«Znak padbadziorvańnia ŭsim supracoŭnikam ŚMI». Źniavolenym žurnalistkam zavočna ŭručyli Lajpcyhskuju premiju za svabodu ŚMI
U Lajpcyhu zavočna ŭručyli premiju za svabodu ŚMI biełaruskim žurnalistkam Kaciarynie Andrejevaj i Darji Čulcovoj, jakija adbyvajuć dvuchhadovy termin źniavoleńnia ŭ kałonii. Premija była prysudžanaja sioleta ŭ lipieni.
U Hiermanii adbyłasia cyrymonija ŭručeńnia Lajpcyhskaj premii za svabodu ŚMI.
Adnu z prestyžnych niamieckich uznaharod u halinie srodkaŭ masavaj infarmacyi zavočna atrymali ŭ piatnicu, 8 kastryčnika, biełaruskija žurnalistki Kaciaryna Bachvałava, jakaja pracavała pad psieŭdanimam Kaciaryna Andrejeva, i Darja Čulcova, jaki ciapier adbyvajuć źniavoleńnie ŭ kałonii.
Žurnalistki svajoj pracaj «dali mahčymaść pačuć hołas svabodnaj žurnalistyki ŭ aŭtakratyčnym režymie», havorycca ŭ zajavie Fondu ŭ spravach ŚMI aščadnaj kasy Lajpcyhu.
Za svaju pracu 27-hadovaja Bachvałava i 24-hadovaja Čulcova «vymušanyja pakutavać ad represij režymu, jak i mnohija inšyja» biełarusy, skazana dalej u zajavie.
Fond nastojliva zaklikaŭ ułady Biełarusi vyzvalić žurnalistak.
Jak adznačajecca ŭ zajavie, uznaharoda — heta «znak padbadziorvańnia ŭsim supracoŭnikam ŚMI, a taksama dziejačam hramadzianskaj supolnaści — nia tolki ŭ Biełarusi». Hrašovaja častka premii składaje 10 tysiač jeŭra kožnamu łaŭreatu.
Kaciaryna Andrejeva i Darja Čulcova byli zatrymanyja 15 listapada 2020 hodu padčas žyvoj tranślacyi dla polskaha telekanała, jaki pryznany biełaruskimi ŭładami ekstremisckim, z akcyi pamiaci zahinułaha biełaruskaha aktyvista Ramana Bandarenki.
Žurnalistkam prysudzili dva hady pazbaŭleńnia voli pavodle abvinavačańnia ŭ «arhanizacyi i padrychtoŭcy dziejańniaŭ, jakija hruba parušajuć hramadski paradak, albo aktyŭnym udziele ŭ ich».