Dvojčy sudzimy, handlavaŭ marychuanaj, šturmavaŭ Kapitolij z ukrainskim šalikam. Što viadoma pra amierykanca, jaki prosić prytułak u Biełarusi?
Evan Ńjuman, adzin z udzielnikaŭ šturmu Kapitolija ŭ studzieni 2021, znajšoŭsia ŭ Biełarusi. Paviedamlajecca, što jon prosić tut palityčny prytułak. Sam Ńjuman u efiry BT paviedamiŭ, što jaho abvinavačvajuć pa šaści spravach. «Naša Niva» pacikaviłasia, što jašče viadoma pra amierykanskaha hościa.
Ńjumanu 48 hadoŭ. Jon uradženiec Kalifornii, maje dvaich dziaciej, zajmajecca biznesam pa vytvorčaści sumak. Baćka Evana kiravaŭ niekalkimi hatelami ŭ kalifarnijskim horadzie Santa-Roza.
Apošnija 7 hadoŭ Evan žyŭ u horadzie Mił-Valli, u niekalkich kiłamietrach ad San-Francyska.
Amierykanskija žurnalisty naviedali dom Evana ŭ Mił-Valli, ale znajšli tam novych žycharoŭ. Akazałasia, Ńjuman pradaŭ nieruchomaść za 1,3 miljona dalaraŭ jašče ŭ krasaviku 2021, paśla čaho źjechaŭ z krainy. Ad ahienta pa nieruchomaści novyja haspadary viedali tolki, što Evan «niedzie va Ukrainie».
Viadoma, što ciapier Evan znachodzicca ŭ vyšuku. Ńjumana vinavaciać u tym, što jon udaryŭ palicejskaha Kapitolija ZŠA i vykarystoŭvaŭ mietaličnuju barykadu, kab udaryć inšych aficeraŭ padčas biesparadkaŭ 6 studzienia ŭ Vašynhtonie, jaho taksama vinavaciać u naŭmysnym praniknieńni ŭ zabaronienuju zonu i ŭ praniknieńni z užyvańniem hvałtu, a taksama va ŭdziele ŭ chulihanstvie na terytoryi Kapitolija.
Detali kanfliktu Evana Ńjumana z palicejskim la Kapitolija byli apublikavanyja ŭ aficyjnym dakumiencie, jaki pierakazvaje videazapis z kamiery na hrudziach amierykanskaha siłavika. Paviedamlajecca, što Ńjuman byŭ u čyrvonaj kiepcy «Make America Great Again» i z hazavaj maskaj, jakuju pieryjadyčna nadziavaŭ.
Evan kazaŭ palicejskim: «Vy schilajecie kaleni pierad Antyfa, bo jany maleńkija sučki. Ja hatovy pamierci, a vy?» Pahražaŭ, što ich zachopić natoŭp. Kazaŭ, što palicejski abaraniaje ludziej, jakija «zabjuć i zhvałciać jaho dziaciej», nazvaŭ palicejskaha «kavałkam haŭna».
Paźniej, padčas sproby pieraadoleć mietaličnuju aharodžu, jakoj strymlivali pratestoŭcaŭ, Ńjuman udaryŭ kułakom dvuch aficeraŭ palicyi. Taksama «vykarystoŭvaŭ mietaličnuju aharodžu jak taran, kab prarvać ačapleńnie». Zatym, kali natoŭp usio ž prarvaŭ palicejskaje ačapleńnie, Ńjuman niecenzurna abražaŭ palicejskich, nazyvaŭ ich zabojcami.
Jašče adzin cikavy momant. Amierykanskija palicejskija paviedamlajuć: Ńjuman udzielničaŭ u 2004-2005 hodzie ŭ aranžavaj revalucyi va Ukrainie. A na kadrach jaho supraćstajańnia z palicejskimi la Kapitolija bačna, što na šyi Evana šalik z tryzubcam i nadpisam na ŭkrainskaj «Nas bahato, nas nie podołati».
