«Seksualnaja aryjentacyja časta biez adchileńniaŭ». U Biełarusi skłali partret typovaha piedafiła
Apošnija hady ŭ Biełarusi raście kolkaść seksualnych złačynstvaŭ. Siłaviki tłumačać heta bolš paśpiachovaj raskryvalnaściu, choć takija złačynstvy ŭsio jašče zastajucca schavanymi — časta achviara i jaje rodnyja nie zaŭjalajuć u milicyju, niaredka pra hvałt stanovicca viadoma praz šmat hod, kali złačynca traplajecca na inšym epizodzie. Vykładčyk Akademii milicyi pravioŭ daśledavańnie: apytaŭ kala 500 asudžanych za piedafiliju, kab vyznačyć partret typovaha złačyncy. Nastupierak stereatypam, bolšaść złačyncaŭ — hieteraseksuały, vychoŭvalisia ŭ poŭnaj siamji i nivodny nie skazaŭ, što sam byŭ achviaraj zhvałtavańnia. Jość piedafiły i siarod žančyn.
Vykładčyk Akademii milicyi Vadzim Stalboŭski pravioŭ apytańnie asudžanych u dziesiaci kałonijach. Vyniki pakazvajuć, što nie ŭsie asudžanyja achvotna zapaŭniali ankietu, niekatoryja staralisia abyjści niazručnyja pytańni, nastojvali, što niespraviadliva asudžanyja. Adnak ankietavańnie amal 500 złačyncaŭ dazvoliła skłaści partret typovaha złačyncy.
Heta mužčyna va ŭzroście 25-35 hod, jaki maje bazavuju ci siarednie-śpiecyjalnuju adukacyju. Mnohija vychoŭvalisia ŭ poŭnych siemjach, dastatkova šmat — u šmatdzietnych.
Bolšaść apytanych pryhadali, što ź ich ździekavalisia ŭ dziacinstvie, heta i vyklikała psichałahičnaje adchileńnie.
Asudžanyja ŭ dziacinstvie padviarhalisia fizičnamu i psichałahičnamu hvałtu — ich bili, prynižali, abražali niecenzurnymi słovami. Mnohija, uzhadvajučy heta, nie zmahli strymać śloz. Nivodny čałaviek nie skazaŭ, što sam byŭ achviaraj seksualnaha hvałtu.
Bolšaść złačyncaŭ pachodziać z horada, choć daśledčyk adznačaje, što kala 30% — viaskovyja žychary, «što śviedčyć ab surjoznych niedachopach u prafiłaktycy złačynstvaŭ u sielskaj miascovaści i adlustroŭvajecca na nizkim ŭzroŭni pravavoj kultury i adukacyi».
Čaściej za ŭsio asudžany nidzie nie pracuje, maje prablemy z ałkaholem. Kala 30% nikoli nie byli ŭ šlubie, kala 20% majuć žonku, astatnija ci raźviedzienyja zaraz, ci byli nie ŭ aficyjnych adnosinach, adnak pa sumie vychodzić, što bolšaść mieła svaju siamju. Što datyčycca svaich dziaciej, to siaredniuju ličbu daśledčyk nie pryvodzić, adnak
u niekatorych kałonijach bolšaść asudžanych zajaŭlali, što majuć dziaciej, a niekatoryja — i pryjomnych.
U miescach pazbaŭleńnia svabody takija asudžanyja majuć nizki sacyjalny status. Pry hetym «seksualnaja aryjentacyja ŭ ich časta biez adchileńniaŭ», ale z vysokaj vierahodnaściu vyčvarenstva. Bolšaść asudžany nie byli znajomyja z achviaraj. Pa charaktary typovy złačynca adroźnivajecca ŭtojlivaściu, saramlivaściu. Fizična nie raźvity, uzrovień intelekta — siaredni, dazvalaje vybudavać davierlivyja adnosiny ź dziećmi.
Mnohija doma zachoŭvajuć pornamateryjały z vyjavaj dziaciej, abmieńvajucca imi ŭ siecivie. Apieratyŭniki manitorać admysłovyja sajty, niekatorych złačyncaŭ atrymałasia znajści praz hetu začepku.
Siarod žančyn piedafiły taksama jość. Vykładčyk Akademii MUS vyłučaje nastupnyja asablivaści dla žančyn-piedafiłak. Uzrostavy dyjapazon — ad 21 da 67 hod, adnak čaściej za ŭsio seksualnyja złačynstvy ździajśniajuć va ŭzroście ad 25 da 35 hod.
Značnaja dola złačyncaŭ pachodzić ź vioski (kala 30%), bolšaść na momant adbyćcia pakarańnia byli nie ŭ šlubie (80%). 65% asudžanych majuć svaich dziaciej, psichijatryčnaje lačeńnie prachodziła kala 15%. 34% padviarhalisia fizičnamu hvałtu, jašče 44% — maralna-psichałahičnamu, kala 40% byli śviedkami hvałtu ŭ siamji.
Kali vy stali achviaraj seksualnaha hvałtu abo vam viadoma, što vaš blizki čałaviek staŭ achviaraj, źviarniciesia na haračuju liniju dapamohi achviaram (8-017218-72-22, 8-017-246-03-03, 8-017-283-13-26). Dapamoha ananimnaja i biaspłatnaja. Taksama vy možacie źviarnucca ŭ milicyju pa numary 102 i zajavić pra złačynstva.
