Krynicy: zatrymali syna kiraŭnika Viciebskaj vobłaści Šarśniova. Pa čutkach, uvahu siłavikoŭ pryciahnuŭ piaciznačny zarobak
Uładzimira Šarśniova zatrymali niekalki tydniaŭ tamu. Pra heta «Našaj Nivie» raskazali dźvie nie źviazanyja pamiž saboj krynicy. Šarśnioŭ-małodšy pracavaŭ mieniedžaram dziaržaŭnaha «Handlovaha doma «Viciebsk», jaki zajmajecca aptovym handlem praduktami charčavańnia. U čym pryčyna zatrymańnia, pakul nieviadoma. Ale chodziać čutki, što ŭvahu siłavikoŭ pryciahnuŭ zanadta vialiki zarobak syna čynoŭnika.
U sacyjalnych sietkach Uładzimir Šarśnioŭ nie źjaŭlajecca z 7 kastryčnika. Na rabocie kažuć, što jon «u adpačynku», ale datu vychadu ź jaho nazvać nie mohuć. Žonka Šarśniova-małodšaha admoviłasia havaryć z žurnalistami.
Uładzimir Šarśnioŭ. Fota z sacyjalnych sietak, 2014 hod
U čym ža pryčyna zatrymańnia Uładzimira Šarśniova? Aficyjnych zajaŭ ad siłavikoŭ nakont hetaha niama.
Ale, jak patłumačyli «Našaj Nivie» znajomyja ź situacyjaj rabotniki miasamałprama Viciebska, Šarśnioŭ-małodšy pryciahnuŭ uvahu orhanaŭ tym, što na dziaržaŭnaj rabocie ŭ «Handlovym domie «Viciebsk» atrymlivaŭ vializny zarobak, jaki vymiaraŭsia dziasiatkami tysiač rubloŭ u miesiac.
Pa čutkach, zatrymali jaho nibyta minskija, a nie viciebskija siłaviki — imavierna, KDB.
Uładzimiru Šarśniovu 35 hadoŭ, jon žanaty. Hubiernatar Viciebskaj vobłaści Mikałaj Šarśnioŭ uznačalvaje vobłaść z 2014 hoda, u 2017-m pachavaŭ žonku, Uładzimir — jaho adziny syn.
