Niamiecki bard addaść prysudžanuju jamu premiju Maryi Kaleśnikavaj
Maryja Kaleśnikava stała ikonaj mirnaha hramadzianskaha supracivu biełarusaŭ, jakija pratestavali suprać režymu Łukašenki, zajaviŭ były dysident HDR Volf Birman.
Viadomy niamiecki bard i były ŭschodniehiermanski dysident Volf Birman maje namier pieradać biełaruskaj apazicyjaniercy Maryi Kaleśnikavaj prysudžanuju jamu premiju imia Avidzija.
«Z taho času, jak narod Biełarusi narešcie vyjšaŭ na vulicy suprać Łukašenki (…) Maryja Kaleśnikava stała simvałam hramadzianskaha i mirnaha supracivu», — napisaŭ 84-hadovy Birman, paviedamlajeDW.
Pavodle jaho słoŭ, 5 kastryčnika ŭ Frankfurcie-na-Majnie jon prymie ŭznaharodu, kab u «samyja ścisłyja terminy» pieradać jaje Kaleśnikavaj. «Jak by vysoka my ni šanavali muzyku i zmahara za svabodu, heta naŭrad ci zmoža vyzvalić Maryju. Kali ja pryśviaču joj maju pieśniu «Ermutigung» («Padbadziorvańnie») i śpiaju jaje, to heta budzie ježaj dla dušy joj i jaje adnadumcam za kratami», — napisaŭ jon.
Volf Birman byŭ pravaabaroncam i krytykam režymu ŭ HDR. U listapadzie 1976 hoda ŭłady va Uschodnim Bierlinie pazbavili jaho hramadzianstva.
Premija imia Avidzija prysudžajecca PEN-centram niamieckamoŭnych aŭtaraŭ za miažoj raz na dva hady. Rašeńnie ab uznaharodžańni Birmana było pryniata jašče ŭ 2020 hodzie, ale z-za pandemii ŭručeńnie premii było adkładziena.
