Mierkiel zaklikała biełaruski bok «apamiatacca»
Na sustrečy ŭ Varšavie kiraŭniki Polščy i Hiermanii acharaktaryzavali situacyju na miažy Biełarusi z krainami Jeŭrasajuza jak «hibrydnuju ataku».
Fota Rafała Huza, PAP
«Na ŭschodniaj miažy ES ułasna pieražyvajem hibrydnuju ataku ŭ formie ŭciekačoŭ na biełaruskaj miažy. Heta datyčyć Polščy, Litvy i Łatvii», — zajaviła kanclerka Hiermanii Anhieła Mierkiel na pres-kanfierencyi pa vynikach svajho vizitu ŭ Varšavu ŭ subotu 11 vieraśnia.
Na jaje dumku, heta aznačaje nieabchodnaść takich formaŭ achovy hetaj častki vonkavaj miažy ES, jakija raniej vykarystoŭvalisia ŭ Hrecyi, z dapamohaj ahulnajeŭrapiejskaha ahienctva Frontex.
«Heta supolnaja meta ŭsich krain ES», — padkreśliła jana.
«Adsiul zaklik da biełaruskaha boku, kab jon apamiataŭsia; kab biezabaronnych ludziej ź inšych rehijonaŭ [płaniety] nie vykarystoŭvali ŭ jakaści instrumientaŭ hibrydnych atak», — cytujuć kanclerku Mierkiel mižnarodnyja infarmacyjnyja ahienctvy.
Krainy ES, što miažujuć ź Biełaruśsiu, pačali fiksavać rezkaje pavieličeńnie kolkaści vypadkaŭ niezakonnych pierasiačeńniaŭ miažy pačynajučy z červienia hetaha hoda, paśla taho jak krainy Jeŭrasajuza ŭviali sankcyi suprać Biełarusi paśla ŭzmacnieńnia represij u krainie i prymusovaj pasadki samalota «Rajanejra». Spačatku mihranty paśpiachova pratočvalisia ŭ ES, ale pačynajučy sa žniŭnia Litva, Łatvija i Polšča z dapamohaj «Fronteksa» naładzili efiektyŭnaje adsočvańnie hrup mihrantaŭ i błakujuć ich dostup na svaje terytoryi. Kali raniej u Jeŭrasajuz štodzień tut pranikała niekalki socień čałaviek, ciapier hetaja ličba źniziłasia da adzinak. Astatnim nie ŭdajecca pakinuć terytoryju Biełarusi.
Krainy ES taksama dabilisia ad Iraka spynieńnia avijarejsaŭ u Biełaruś, jakimi prybyvali nielehalnyja mihranty.
U toj ža čas jeŭrapiejcy sabrali dokazy, jak jany śćviardžajuć, spryjańnia biełaruskich struktur dastaŭcy ludziej bieź jeŭrapiejskich viz na miežy krain ES.
Jak paviedamlali dypłamatyčnyja krynicy, Jeŭrasajuz maje namier adkazać na heta novym pakietam sankcyj suprać aficyjnaha Minska.
Biełaruś — adna z redkich krain śvietu, jakaja maje vyklučna napružanyja adnosiny adrazu z čatyrma ź piaćciu svaich susiedziaŭ.
Tema adnosin ź Biełaruśsiu była centralnaj na pieramovach u Varšavie. Akramia taho, kiraŭniki Polščy i Niamieččyny havaryli na temu hazapravoda «Paŭnočny patok — 2», stvareńnia jeŭrapiejskich abaronnych struktur, pra ekanamičnyja pytańni i dyskusijnyja temy ŭ adnosinach unutry ES.
Za 16 hadoŭ svajho kanclerstva Mierkiel była ŭ Polščy 20 razoŭ. Hety vizit napeŭna byŭ raźvitalnym. Mierkiel sychodzić z pasady, jaje moža źmianić ciapierašni ministr finansaŭ Hiermanii sacyjał-demakrat Ołaf Šolc.
«Našy adnosiny vyłučaje toj fakt, što navat kali my abmiarkoŭvajem składanyja temy, my adkrytyja, my słuchajem druhi bok, znachodzim kampramisy», — padkreśliła jana padčas pres-kanfierencyi.
