U Polščy zatrymali biełarusa Dźmitryja Vasiljeva — eks-kiraŭnika najbujniejšaj rasijskaj kryptabiržy. Jaho mohuć ekstradziravać u Kazachstan
U Varšavie zatrymany eks-kiraŭnik najbujniejšaj rasijskaj kryptabiržy Wex Dźmitryj Vasiljeŭ. Dva hady tamu jaho ŭžo aryštoŭvali ŭ Italii, ale tady jamu ŭdałosia viarnucca ŭ Rasiju. Z druhoj sproby jaho ŭsio ž taki mohuć ekstradziravać u Kazachstan, dzie suprać jaho ŭzbudžanaja kryminalnaja sprava ab machlarstvie, piša Bi-bi-si.
Dźmitryj Vasiljeŭ.
34-hadovaha Dźmitryja Vasiljeva zatrymali ŭ Varšavie jašče ŭ žniŭni, ale polskaja hazieta Wyborcza daviedałasia pra heta tolki ciapier.
Čutki pra zatrymańnie Vasiljeva chadzili siarod byłych klijentaŭ biržy Wex z kanca žniŭnia. Blizki znajomy Vasiljeva paćvierdziŭ Bi-bi-si, što jon sapraŭdy pad aryštam u Varšavie.
Zatrymańnie adbyłosia ŭ aeraporcie Varšavy 11 žniŭnia, paśla čaho jon byŭ aryštavany sudom na 40 sutak. U Polščy da jaho pretenzij niama: pa linii Interpoła jaho ŭžo niekalki hadoŭ šukaje Kazachstan.
Ciapier polskaja prakuratura razhladaje pytańnie ab ekstradycyi Vasiljeva ŭ Kazachstan, paviedamlaje Wyborcza sa spasyłkaj na svaje krynicy.
Chto taki Dźmitryj Vasiljeŭ
Vasiljeŭ — uradženiec Biełarusi. Paśla pratestaŭ 2020-ha pieraklučyŭsia na situacyju ŭ rodnaj krainie i navat zavioŭ svoj jutub-kanał «Kryptapalityka», dzie aśviatlaŭ padziei ŭ Biełarusi. Praŭda, kanał nie vyjšaŭ u top: 360 padpisčykaŭ i piać videa, samaje papularnaje ź jakich sabrała 4300 prahladaŭ.
U 2010-ja Vasiljeŭ zachapiŭsia kryptavalutami, absłuhoŭvaŭ bujnych klijentaŭ z Kitaja, jakija handlavali na najbujniejšaj ruskamoŭnaj kryptabiržy BTC-e.
Uletku 2017 hoda BTC-e začyniłasia — paśla aryštu ŭ Hrecyi adnaho ź mierkavanych administrataraŭ biržy Alaksandra Vińnika. Uvosień taho ž hoda jana pierazapuściłasia pad novaj nazvaj Wex, a Vasiljeŭ staŭ jaje dyrektaram. Jon ža byŭ adzinym ułaśnikam aficyjnaj jurydyčnaj asoby biržy — kampanii ź Sinhapura.
Pa stanie na kaniec 2017 hoda Wex zamykała druhi dziasiatak najbujniejšych kryptabiržaŭ śvietu, sutačny abarot tarhoŭ składaŭ 80 młn dalaraŭ, pisaŭ RBK.
U kancy 2018 hoda Vasiljeŭ pradaŭ sinhapurskuju jurydyčnuju asobu siamji byłoha kijeŭskaha pradprymalnika Dźmitryja Chaŭčanki, jaki vajavaŭ na ŭschodzie Ukrainy na baku prarasijskich sieparatystaŭ pad pazyŭnym «Maračok».
Bi-bi-si pisała, što realnym ułaśnikam Wex pry Vasiljevie moh być žychar Novasibirska Alaksiej Bilučenka — partnior aryštavanaha ŭ Hrecyi Vińnika pa BTC-e. A za «Maračkom» moh stajać rasijski pradprymalnik Kanstancin Małafiejeŭ.
Sam Małafiejeŭ zaŭsiody admaŭlaŭ, što mieŭ dačynieńnie da Wex.
Paśla Wex Vasiljeŭ sprabavaŭ raźvivać ułasnyja kryptaprajekty, apošnim časam žyŭ u Pieciarburhu.
U čym abvinavačvajuć Vasiljeva
Birža Wex pierastała pracavać letam 2017 hoda — jašče da kupli «Maračkom». Na momant krachu na joj zachoŭvałasia kryptavalut na niekalki sotniaŭ miljonaŭ dalaraŭ.
Siarod klijentaŭ biržy niama adnaznačnaj pazicyi, chto moža być vinavaty ŭ razvale biržy. Adzin z byłych układčykaŭ Wex z kanca 2019 hoda, na praciahu niekalkich miesiacaŭ, paśladoŭna paviedamlaŭ pra miniravańnie sudoŭ, škoł i dziciačych sadkoŭ u Rasii, patrabujučy, kab Kanstancin Małafiejeŭ viarnuŭ jamu 120 bitkojnaŭ, jakija ŭ jaho zachraśli na Wex.
Va ŭsich vypadkach infarmacyja ab minavańni nie paćvierdziłasia. Na kaniec studzienia 2020 hoda ahulnaja kolkaść evakujavanych na čas pravierak hramadzian skłała 1,6 młn čałaviek, pisaŭ Interfaks. I heta tolki ŭ Maskvie.
Jašče adzin klijent biržy z Ałmaty napisaŭ zajavu ŭ pravaachoŭnyja orhany Kazachstana, abvinavaciŭšy ŭžo Vasiljeva ŭ tym, što jon z dapamohaj biržy Wex vykraŭ u jaho 20 tysiač dalaraŭ. Była ŭzbudžana kryminalnaja sprava, Vasiljeva abviaścili ŭ mižnarodny vyšuk.
Pieršy raz pa zapycie Kazachstana jon byŭ aryštavany ŭ Italii letam 2019 hoda, ale praź niekalki tydniaŭ jaho adpuścili: sam Vasiljeŭ kazaŭ Bi-bi-si, što ŭ jaho spravie italjancy znajšli niejkija pamyłki. Rasijski advakat, znajomy z hetaj spravaj, kazaŭ, što pamyłki byli ŭ zapycie na ekstradycyju.
Ciapier kazachskija ŭłady pasprabujuć ekstradziravać Vasiljeva z druhoj sproby. U MUS Kazachstana nie adkazali na zapyt Bi-bi-si na momant publikacyi.