U ZŠA palicyja znajšła ckradzienuju dziaŭčynku z dapamohaj žestu, jaki staŭ virusnym u TikTok
Palicyja ŭ amierykanskim štacie Kientuki znajšła ckradzienuju 16-hadovuju dziaŭčynu paśla taho, jak kiroŭca mašyny, što praminała, zaŭvažyŭ, što jana pakazvaje žest, jaki staŭ virusnym ŭ TikTok.
Letaś u sacsietcy raspaŭsiudziŭsia žest z padniataj dałońniu i składzienymi palcami, jaki paznačaje biazhučnuju prośbu ab dapamozie. Mužčyna zaŭvažyŭ, što dziaŭčynka, jakaja prajazdžała pobač u «Tajocie», padniała ruku i zakryła vialiki palec astatnimi, paviedamlaje Dožd́.
Jon paznaŭ hety žest, jaki aznačaje prośbu ab dapamozie pry chatnim hvałcie, i źviarnuŭsia ŭ palicyju, Paźniej palicejskija zatrymali 61-hadovaha Džejmsa Hierbierta Bryka. U jaho mašynie znachodziłasia dziaŭčynka, pra źniknieńnie jakoj u Paŭnočnaj Karalinie za niekalki dzion da hetaha ŭ palicyju paviedamili jaje baćki. Z 2 listapada Bryk pravioz dziaŭčynku praz Paŭnočnuju Karalinu, Tenesi, Kientuki i Ahajo.
Akramia taho, na telefonie Bryka palicyjanty znajšli vyjavy niepaŭnaletnich dziaŭčat u seksualnych pozach. Mužčynu aryštavali. Jaho abvinavačvajuć u niezakonnym pazbaŭleńni voli i zachoŭvańni materyjałaŭ, jakija demanstrujuć seksualnyja dziejańni niepaŭnaletniaha va ŭzroście ad 12 da 18 hadoŭ.
Žest, jaki pakazvała dziaŭčynka, u minułym hodzie atrymaŭ šyrokaje raspaŭsiudžvańnie ŭ TikTok. Amierykanskaja pravaabarončaja arhanizacyja Women's Funding Network prapanavała vykarystoŭvać jaho ŭ vypadkach, kali žančynie patrebna dapamoha, ale jana nie moža pra heta adkryta paviedamić — naprykład, u vypadku chatniaha hvałtu, što ŭzmacniŭsia padčas łakdaŭnu.