Maryja Kaleśnikava pieradała vinšavańni «Novaj haziecie»
14 kastryčnika Alaksandr Kaleśnikaŭ u SIZA sustreŭsia sa svajoj dačkoj. Pahavaryli praz škło pa telefonie hadzinu. Maša vyhladaje badzioraj, šmat čytaje i sočyć za navinami, paviedamlaje štab Viktara Babaryki.
— Maša chacieła b padpisacca na «Novuju hazietu». Jana ŭ kursie, što hałoŭnamu redaktaru ŭručana Nobieleŭskaja premija. Mašu heta zachapiła, i jana prasiła pieradać svaje vielizarnyja vinšavańni Dźmitryju Muratavu, — raspavioŭ Alaksandr Paŭłavič.
Maryja taksama ŭspomniła pra premiju ŭ halinie pravoŭ čałavieka imia Vacłava Haŭła, jakuju joj prysudzili. Jana vielmi hanarycca hetaj uznaharodaj i ličyć, što hetaja premija — dla ŭsich palitviaźniaŭ.
Paplečnica spačatku Viktara Babaryki, a zatym Śviatłany Cichanoŭskaj Maryja Kaleśnikava była zatrymanaja 7 vieraśnia 2020 hoda. Amal roŭna praz hod, 6 vieraśnia 2021 hoda, jana była asudžana da 11 hadoŭ kałonii za «zakliki paškodzić biaśpiecy Respubliki Biełaruś», «zmovu z metaj zachopu ŭłady» i «stvareńnie ekstremisckaha farmavańnia». Razam ź joj da 10 hadoŭ kałonii byŭ asudžany juryst Maksim Znak.