U 2000-ja hety pradmiet adzieńnia nasili ŭsie. Ciapier jon viartajecca
Džynsy z zanižanaj talijaj — adzin z samych supiarečlivych elemientaŭ mody pačatku 2000-ch. Upieršyniu jany źjavilisia ŭ 1993 hodzie, kali dyzajnier Alaksandr Makuin vypuściŭ na podyum madel u takich štanach — tady ich nazvali bamstary.
Fota pxfuel.com.
U bijahrafii Makuina «Kroŭ pad skuraj» historyk mody Džudyt Uot napisała: stvareńnie bamstaraŭ pryviało da taho, što cełaje pakaleńnie pačało nasić štany z zanižanaj talijaj. Ciapier hety pradmiet adzieńnia viartajecca na podyumy i ŭ kramy. Razam z bamstarami modnicam treba źviarnuć uvahu i na inšyja trendy z 90-ch, naprykład na majki na šlejkach i avalnyja soniečnyja akulary, tłumačyć Guardian.
Za čas z krasavika 2020 pa krasavik 2021 hoda kolkaść pošukavych zapytaŭ u Brytanii, źviazanych z džynsami z zanižanaj talijaj, vyrasła na 73%. U hetym hodzie takija štany źjavilisia ŭ kalekcyjach vialikich brendaŭ — Miu Miu i Rokh, ich nosiać zorki nakštałt Beły Chadzid i Kryściny Ahilery.
Adnak nie ŭsie žančyny rady viartańniu bamstaraŭ. Šmat chto z modnic hladzić na trend z žacham, bo takija štany pasujuć zusim nie kožnaj. Karystalniki sacyjalnych sietak pišuć, što ŭ 1990-ja i 2000-ja, kali bamstary byli papularnyja, staŭleńnie da žanočaj fihury było inšym. Tady nie isnavała mody dla ludziej, što nosiać pamier bolšy za 46-48, i bamstary taksama nie spryjajuć pryniaćciu cieła takim, jakoje jano jość. Heta pradmiet adzieńnia, jaki demanstruje žyvot i tamu padkreślivaje lubyja niedachopy fihury.
Ale ž jość zorki, jakija nikoli nie admaŭlalisia ad bamstaraŭ, i adna ź ich — Brytni Śpirs. U kancy 90-ch klip na jaje pieśniu Baby One More Time dapamoh zrabić bamstary papularnymi, i ŭ instahramie śpiavački dahetul chapaje fota ŭ takich štanach. U apošni hod Brytni i historyja ź jaje baćkam, što byŭ pazbaŭleny prava kantrolu nad śpiavačkaj, byli ŭ centry ŭvahi ŚMI. Mahčyma, heta vyklikała rost cikaŭnaści i da stylu adzieńnia zorki.
Pamiatajecie dziŭny čajny hryb z 90-ch? Ciapier jon u trendzie va ŭsim śviecie
