Jak partyja Mierkiel paciarpieła najmacniejšaje fijaska ŭ svajoj historyi
Historyja pamyłak chryścijanskich demakrataŭ.
Rejchstah. Fota depositphotos.com.
U niadzielu ŭ Hiermanii prajšli fiederalnyja vybary — badaj, samyja niepradkazalnyja za apošni čas. Ranicaj 27 vieraśnia CVK krainy apublikavała danyja, zhodna ź jakimi pieršaje miesca ŭ vybarščykaŭ atrymała Sacyjał-demakratyčnaja partyja Hiermanii (25,7% hałasoŭ). A voś kansiervatyŭny błok CHDS/CHSS — rodnaja dla Mierkiel partyja — nabraŭ usiaho 24,1%, što składaje samy nizki vynik dla partyi za ŭsiu jaje historyju.
Jość źviestki, što CHDS/CHSS nie źbirajecca tak prosta zdavacca i płanuje sfarmiravać svaju kaalicyju. Adpaviednyja pieramovy pačnucca ź libierałami i niamieckimi «zialonymi», a pa vynikach stvareńnia kaalicyi partyja moža syści ŭ apazicyju. Sumnyja vyniki dla partyi, pradstaŭnica jakoj 16 hadoŭ kiravała krainaj i šmat u čym zasłužyła padziaku niemcaŭ.
Armin Łašet: pierajemnik ci kandydat pieramien?
Armin Łašet, kandydat u kanclery ad CHDS/CHSS, znachodziŭsia ŭ ciažkim stanoviščy z taho momantu, kali jaho abviaścili pierajemnikam Mierkiel. Pierad Łašetam, 60-hadovym premjeram niamieckaj ziamli Paŭnočny Rejn-Viestfalija, paŭstaŭ vybar.
Ci pavinien jon prezientavać siabie jak novuju asobu i admovicca ad spadčyny Mierkiel, pry hetym ryzykujučy stracić tradycyjnych prychilnikaŭ partyi va ŭzroście ad 65 hadoŭ? A moža, bolš pravilnym dla Łašeta było b pakazać siabie prychilnikam palityki Mierkiel i nie zhubić kaštoŭnyja hałasy vybarščykaŭ?
Kancler zrabiła hety vybar za Łašeta. Na praciahu doŭhaha času z pačatka vybarčaj kampanii jana nijak nie ŭdzielničała ŭ honcy, nibyta zabyła, što źjaŭlajecca členam CHDS/CHSS. Ale paźniej jana pačała aficyjna padtrymlivać Łašeta, što pastaviła kryž na jaho šansach stać kandydatam za pieramieny.
Armin Łašet. Fota flickr.com.
Spačatku Łašeta ličyli favarytam pieradvybarčaj honki, ale ŭ siaredzinie lipienia stanovišča pačało imkliva paharšacca. Kandydat ad chryścijanskich demakrataŭ, jak nazyvajuć partyju Mierkiel, narabiŭ šerah pamyłak u publičnaj prastory, jakija pryviali da padzieńnia jaho rejtynhu i navat da skandałaŭ.
Pieršaja ź vialikich pamyłak prateže Mierkiel źviazanaja z mocnymi zalevami, što nakryli ŭ siaredzinie leta paŭnočnuju Hiermaniju i ŭ tym liku ziamlu Paŭnočny Rejn —Viestfalija, dzie Łašet źjaŭlajecca premjeram.
U toj čas kamiery zaśniali śmiech Łašeta na mierapryjemstvie, dzie niamiecki prezident Frank-Valter Štajnmajer addavaŭ daninu pamiaci achviaram zalevy. Šmat ŚMI adznačyli, što Łašet naviedvaŭ zonu katastrofy ŭ niedarečnych strohich tuflach.
Toj samy śmiech Łašeta na mierapryjemstvie ŭ pamiać achviar zalevaŭ.
Paźniej u teleintervju Łašeta spytali, ci zrabiŭ urad, na jaho pohlad, pamyłki ŭ baraćbie sa źmienaj klimatu. Toj adkazaŭ, što nie varta źmianiać palityku prosta praz padziei adnaho dnia — i šmat chto zrazumieŭ słovy Łašeta jak sprobu prymienšyć nastupstvy zalevaŭ.
Praź niekalki tydniaŭ paśla toj historyi pra Łašeta znoŭ zahavaryli ŭ niehatyŭnym kantekście. Pryčynaj stali słovy palityka pra toje, što «2015 hod nie pavinien paŭtarycca», skazanyja ŭ dačynieńni da kryzisu ŭ Afhanistanie. Łašet spasyłaŭsia na napłyŭ biežancaŭ u Hiermaniju ŭ 2015 hodzie. Süddeutsche Zeitung, najvialikšaje štodzionnaje vydańnie Hiermanii, paśla taho vykazvańnia abvinavaciła palityka ŭ padtrymcy krajnie pravych siłaŭ.
Pa mierkavańniu žurnalistaŭ, «kožny, chto ličyć, što 2015 hod nie pavinien paŭtarycca, kaža — my možam dazvolić sabie taki humanizm tolki adzin raz».
Narešcie, u kancy lipienia Łašet staŭ fihurantam skandału praz abvinavačvańni ŭ płahijacie. Sprava datyčyłasia jaho knihi 2009 hoda vypusku, pryśviečanaj pytańniam imihracyi. Palityk prynios prabačeńni i paabiacaŭ źviarnucca da ekśpiertaŭ, kab pravieryć svaju pracu na najaŭnaść «inšych chibaŭ». Miž inšym, anałahičnyja abvinavačvańni ŭ płahijacie ŭžo vyklikali skandały ŭ suviazi ź inšymi niamieckimi palitykami. U mai taki skandał navat kaštavaŭ ministerskaj pasady Francyscy Hifaj, eks-kiraŭnicy viedamstva pa spravach siamji.
Anhieła Mierkiel. Fota depositphotos.com.
Łašet - nie Mierkiel
Ale ž nie tolki pamyłki Łašeta pryviali jaho partyju da takich vynikaŭ na vybarach. Sprava ŭ tym, što chryścijanskija demakraty, jak nazyvajuć partyju Mierkiel, šmat u čym zaležali ad asoby svajho kanclera.
Prahmatyčna-centrysckija pohlady Mierkiel i jaje spakoj u lubych situacyjach dapamahli CHDS/CHSS pryciahnuć hałasy nie tolki tradycyjnych prychilnikaŭ partyi, ale i tych, kamu prosta padabajecca kancler. Šmat chto z takich vybarščykaŭ — žančyny, pažyłyja niemcy i prychilniki centrysckich pohladaŭ, dla jakich nieprymalny radykalizm.
Zhodna z danymi apytanak, mahčyma, što kožny treci z vybarščykaŭ, chto padtrymaŭ chryścijanskich demakrataŭ na minułych vybaraŭ, zrabiŭ heta praz asobu Mierkiel. Zaraz Mierkiel sychodzić. Zamiest jaje partyja prapanavała asobu Armina Łašeta - palityka, što pakazaŭ siabie zusim nie takim biezdakornym u publičnaj prastory. U takich umovach šmat vybarščykaŭ schilajucca da inšych partyj, naprykład, da SDPH, jakaja i ŭziała pieršaje miesca na vybarach.
Čytajcie taksama:
Lidar na vybarach u Niamieččynie admoviŭsia pazvać partyju Mierkiel u kaalicyju
Hiermanija zastałasia bieź Mierkiel: što ad hetaha biełarusam? Raźbirajemsia
