Kitaj vyprabavaŭ dźvie hipierhukavyja arbitalnyja rakiety. Analityki kažuć: novaja zbroja abviarhaje zakony fiziki
Piekin śćviardžaje, što ŭsiaho tolki vyprabavaŭ mirny kaśmičny transpart.
Fota depositphotos.com.
Zhodna z danymi zachodniaj vyviedki, Kitaj pravioŭ sioleta dva testavyja zapuski novaj unikalnaj zbroi. Ličycca, što heta — hipierhukavaja arbitalnaja rakieta, zdolnaja nieści jadziernuju bojehałoŭku.
Raniej było viadoma tolki pra adzin zapusk — toj, što byŭ praviedzieny ŭ lipieni, ale ciapier źjaviłasia infarmacyja i pra novy test. Vyviedka śćviardžaje, što jon mieŭ miesca 13 žniŭnia. Piekin pryznaŭ fakt adnaho z zapuskaŭ, ale, zhodna z kitajskimi čynoŭnikami, tady prajšło vyprabavańnie cyvilnaj kaśmičnaj rakiety. Adnak analityki ličać, što taja rakieta mahła nieści jadziernuju bojehałoŭku, zdolnuju paźbiahać sistemy supraćrakietnaj abarony, piša Daily Mail sa spasyłkaj na Financial Times.
Pakul zachodnija navukoŭcy nie mohuć skazać dakładna, na što zdolnaja novaja rakieta. Ale brytanskija žurnalisty pišuć sa spasyłkaj na ŭłasnuju krynicu, što rakieta nibyta «abviarhaje zakony fiziki» i nie padobnaja ni na adnu technałohiju, jakuju maje ZŠA. Ministerstva abarony ZŠA pakul nie paćviardžaje i nie abviarhaje infarmacyju pra vyprabavańnie hipierhukavoj zbroi.
Kali infarmacyja pra testy ŭsio ž taki budzie paćvierdžanaja, heta budzie aznačać, što Kitaj zrabiŭ vialiki krok napierad u svajoj prahramie raspracoŭki jadziernaj zbroi.
Ale ž sama kancepcyja zvyšhukavoj jadziernaj zbroi nie źjaŭlajecca novaj i pachodzić ad SSSR, jaki vynajšaŭ jaje padčas chałodnaj vajny.
U savieckim varyjancie prahramu nazyvali sistemaj častkova-arbitalnaha bombakidańnia (SČAB). Stvoranaja ŭ ramkach hetaj sistemy zbroja mahła paźbiahać mocnych radyjołakacyjnych pryboraŭ i sistemy supraćrakietnaj abarony ZŠA.
Saviecki Sajuz źviarnuŭ prahramu SČAB u 1983 hodzie ŭ adkaz na źmieny ŭ amierykanskaj supraćrakietnaj abaronie. Zaraz ža Piekin, chutčej za ŭsio, sprabuje adnavić technałohiju, pryčym viadoma, što ZŠA i Rasija taksama raspracoŭvajuć ułasnuju hipierhukavuju zbroju.
Narkotyki i teror. Pierabiežčyk raskryŭ sakrety paŭnočnakarejskaj palityki
