Ejčara kampanii Godel asudzili na 15 sutak za padpisku na tak zvany «ekstremiscki» telehram-kanał
Supracoŭnicu HR departamienta Godel Technologies Volhu Kazadoj zatrymali ranicaj 4 listapada supracoŭniki SACHRa i HUBAZiKa. U jaje praviali dva pieratrusy: pa miescy žycharstva i miescy rehistracyi. Paśla hetaha jaje dastavili ŭ HUBAZiK, potym — RUUS, na noč da suda — u IČU na Akreścina, pišuć pravaabaroncy.
Siońnia jaje spravu razhladali ŭ sudzie Frunzienskaha rajona. Na Volhu skłali pratakoł pavodle č. 2 art. 19.11 KaAP. Zhodna ź im, jana «zachoŭvała ŭ asabistym akaŭncie materyjały telehram-kanała «Basta», jaki pryznany ekstremisckim». Na sudzie žančyna pryznała vinu častkova, bo jana «čytaje telehram-kanały, ale nie raspaŭsiudžvaje ich».
Na sudzie dapytali śviedku-milicyjanta z Frunzienskaha RUUS. Jon raspavioŭ, što Volha była dastaŭlenaja ŭ RUUS, «bo byli padazreńni, što jana ŭdzielničała ŭ niesankcyjanavanych masavych mierapryjemstvach». Pavodle jaho słovaŭ, u RUUS supracoŭniki ahledzieli jaje telefon i ŭbačyli, što jana była padpisanaja bolš čym na dziesiać telehram-kanałaŭ, jakija pryznany ekstremisckimi. Paśla hetaha na jaje skłali pratakoł pavodle č. 2 art. 19.11 KaAP.
Adnak Volha źviarnuła ŭvahu, što telefon u jaje zabrali jašče ŭ HUBAZiKu, tamu supracoŭniki RUUS nie mahli ahledzieć jaho. Telefona nie było i ŭ vopisie aryštu, tamu śviedka nijak nie moh aznajomicca z telefonam, bo jon byŭ vyniaty raniej.
Žančyna raspaviała, što ŭ HUBAZiKu ź joj chacieli źniać «pakajalnaje videa», ale jana admoviłasia.
Sudździa Frunzienskaha rajona Julija Bliźniuk aryštavała Volhu Kazadoj na 15 sutak.