Viadoma, što za Ńjumanam paśla jaho pryhod u Kapitolii sačyli ahienty FBR. Jany nazirali, jak Evan pakidaŭ svaju rezidencyju ŭ Mił-Valli ŭ lutym, i rušyli za im u mižnarodny terminał u mižnarodnym aeraporcie San-Francyska, dzie paśla dapytali jaho. Tady Evan skazaŭ ahientam, što jon prylacieŭ u Vašynhton 5 studzienia i vylecieŭ 7 studzienia i što jon uzajemadziejničaŭ z pravaachoŭnymi orhanami. Ale admoviŭsia paviedamić padrabiaznaści i nie adkazaŭ na pytańni ab tym, ci ŭvachodziŭ jon u jakija-niebudź fiederalnyja budynki i ci mieŭ sutyčku z palicyjaj.
U sakaviku jon źjechaŭ z ZŠA ŭ Italiju, potym pierabraŭsia va Ukrainu, dzie pražyŭ čatyry miesiacy, u Biełarusi apynuŭsia ŭ siaredzinie žniŭnia, kali jaho zatrymali pamiežniki pry pierachodzie miažy.
Evan Ńjuman nie pieršy raz traplaje ŭ skandalnuju historyju. U 2018 hodzie Evan razam z bratam Markam trapiŭ u sud, a praz heta i ŭ ŚMI. Tady na poŭnačy Kalifornii prajšli mocnyja pažary, ludziej evakujavali ź niekatorych terytoryj, u tym liku ź miastečka Faŭntan-Hroŭv, dzie znachodziŭsia dom maci bratoŭ Ńjumanaŭ.
Na žal, jon zhareŭ padčas pažaraŭ. Naviedvańnie hetaj terytoryi było zabaroniena, ale ŭžo praź niekalki dzion paśla pažaraŭ Evan i Mark Ńjumany pryjechali na papiališča razam z maci.
Ńjuman u 2018 hodzie na papiališčy matčynaha doma
Za heta bratoŭ zatrymali, vyzvalili tolki paśla ŭniasieńnia załohaŭ. Zatym sudzili.
Mark Ńjuman pryznaŭ siabie vinavatym u admovie pakinuć evakujavanuju zonu biedstva. Sudździa Džuli Konhier źmiaściła jaho na vyprabavalny termin na try hady i zahadała jamu adbyć 180 hadzin hramadskich prac.
Evan spačatku vyrašyŭ ryzyknuć šaściu miesiacami turmy, pieradaŭšy spravu na razhlad suda prysiažnych.
Evan u sudzie ŭ 2018 hodzie
«Heta niespraviadlivaje i niezakonnaje abvinavačańnie, — kazaŭ Evan. — U hetym rajonie było šmat domaŭładalnikaŭ».
Evan abaraniaŭ siabie sam, kazaŭ, što nie vinavaty. Ale ž paśla ŭsio ž pajšoŭ na ździełku z prakuraturaj, pryznaŭ vinu i atrymaŭ 2 hady ŭmoŭna i 40 hadzin hramadskich prac.
A za dziesiać hadoŭ da incydentu z pažarami palicyja Santa-Rozy kanfiskavała 179 raślin marychuany i 1 funt apracavanaj marychuany, rasfasavany dla prodažu, u domie Ńjumana na Rejłroŭd-Skvier, jak zajavili ŭłady.
Evan byŭ aryštavany i abvinavačany pa niekalkich punktach abvinavačańnia ŭ zachoŭvańni marychuany i vyroščvańni marychuany. U vyniku jaho pryznali vinavatym tolki pa adnym punkcie abvinavačańnia — u niezakonnym zachoŭvańni marychuany. Ńjumana pryhavaryli da 30 dzion turemnaha źniavoleńnia i troch hadoŭ umoŭna.
***
Ciapier ža Evan raskazvaje biełaruskamu TB, što ŭ sakaviku jon źjechaŭ z ZŠA ŭ Italiju, potym pierabraŭsia va Ukrainu, dzie pražyŭ čatyry miesiacy, u Biełarusi apynuŭsia ŭ siaredzinie žniŭnia, kali jaho zatrymali pamiežniki pry pierachodzie miažy.
Ńjuman kaža, što FBR uklučyła jaho ŭ śpis samych šukanych złačyncaŭ. Sam jon ličyć, što ni ŭ čym nie vinavaty.
