Dačka «terarystaŭ» Vajciachovičaŭ: «Mianie ŭsiu kałocić, ja nie dumała, što maje rodnyja na takoje zdolnyja»
15 vieraśnia na ŭsich dziaržaŭnych telekanałach vyjšli siužety, pryśviečanyja barysaŭskaj siamji Vajciachovičaŭ. Volhu i Vitala Vajciachovičaŭ, ich syna Ułada z žonkaj Naściaj zatrymali 13 žniŭnia. Ich vinavaciać u kidańni kaktejla Mołatava ŭ dom Aleha Hajdukieviča i padrychtoŭcy šerahu inšych złačynstvaŭ. Paviedamlajecca, što Uład z baćkam rychtavali niekalki terarystyčnych atak: na siłavikoŭ, sudździaŭ, televiadučych i Hajdukieviča. Płanavali vykradać, katavać i zapisvać pakajalnyja videa. Žonka Ułada ŭdzielničała va ŭsim jak apieratar. Ahułam pa spravie zatrymali bolš za 20 čałaviek. Kryścina, dačka Volhi i Vitala Vajciachovičaŭ prakamientavała siužety dla «Našaj Nivy».
«Mianie ŭsiu kałocić, ja nie dumała, što maje rodnyja na takoje zdolnyja. Pakazali na videa, što jany asabista kidali toje… Ja sama ŭbačyła, što jany rabili, što jany padpalvali aŭto…
Pakazali ich tvary, što heta byli jany…
Ale pryčym tam maja mama, ja nie razumieju.
U toj dzień, kali jany nibyta pajechali na rybałku, moj muž chacieŭ jechać ź imi. Ale baćka skazaŭ, što nie varta, heta daloka i ŭvohule «leta nie skončyłasia jašče, źjeździm paśla». Muž vielmi prasiŭsia, ale baćka admoviŭsia brać jaho. Ja tady nie nadała ŭvahi hetamu. A atrymlivajecca, heta byŭ toj raz.
Kab ja była čužym čałaviekam, to ŭražańnie pra hetych ludziej u mianie b skłałasia nie samaje lepšaje. Ale ž heta maje rodnyja. Ja nie liču ich złačyncami ci terarystami.
Ale ja ŭ šoku, što jany heta ŭsio rabili. U ich mały syn, u ich niadaŭna naradziŭsia ŭnuk — i čym jany dumali, kali toje rabili? Ja nie razumieju», — kaža Kryścina.
Čytajcie taksama:
