Alaksandr Knyrovič uznačalić raźvićcio mižnarodnaha biznesu Imaguru
Biznesoviec Alaksandr Knyrovič u jakaści dyrektara pa mižnarodnym raźvićci dałučajecca da prajekta Imaguru.
«Ja ŭdziačny kamandzie Imaguru za mahčymaść viarnucca da paŭnavartasnaj pracy paśla 4,5 hoda praviedzienych u vymušanym prafiesijnym prastoi, — skazaŭ jon. — Spadziajusia, što razam u siońniašnich niaprostych umovach my zmožam pabudavać šyrokuju infrastrukturu padtrymki jak technałahičnych startapaŭ, tak i vielmi nieabchodnych ciapier hramadzianskich inicyjatyŭ, zdolnych abjadnać biełarusaŭ, jakija vymušana i časova pakinuli Radzimu».
Alaksandr Knyrovič — pradprymalnik, mientar i inviestar. Bolš za 20 hadoŭ Alaksandr kiravaŭ hrupaj budaŭničych kampanij «Sarmat». Alaksandr — adzin z zasnavalnikaŭ supolnaści «biznes-aniołaŭ» i vienčurnych inviestaraŭ «Bavin».
Byŭ miedyjapiersonaj, kałumnistam. Vostra vykazvaŭsia nakont stanovišča ŭ krainie. Ministerstva infarmacyi ŭ 2015 hodzie navat zabłakavała sajt kyky.org praź niekalki materyjałaŭ Knyroviča.
U 2018-m jaho prysudzili da 6 hadoŭ kałonii ŭzmocnienaha režymu. Knyroviča abvinavacili va ŭchileńni ad spłaty padatkaŭ u asabliva bujnym pamiery i chabary. Praź jahonuju niezakonnuju dziejnaść, pavodle śledstva, zavyšalisia košty na abstalavańnie, što nibyta navat adbiłasia na koštach ŽKH. Škodu acanili ŭ 3,4 miljona rubloŭ.
***
Imaguru pačaŭ pracu ŭ 2013 hodzie. Heta byŭ pieršy ŭ Biełarusi kłub dla maładych inavacyjnych kampanij. Za vosiem hadoŭ dziakujučy Imaguru źjaviłasia bolš za 300 startapaŭ, jakija stvaryli bolš za 3,5 tysiačy pracoŭnych miescaŭ.
U krasaviku 2021 hoda ŭ Minsku zakryŭsia startap-chab Imaguru. «Haryzont» skasavaŭ ź im damovu arendy.
U červieni stała viadoma, što Imaguru Startup HUB staŭ partnioram Google for Startups. «Imaguru z hałoŭnym ofisam u Jeŭropie ŭ partniorstvie z Google for startups adkryvaje novuju staronku svajoj historyi, jakaja dapamoža raskryć vielizarny patencyjał jeŭrapiejskich startapaŭ i techničnaj supolnaści», — było skazana ŭ pres-relizie.
