U Rasii aktrysu, jakaja źniałasia ŭ paradyjnym roliku ŭ palicejskaj formie, aryštavali na 10 sutak
Va Usuryjsku aryštavanaja aktrysa z papularnaha internet-sieryjała pra vydumanaha čynoŭnika Vitala Naliŭkina. Miravy sud pryznačyŭ 43-hadovaj Łarysie Kryvanosavaj 10 sutak aryštu i 1000 rubloŭ štrafu za našeńnie formy supracoŭnika palicyi, u jakoj taja hrała «aficyjnaha pradstaŭnika MUS Usuryjskaha rajona Marynu Vulf», pieradaje partał VL.ru. Pa źviestkach krynic ŚMI, 43-hadovaja Łarysa Kryvanosava była zatrymanaja z-za zdymak u roliku dla Prymorskaha YouTube-kanała BARAKuda.
Sud pastanaviŭ, što žančyna zdymałasia ŭ videaroliku ŭ formie supracoŭnika pravaachoŭnych orhanaŭ. Na formie byli znaki adroźnieńnia i simvolika dziaržstruktury.
U pastanovie suda skazana, što ŭ dziejańniach hramadzianki jość skład administracyjnaha pravaparušeńnia pa č. 1 art 17.12 (niezakonnaje našeńnie formiennaha adzieńnia sa znakami adroźnieńnia, ź simvolikaj dziaržaŭnych vajenizavanych arhanizacyj, pravaachoŭnych abo kantralujučych orhanaŭ).
Łarysa Kryvanosava vinu pryznała i raskajałasia. Joj pryznačana 10 sutak administracyjnaha aryštu i štraf 1000 rubloŭ.
Maryna Vulf, jakuju hrała Łarysa Kryvanosava, źjaŭlałasia ŭ niekalkich epizodach sieryjała. Jaje piersanaž — humarystyčny vobraz pradstaŭnikoŭ pravaachoŭnych orhanaŭ, svajho rodu parodyja na hałoŭnaha aficyjnaha pradstaŭnika MUS Rasii Irynu Vołk. Pieryjadyčna ŭ Maryny Vulf mianiajucca pahony: to jana padpałkoŭnik palicyi, to pałkoŭnik, to hienierał-major. U apošnich sieryjach jana była «pavyšana» da hienierał-lejtenanta.
Pavodle źviestak krynic, 21 vieraśnia na dva dni zatrymali vykanaŭcu hałoŭnaj roli Andreja Niarecina i pavieźli z Usuryjska ŭ Lipaŭcy. Akciora abvinavacili ŭ niepavazie da hramadstva, bo jon nibyta ŭ toj dzień maciukaŭsia ŭ hramadskim miescy. U sudovaj pastanovie havorycca, što jaho aštrafavali na 500 rubloŭ. Mužčynu ŭžo adpuścili. Pryčym heta nie pieršaje jaho zatrymańnie za ŭdzieł u zdymkach sieryjała. U červieni 2020 hoda jaho aryštavali na 5 sutak.
