U Minsku ad karanavirusa pryščapili pieršuju ciažarnuju
Pieršaja ciažarnaja žančyna była pryščeplenaja 20 kastryčnika ad kavidu u 21-j rajonnaj paliklinicy, što ŭ Zavodskim rajonie.
Pra heta «Minsk-Navinam» paviedamiła hałoŭny doktar hetaj ustanovy Natalla Myśliŭčyk.
«Budučaja mama atrymała pieršuju pryščepku kitajskaj vakcynaj VeroCell karparacyi Sinopharm — adznačyła Myśliŭčyk. — Prapanujem hetuju vakcynu i inšym našym ciažarnym pacyjentkam».
Pa słovach doktara, inaktyvavanaja vakcyna Vero Cell rekamiendavana śpiecyjalistami dla imunizacyi budučych maci. U stalicy hety preparat pastupić va ŭstanovy achovy zdaroŭja vyklučna dla vakcynacyi ciažarnych, bo inšyja antykavidnyja vakcyny, dazvolenyja da ŭžyvańnia ŭ Biełarusi, im nie padychodziać. Nakiroŭvać na pryščepki takich pacyjentak buduć akušery-hiniekołahi. Pry hetym hałoŭny doktar zaŭvažyła, što kali niepryščeplenaja ciažarnaja žančyna zachvareje na karanavirus, to vialikaja vierahodnaść ciažkich uskładnieńniaŭ jak u jaje, tak i ŭ dziciaci.
Taksama Myśliŭčyk dadała, što rasijskim «Sputnikam» pryščaplajuć adnačasova piać čałaviek. Takaja ŭ hetaha preparata «fasoŭka». A sumiesny (u Biełarusi ažyćciaŭlajuć raźliŭ hetaj vakcyny) «Sputnik» pryznačany dla vakcynacyi adnaho čałavieka. Darečy, adna ampuła «Sputnika Łajt» taksama raźličana na piać čałaviek. Hetuju vakcynu prapanujuć moładzi, a taksama tym, chto pierachvareŭ na karanavirus, i dla revakcynacyi.
