My abahravajem Jeŭropu, jany nam jašče pahražajuć, što zakryjuć miažu. A kali my pierakryjem pryrodny haz tudy? Tamu ja b kiraŭnictvu Polščy, litoŭcam i inšym biezhałovym parekamiendavaŭ dumać pierš, čym kazać. Ale heta ich sprava. Začyniać — niachaj začyniajuć. Ale MZS pavinien papiaredzić usich u Jeŭropie: kali tolki jany ŭviaduć nam dadatkovyja sankcyi «niepieravaranyja» — nieprymalnyja dla nas, my pavinny adkazvać», — skazaŭ u čaćvier Łukašenka.
