Mietał na biržy patańnieŭ amal na čverć
Košt čornaha mietałaprakatu na ŭnutranym rynku za lipień — vierasień istotna źniziŭsia. Usiamu vinoj nievysoki popyt ŭ budaŭničaj haliny, a taksama azijacki łakdaŭn, jaki zaciahnuŭsia, piša Onliner.by.
Za žnivień stalovy prakat patańnieŭ na 3-11%, a ŭ vieraśni — jašče na 8%. Pa vynikach apošnich troch miesiacaŭ bolš za ŭsio patańnieła listavaja stal i truby — u siarednim na 20-25%. Ceny na armaturu źnizilisia na 15%, a na vuhałok i švieler — na 10%.
«Takaja dynamika całkam adpaviadaje tendencyjam suśvietnaha rynku, dzie paśla praciahłaha rostu ceny na mietał płaŭna pajšli ŭniz. Pierš za ŭsio heta źviazana ź nievysokim popytam z boku pramysłovych i budaŭničych pradpryjemstvaŭ, pakolki mnohija ź ich u kancy leta zakupili bujnyja partyi mietału i pakul nie majuć patreby ŭ novych pastaŭkach. Da taho ž azijackija krainy nie śpiašajucca admianiać łakdaŭny, uviedzienyja jašče ŭ samym pačatku pandemii karanavirusa, što taksama spryjaje źnižeńniu suśvietnych kacirovak», — prakamientavali ŭ pres-słužbie BUTB.
Na źnižeńnie koštaŭ u Biełarusi akazała ŭpłyŭ i situacyja ŭ Rasii — asnoŭnym pastaŭščyku mietału ŭ našu krainu.
«Dla zabieśpiačeńnia narmalnaj zahruzki vytvorčych mahutnaściaŭ bujnyja rasijskija mietałurhičnyja kampanii i mietałatrejdary ŭžo niekatory čas realizujuć stalovy prakat pa źnižanych cenach, tym samym zmušajučy bolš drobnych hulcoŭ užyvać anałahičnuju cenavuju palityku», — paviedamili śpiecyjalisty BUTB.
Što budzie z cenami dalej, zaležyć ad dynamiki popytu na mietałapradukcyju (a jon ciapier nizki) i abjomu prapanovy (jana pakul abmiežavanaja). Da prykładu, taryfy ŭ śfiery kantejniernych pieravozak u ciapierašni čas u niekalki razoŭ pieravyšajuć siaredni ŭzrovień za apošnija 5 hadoŭ, a z-za prablem z enierhazabieśpiačeńniem spyniajuć pracu fieraspłaŭnyja zavody i skaračajecca vytvorčaść aluminiju i kremniju.
Usio heta budzie pieraškadžać rezkamu padzieńniu koštu mietałaprakatu, pa mienšaj miery na praciahu bližejšych niekalkich miesiacaŭ. Dla biełaruskich spažyŭcoŭ heta aznačaje, što navat kali košty praciahnuć padać, to temp ich źnižeńnia, chutčej za ŭsio, zamarudzicca.
