Na kanfierencyju ŭ Vienie pa biełaruskim pytańni zaprasili pradstaŭnikoŭ biełaruskich uładaŭ. Heta pačatak pieramoŭ ź imi?
Na 22 listapada kancler Aŭstryi Alaksander Šalenbierh anansavaŭ mižnarodnuju kanfierencyju pa vyrašeńni palityčnaha kryzisu ŭ Biełarusi. Udzieł u joj prymuć ajčynnyja demsiły, taksama ŭdzieł paćvierdziŭ šerah pradstaŭnikoŭ jeŭrapiejskich MZS. Aŭstryja nakiravała zaprašeńnie i biełaruskim čynoŭnikam, ale pra ich rašeńnie pakul ničoha nieviadoma. Razam z hetym u siecivie źjaviłasia infarmacyja: raz biełaruski bok zaprošany, heta moža stać pačatkam dyjałohu z režymam i startam handlu palitviaźniami. Ci tak heta?
«Nijakich pieramoŭ z režymam nie płanujecca»
Pradstaŭnik Śviatłany Cichanoŭskaj pa mižnarodnych spravach Valer Kavaleŭski ŭ kamientary «Našaj Nivie» źniapraŭdziŭ hetuju infarmacyju.
«Nijakich pieramoŭ z režymam nie płanujecca. Chacia b pa toj prostaj pryčynie, što nie čakajecca ŭdziełu jaho pradstaŭnikoŭ — takich ludziej, jakija sapraŭdy mohuć prymać niejkija rašeńni.
Dla ich udzieł u takoj kanfierencyi zradni pryznańniu demakratyčnych sił jak realnych pradstaŭnikoŭ biełaruskaha naroda. A hetaha jany paźbiahajuć roznymi sposabami, lubych kantaktaŭ.
Razam z tym varta adznačyć, što ich niaŭdzieł taksama vielmi kiepski dla ich, bo faktyčna vielmi važnyja pytańni datyčna Biełarusi abmiarkoŭvajucca bieź ich. Režym tut apynuŭsia ŭ vielmi składanaj situacyi — i ich udzieł, i nieŭdzieł niavyhadnyja adnačasova», — kamientuje Valer Kavaleŭski.
Valer Kavaleŭski.
Razam z hetym pradstaŭnik ofisa Cichanoŭskaj adznačaje, što asabista dla ich pryjezd biełaruskaha boku byŭ by dobrym znakam.
«My zaŭsiody kazali, što kryzis u Biełarusi možna vyrašyć mirnym šlacham, praz dyjałoh. I kali b niechta ź siońniašnich čynoŭnikaŭ vysokaha ŭzroŭniu ŭsio ž pryjechaŭ, dla nas usich heta było b važnym raźvićciom padziej, pakazčykam, što my ŭsie sapraŭdy hatovyja vyrašać prablemy».
Kali kazać pra palityčnych źniavolenych, to tut pazicyja ofisa zastajecca pryncypovaj:
«Nijakaha handlu palityčnymi źniavolenymi taksama nie było i być nie moža. Tamu što my viedajem, jak siabie pavodzić režym u takich situacyjach, jak złoŭžyvaje davieram mižnarodnaj supolnaści. My bačyli, jak heta rabiłasia raniej, i hetak bolš nie budzie», — kamientuje Kavaleŭski.
Čym važnaja mižnarodnaja kanfierencyja ŭ Vienie?
Kancler Aŭstryi jašče padčas anonsa mierapryjemstva ŭ Vienie adznačyŭ, što sankcyi nie mohuć być adzinaj movaj, na jakoj Jeŭropa razmaŭlaje ź Biełaruśsiu.
Viadoma, što na kanfierencyi buduć pradstaŭniki štaba Cichanoŭskaj, Kaardynacyjnaj rady i NAU. Čakajecca pryjezd vysokapastaŭlenych asobaŭ z krain ES i Uschodniaha partniorstva, mižnarodnych arhanizacyj.
U pryvatnaści, zaprošanyja staršyni misij pry ABSIE i misij krain-členaŭ Savieta Biaśpieki AAN. Pra ŭdzieł u mierapryjemstvie ŭžo paviedamiŭ jeŭrapiejski kamisar pa pytańniach pašyreńnia i palitycy susiedstva Olivier Varchieli.
Ci buduć na kanfierencyi pradstaŭniki Rasii, pakul nieviadoma, ale jany zaprošanyja, jak i biełaruski bok.
Pry lubym kančatkovym śpisie ŭdzielnikaŭ, na dumku surazmoŭcy, sustreča pavinna stać pačatkam bolš pahłyblenaha ŭdziełu mižnarodnych sił u vyrašeńni biełaruskaha kryzisu.
«Na siońniašni dzień ź Biełarusi nie tak prosta vyrašyć kryzis samastojna, damahčysia niejkich źmienaŭ. Nam patrebnaja dapamoha, kab spynić represii i hvałt, kab vyzvalić palityčnych źniavolenych. Udzieł mižnarodnaj supolnaści ŭ hetaj spravie vielmi važny, tamu što jon dazvalaje arhanizoŭvać dadatkovy cisk na režym.
Ën moža być roznym: palityčnym, dypłamatyčnym, finansavym. Mohuć być uviedzienyja novyja sankcyi. Usio heta ŭ sumie stvaraje kantekst, pry jakim u režyma ŭsio mienš mahčymaściaŭ praciahvać i represii, i hvałt. My budziem stvarać umovy dla taho, kab kryzis u krainie byŭ pryznany. I pryjšło razumieńnie, što vyrašać jaho treba praz dyjałoh ź biełaruskim narodam», — ličyć Valer Kavaleŭski.
![Клас Клас](https://nashaniva.com/images/reactions/reaction-like.png)
![Панылы сорам Панылы сорам](https://nashaniva.com/images/reactions/reaction-facepalm.png)
![Ха-ха Ха-ха](https://nashaniva.com/images/reactions/reaction-smile.png)
![Ого Ого](https://nashaniva.com/images/reactions/reaction-omg.png)
![Сумна Сумна](https://nashaniva.com/images/reactions/reaction-sad.png)
![Абуральна Абуральна](https://nashaniva.com/images/reactions/reaction-anger.png)