Chočacie Pfizer ci Johnson & Johnson? Jość «vakcynnyja tury»: Polšča, Ukraina, Turcyja. Raskazvajem, kolki jany kaštujuć
Niadaŭna Łukašenka kančatkova zapeŭniŭ, što jeŭrapiejskich vakcyn u Biełarusi nie budzie: «Nam padkidvajuć hetyja oppy [apazicyjaniery] ideju: Zaviazicie Pfizer, Johnson & Johnson, Moderna. Dla čaho? Kab jany mahli pryščapicca, atrymać pašpart i jechać na Zachad instrukcyi atrymlivać. Jedźcie tudy i tam vakcynujciesia!» Skazana — zroblena. Ale nasamreč jašče da hetaj pramovy biełaruskija turfirmy pačali prapanoŭvać «pryščepačnyja» tury va Ukrainu i Jeŭrasajuz.
Fota Depositphotos.com
Ukraina i Pfizer. Košt adnoj pajezdki — 80-100 jeŭra
Adzin z samych papularnych varyjantaŭ dla tych, chto nie choča vakcynavacca «kitajem» albo «Sputnikam», — heta, kaniečnie, Ukraina. Tudy nie patrebnyja vizy, praściej i tańniej dajechać. Turapieratary prapanujuć, jak praviła, Kijeŭ ci Lvoŭ.
Možna pajechać kankretna tudy-nazad tolki pa pryščepku ci možna vybrać pašyranuju prapanovu: vakcynacyja, a paśla 4-6 dzion ekskursij. Vakcynacyja dla biełarusaŭ płatnaja, košt 55 dalaraŭ.
Siarod plusaŭ ceny. Za 80-100 jeŭra možna nabyć pajezdku na 4-5 dzion u Lvoŭ, prajezd i dźvie nočy ŭ hateli ŭvachodziać u košt.
Minusy takoj prapanovy: Pfizer — dvuchkampanientnaja vakcyna, tamu, kali vybirajecie hetuju vakcynu, pryjdziecca płacić dvojčy i jechać dva razy. Da taho ž druhuju pryščepku mnohija pieranosiać davoli ciažka, tamu adzin-dva dni moža i pryjdziecca lažać u łožku z tempieraturaj, a nie chadzić pa restaranach ci muziejach.
Taksama naściarožvaje pierasiačeńnie miažy — vyjezd z krainy praz naziemnyja punkty propusku abmiežavany dla biełarusaŭ, a pajezdka na aŭtobusie. Ale ž u turfirmie kažuć: aformiać dakumienty, što čałaviek jedzie ŭ kamandziroŭku. Praz heta pa viartańni nie treba budzie siadzieć na karancinie.
«Nie chvalujciesia, usio lehalna, ludzi tak jeździać», — zapeŭnivajuć arhanizatary turaŭ.
Taksama jość tonki momant ź siertyfikatam — pa praviłach, jaho vydajuć ukraincam, jakija majuć indyvidualny padatkovy numar. Ale turapieratar kaža, što siertyfikat budzie «taki, jak treba, z kodam i ŭsim inšym».
Polšča. 800 jeŭra za adzin raz
Inšy varyjant — pryščepka ŭ Varšavie. Turapieratar prapanuje avijatur sa stykoŭkaj praz Maskvu.
Ale košty dzikija: kala 450 jeŭra za avijabilety plus 350 jeŭra turfirmie za arhanizacyju pajezdki, choć pryščepka ŭ Polščy navat dla biełarusaŭ biaspłatnaja.
Kali baiciesia, što stanie kiepska, noč u Varšavie pravieści možna. Turapieratar dapamoža zabraniravać numar, ale treba budzie dapłacić: samy tanny hatel ad 35 jeŭra.
Znoŭ ža, kali chočacie Pfizer, jechać treba dvojčy, adpaviedna takaja pryščepka abydziecca až u 1600 jeŭra.
Ale jość i plusy. Turfirma dapamahaje zrabić vizu, kali ŭ vas jaje niama (treba dapłacić kala 250 rubloŭ). Taksama ŭ Varšavie vam adrazu vydaduć jeŭrapiejski siertyfikat ab vakcynacyi.
Turcyja. Vakcynacyja abydziecca ŭ 570 jeŭra
Adzin z turapierataraŭ prapanuje «vakcynny tur» až u Stambuł pa Pfizer ci Johnson & Johnson. Cana — 850 rubloŭ plus avijabilety (ad 270 jeŭra). U pasłuhu ŭvachodziać miedstrachoŭka, tranśfiery z aeraporta ŭ miedustanovu i hatel, ruskamoŭny asistent padčas vakcynacyi i adna noč u trochzorkavym hateli.
Plusy — lehalnaść. Na vyjezd zakrytyja tolki naziemnyja miežy, samalotam vylatać ź Biełarusi pakul jašče možna, choć i niašmat kudy.
Taksama biełarusam nie patrebnaja viza ŭ Turcyju.
Minusy taksama jość. Pa-pieršaje, znoŭ ža košt: pa Pfizer treba jechać dva razy, tamu pamnažajem sumu na dva. Pa-druhoje, aficyjny siertyfikat daduć, ale, jak adznačaje sam turapieratar, jon nie padychodzić dla Jeŭrapiejskaha prykładańnia GREEN PASS.
Tamu, kali vam paśla «jechać na Zachad instrukcyi atrymlivać», vakcynacyja ŭ Stambule nie vielmi padychodzić.