Premjer Maraviecki pra pamierłych na miažy: My nie viedajem, chto heta, ale zrobim usio mahčymaje, kab nie pakinuć ich ananimnymi
U paniadziełak premjer-ministr Polščy Matevuš Maraviecki i ministr unutranych spraŭ Maryjuš Kamiński praviali bryfinh z Pamiežnym kamandavańniem nakont apošnich padziej na polska-biełaruskaj miažy.
wiadomosci.gazeta.pl
Nahadajem, što ŭčora polskija ŭłady zajavili, što na miažy byli znojdzienyja try cieły.
Premjer siońnia na bryfinhu raspavioŭ, što ŭčorašniaja situacyja była vielmi pilna vyvučanaja. Mihranty, jakija pierasiekli miažu z Polščaj, pieranieśli pieraachaładžeńnie, troje ź ich pamierli.
«My starajemsia dapamahać im usim i ratavać žyćci tam, dzie heta mahčyma. Možna skazać, što my vyratavali žyćci vaśmi čałaviek, jakija trapili ŭ raku kala Supraśla», — raspavioŭ Maraviecki.
«My nie viedajem, chto byli hetyja ludzi, jakija pamierli na polskaj terytoryi, ale my zrobim usio, kab heta nie byli ananimnyja ludzi. My chočam, kab da kožnaha stavilisia hodna. Ludzi, jakich udałosia vyratavać, znachodziacca ŭ balnicach u Aŭhustovie, Suvałkach i inšych miescach. U nas jość zapisy z kamier, bieśpiłotnikaŭ, u vyniku jakich my absalutna ŭpeŭnienyja, što ludzi z terytoryi Biełarusi pieravoziacca ŭ prymiežnyja miescy, a zatym pieravoziacca i instruktujucca na miažu z Polščaj», — dadaŭ Maraviecki.
Pa jaho słovach ź biełaruskaha boku idzie płanavanaja akcyja, jakaja pavinna masava pryvieści da destabilizacyi abstanoŭki na polska-biełaruskaj miažy.
Tolki ŭ vieraśni polskija ŭłady zafiksavali bolš za čatyry tysiačy sprobaŭ pierasiekčy miažu, ale miesiac jašče nie skončyŭsia. «Tamu my majem spravu z akcyjaj, dobra nakiravanaj u Minsku i Maskvie», — dadaŭ premjer.
Maraviecki śćviardžaje, što heta akcyja kirujecca z Maskvy.
«Dziasiatki tysiač čałaviek ściahnutyja ŭ Biełaruś», — miarkuje palityk i kaža, što moža heta kvalifikavać, jak «šturm polskaj miažy».
«U nas jość dokazy taho, što heta arhanizavanaja i sistematyčnaja akcyja biełaruskich funkcyjanieraŭ, i my nie možam być abjektam takoha šantažu», — skazaŭ na zakančeńnie jon.
