Pamiežnik z 15-hadovym dośviedam — pra dziejańni byłych kaleh: Jany ŭčyniajuć słužbovyja złačynstvy
Biełaruski pamiežny kamitet zaśviedčyŭ, što la miažy z Polščaj ciapier znachodziacca kala 2 tysiač mihrantaŭ. Jany sprabujuć prarvacca ŭ Polšču — złamali ŭ niekatorych miescach aharodžu. Polskija pamiežniki i vajskoŭcy «adbivajuć ataku», paviedamlaje «Radyjo Svaboda».
Biełaruski pamiežnik, jaki adsłužyŭ 15 hadoŭ, prakamentavaŭ na prośbu «Svabody» dziejańni svaich byłych kalehaŭ.
Jon ličyć, što mihranty adnaznačna źjaŭlajucca parušalnikami — bo znachodziacca ŭ pamiežnaj pałasie.
«Pavodle zakanadaŭstva, dla taho kab znachodzicca ŭ pamiežnaj pałasie, treba mieć pašpart i propusk, jaki vydali orhany pamiežnaj słužby. Tut ža my bačym, što mihranty volna «žyvuć» u pamiežnaj pałasie, palać vohniščy, siakuć drevy — i ich nichto nie čapaje! U ciomny čas sutak naohuł nikomu nielha znachodzicca ŭ pamiežnaj pałasie! Heta rabić možna tolki ŭ krajnim vypadku, pa rašeńni načalnika orhana pamiežnaj słužby. Značyć, kali «zakonna», to jany znachodziacca tam vyklučna pa rašeńni pamiežnaha načalstva», — kaža były pamiežnik.
Jon ličyć, što byłyja kalehi, nie źviartajučy ŭvahi na parušeńni zakonu, bolš za toje — spryjajučy takim parušeńniam, ździajśniajuć słužbovaje złačynstva.
«Kali nielehała łoviać u pamiežnaj pałasie, to instrukcyja standartnaja: zatrymańnie — pratakoły — IČU — pryniaćcie rašeńnia pa departacyi. I zaŭsiody tak było», — dadaŭ były pamiežnik.
Jon źviartaje ŭvahu: kali mihranty siońnia išli pa darozie respublikanskaha značeńnia ŭ bok punktu propusku — jany ničoha nie parušali. Ale kali jany zbočyli ŭ les i trapili ŭ pamiežnuju pałasu — stali parušalnikami.
«Nakolki ja viedaju, pamiežniki majuć zahad źvierchu — nie zatrymlivać mihrantaŭ, a spryjać im», — vykazaŭsia surazmoŭca.
Jašče jon zaŭvažyŭ, što ciapier da «achovy» mihrantaŭ, ci da ich «ačapleńnia», pačali pryciahvać i vajskoŭcaŭ terminovaj słužby.
«Jašče źviarnu ŭvahu na takuju akaličnaść: na videa bačna, što spalniki va ŭsich adnolkavyja, navat u kurdaŭ i syryjcaŭ. Heta značyć, što była centralizavanaja zakupka. A ŭ adnaho ja zaŭvažyŭ navat spalnik, jakimi karystajucca pamiežniki», — zaznačyŭ były pamiežnik.
Štraf, departacyja, IČU. Jak raniej abychodzilisia z tymi, chto sprabavaŭ prarvacca praź miažu
