«Vykarystaje vizit, kab pierarvać svaju źniešniepalityčnuju izalacyju». Čaho čakać ad udziełu Łukašenki na samicie ŭ Tadžykistanie
Z 15 da 17 vieraśnia Alaksandr Łukašenka budzie z pracoŭnym vizitam u Tadžykistanie, dzie voźmie ŭdzieł u samicie ADKB i ŠAS. Hałoŭnaj temaj stanie situacyja ŭ Afhanistanie. Što płanujuć abmiarkoŭvać na sustrečach i jaki sens maje heta pajezdka? Ekśpierty kamientujuć dla «Našaj Nivy».
«Biełaruskaje kiraŭnictva budzie sprabavać pakazać svaju značnaść»
Asablivaść hetaha samitu — vostraja paviestka pa situacyi ŭ Afhanistanie. Pa joj musić być pryniata supolnaja zajava ad imia lidaraŭ dziaržaŭ, kaža dyrektar instytuta «Palityčnaja śfiera» Andrej Kazakievič.
Fota z asabistaha archivu
«Asnoŭnaja prablema z Afhanistanam, pa-pieršaje, biežancy. Pytańnie aktualna dla Tadžykistana, inšych krain Siaredniaj Azii. Heta zaraz vostraja prablema rehijanalnaj biaśpieki.
Druhi momant — mižnarodny teraryzm, ci buduć terarysty mieć mahčymaść vykarystoŭvać Afhanistan u jakaści svajoj bazy. Heta znoŭ ža najbolšaja prablema dla Tadžykistana i asabliva Uźbiekistana, dzie isłamiscki ruch maje šyrokuju sacyjalnuju asnovu. Uźbiekistan spyniŭ členstva ŭ ADKB u 2012 hodzie, ale z pačatkam kryzisu ŭ Afhanistanie prajaŭlaje vysokuju zacikaŭlenaść u supracoŭnictvie.
Jość pytańnie, jak stavicca da novaha ŭrada: ci pryznavać talibaŭ całkam, ci nastojvać na tym, što jany musiać zrabić inkluziŭny ŭrad. Kali my pahladzim na zajavy, jakija rabilisia na samicie ADKB u žniŭni, to tam hučali zakliki ŭ bok Afhanistana raspačać inkluziŭny palityčny dyjałoh. Vidavočna, heta zaraz małarealistyčna, ale prablema zastajecca.
Što jašče budzie abmiarkoŭvacca? Roznyja prablemy arhanizacyi i zabieśpiačeńnia kalektyŭnych sił ADKB, pierš za ŭsio pytańni apieratyŭnaha reahavanńnia i ŭzbrajeńnia. Heta stanovicca ŭsio bolš aktualna, kryzis u Afhanistanie zakranaje mnohija krainy Siaredniaj Azii. Tamu łahična stavić pytańnie pra supolnyja dziejańni, u tym liku hrupy pad supolnym kamandavańniem», — tłumačyć palitołah.
Pakolki Biełaruś i Afhanistan — dalokija krainy, mahčymaść Biełarusi ŭpłyvać na pracesy tam minimalnaja, asabliva zaraz, kali jość vialikaja kolkaść unutranych prablem.
«Ale, kaniečnie, biełaruskaje kiraŭnictva budzie sprabavać pakazać svaju značnaść, davať parady i prapanoŭvać rašeńni. Takaja aktyŭnaść, praŭda biez asablivaha vyniku, užo była bačna ŭ žniŭni na sustrečy ADKB, dzie Łukašenka doŭha pramaŭlaŭ, a pa vynikach sustrečy biełaruskaja pazicyja amal nie zhadvałasia, — zaŭvažaje Andrej Kazakievič. —
Hety samit Łukašenka budzie vykarystoŭvać dla taho, kab pierarvać źniešniepalityčnuju izalacyju i pakazać značnaść, pasprabavać uklučycca ŭ vyrašeńnie kanfliktu, i stać zaŭvažnym na mižnarodnaj scenie.
Źniešniepalityčnaja izalacyja mocna ciśnie na ŭłady. I afhanski kryzis buduć sprabavać vykarystać dla taho, kab pasprabavać vyjści ź jaje, prynamsi na postsavieckaj prastory.
A pry dobrym składzie abstavin — i vyvieści na novy ŭzrovień dyjałoh i ź inšymi krainami. U pryvatnaści płanujecca ŭdzieł Biełarusi ŭ jakaści nahladalnika Šanchajskaj arhanizacyi supracoŭnictva, pasiedžańnie jakoj taksama projdzie ŭ hetyja dni».
«Fakt vizitu vykarystajuć dla demanstracyi mižnarodnaj lehitymnaści Łukašenki»
Były dypłamat, a ciapier palityčny analityk Jeŭrapiejskaha savieta pa mižnarodnych adnosinach Pavieł Śluńkin kaža, što nie staŭ by šukać dadatkovych sensaŭ u hetym vizicie. Łukašenka tudy jedzie nie pa asabistym zaprašeńni, a dla ŭdziełu ŭ samicie ADKB.
Fota z asabistaha archivu
«Fakt vizitu, kaniečnie, budzie vykarystany biełaruskimi ŭładami dla demanstracyi mižnarodnaj subjektnaści Łukašenki, jaho lehitymnaści.
Zvyčajna padčas takich vizitaŭ akramia sustreč u šmatbakovym farmacie prachodziać taksama pratakolnyja sustrečy vysokich haściej z haspadarom, jaki prymaje ich u svajoj krainie. Takim čynam, Alaksandr Łukašenka budzie pryniaty Rachmonam i ŭ asabistym statusie, u dvuchbakovym farmacie. Ale heta nie buduć paŭnavartasnyja pieramovy, a chutčej sustreča vietlivaści, padčas jakoj jany zmohuć abmierkavać u tym liku i pytańni dvuchbakovaj paviestki», — kamientuje analityk.
Asnoŭnaj temaj na samicie ADKB zajaŭlena situacyja ŭ Afhanistanie. Z ulikam jaje nastupstvaŭ i patencyjnych pahroz dla krain — siabraŭ ADKB absalutna łahična, što heta pytańnie budzie abmiarkoŭvacca najpierš.
«Cikava budzie panazirać za sprobaj abmierkavać situacyju pamiž dźviuma arhanizacyjami — ADKB i ŠAS, asabliva ŭličvajučy, što ŠAS — heta ŭsio ž taki nie vyklučna abarončaja ci vajennaja arhanizacyja».
Pavieł Śluńkin miarkuje, što dla šmat jakich lidaraŭ krain ADKB sens udziełu ŭ hetym samicie staŭ našmat mienšym paśla źjaŭleńnia naviny, što Pucin budzie ŭdzielničać tolki ŭ anłajn farmacie.
«Bo tradycyjna padčas takich samitaŭ jość kankurencyja za asabistyja sustrečy ź im dziela abmierkavańnia dvuchbakovych aktualnych pytańniaŭ. Nu i, viadoma, što rola Rasii ŭ ADKB daminujučaja, tam surjoznyja rašeńni prymajucca ź inicyjatyvy ci sa zhody Maskvy. Dumaju, asabistaja adsutnaść Pucina budzie ŭpłyvać i na efiektyŭnaść sustreč u Dušanbe», — padsumoŭvaje były dypłamat.
