«Nijakaj jasnaści». Jak rasijskaja presa adreahavała na sustreču Pucina i Łukašenki
Sustreča Łukašenki i Pucina, paśla jakoj było zajaŭlena ab uzhadnieńni ŭsich 28 sajuznych prahram intehracyi (raniej havaryłasia pra bolš čym 30 darožnych kart) pakinuła bolš pytańniaŭ, čym adkazaŭ jak u biełarusaŭ, tak i ŭ rasijan. Pahladzieli, jak na jaje adreahavali rasijskija ŚMI.
«Kommiersant»: Intehracyju možna i tarmazić
Uzhadnieńnie 28 sajuznych intehracyjnych prahram i ŭ Maskvie, i ŭ Minsku nazvali važnym krokam da stvareńnia dźviuma krainami adzinaj ekanamičnaj prastory. Heta sapraŭdy vyhladaje tak, adnak dakumient aformleny takim čynam, što intehracyju ŭ Sajuznaj dziaržavie možna farsiravać, ale možna i tarmazić, adznačaje vydańnie.
«Nieviadoma, kali prahramy buduć realizavanyja, — zhodna blizkaja da pieramovaŭ krynica «Kommiersanta», jakaja prasiła nie nazyvać jaje krainavuju prynaležnaść. — Pakul heta pratakoł ab namierach. Usio treba prapuskać praz urad i parłamienty. I jość mahčymaść usio prytarmazić — nie budu kazać kim».
Namiok vidavočna byŭ na Łukašenku.
Hazieta ličyć, što kropku abo kryž na adnosinach Minska z Zachadam stavić usio ž rana. Łukašenka prosta z Kramla źvierniecca da zachodnich krain, što adviarnulisia ad jaho: «Bačycie, jany z nami razmaŭlać nie mohuć, tamu što tam byccam by ci to prezident nielehitymny, to ŭłada nie takaja. A voś z talibami — heta inšaje, jak u nas kažuć, heta inšaje, tam jany mohuć razmaŭlać i vieści dyjałoh».
Rasijskaje vydańnie ličyć, što heta zaprašeńnie pahavaryć ab tym, kudy Łukašenka zaviadzie Biełaruś, kali Zachad praciahnie jaho ihnaravać.
Lenta.ru: Ambicyi Sajuznaj dziaržavy mocna źnizilisia
Vyniki pieramovaŭ u intervju vydańniu acaniŭ palityčny analityk Mižnarodnaj manitorynhavaj arhanizacyi CIS-EMO Stanisłaŭ Byšok.
Pavodle jaho słoŭ, ab źnižeńni ambicyj śviedčyć toj fakt, što pytańni palityčnaj intehracyi i adzinaj valuty pastaŭlenyja bakami na paŭzu.
Jon dadaŭ, što jość strymany aptymizm adnosna krokaŭ na šlachu da stvareńnia ekanamičnaj bazy pad intehracyju.
«Ale, ź inšaha boku, heta ž adžyły marksizm. Možna ŭspomnić rasijska-ŭkrainskija adnosiny da 2014 hoda, dzie ekanamičnaja baza dachodziła da ŭzroŭniu ekanamičnaha simbijozu. Tym nie mienš palityčnaja nadbudova apynułasia macniejšaj, a žadańnie ŭkrainskich uładaŭ iści ŭ Jeŭrapiejski Sajuz — bolš važkim, čym ekanamičnaja baza, zaviazanaja na Rasiju», — reziumavaŭ palitołah.
Pravda.ru: Pucin sastupiŭ Łukašenku, ale vyjhraŭ
Sajuz Rasii i Biełarusi vynyrnuŭ ź niabytu, i ŭ jaho jość pierśpiektyvy. Heta, mahčyma, pačatak šlachu pa źbirańni krain postsavieckaj prastory i sihnał Zachadu, piša vydańnie.
Pucin sastupiŭ Łukašenku ŭ ekanamičnych pytańniach, ale za apošnim «daŭžok» — palityčnaja intehracyja, ličyć žurnalist.
«Stvareńnie orhana, jaki budzie kantralavać «harmanizacyju» padatkovych sistem, — heta tyja samyja nadnacyjanalnyja orhany, jakija nibyta pakul vyrašyli nie stvarać. Adzinaja abaronnaja prastora taksama praduhledžvaje nadnacyjanalny ŭzrovień.
Na samicie byŭ zrobleny realny krok pa šlachu intehracyi, bo ŭsiaho tolki paŭtara hoda tamu Biełaruś imkliva sychodziła ad Rasii na Zachad. Sajuz vynyrnuŭ ź niabytu, i ŭ jaho jość pierśpiektyvy. Heta archivažna dla Rasii, heta, mahčyma, pačatak šlachu pa źbirańni krain postsavieckaj prastory i navat dalej — Uschodniaj Jeŭropy», — pišuć žurnalisty.
Regnum: Łukašenka bačyć u adnosinach z Rasijaj tolki faktar zachavańnia svajoj ułady
Uzhadnieńnie 28 sajuznych prahram Rasii i Biełarusi — padzieja važnaja, ale ahladalnik Regnum Michaił Dziamuryn pieraścierahaje ad taho, kab ličyć, što ź ich uzhadnieńniem budučynia rasijska-biełaruskich adnosin stanie całkam jasnaj.
Zastajecca zusim nie zrazumiełym palityčny bok rasijska-biełaruskaha abjadnańnia.
Što budzie ŭ vyniku: adzinaja dziaržava, kanfiederacyja, sajuz dźviuch niezaležnych dziaržaŭ?
Na dumku ekśpierta, Alaksandr Łukašenka nie źjaŭlajecca ščyrym prychilnikam rasijska-biełaruskaha sajuza. Jon razhladaje sajuznyja adnosiny tolki jak faktar zachavańnia i ŭmacavańnia ŭłasnaj ułady.
Ciapier kamientatar nie bačyć u Biełarusi ni mocnych prarasijskich palitykaŭ, ni hramadska-palityčnaj siły, jakaja vystupaje za ŭmacavańnie Sajuznaj dziaržavy, ni rostu padtrymki idei rasijska-biełaruskaha abjadnańnia — chutčej, naadvarot.
TASS: Ab pahłynańni havorki nie idzie
Praces pahłybleńnia intehracyi pamiž Maskvoj i Minskam budzie iści bolš aktyŭna paśla padpisańnia Uładzimiram Pucinym i Alaksandram Łukašenkam 28 sajuznych prahram, ale ab pahłynańni Biełarusi Rasijaj havorka nie idzie. Takoje mierkavańnie ŭ piatnicu ŭ razmovie z karespandentam TASS vykazaŭ hienieralny dyrektar Rasijskaha savieta pa mižnarodnych spravach Andrej Kartunoŭ.
Padpisańnie pahadnieńniaŭ značna palehčyć dvuchbakovaje supracoŭnictva ŭ halinie ekanomiki.
«Pucin i Łukašenka buduć paźbiahać lubych rašeńniaŭ i farmulovak, jakija možna budzie traktavać jak pahłynańnie Biełarusi Rasijaj. Usie razumiejuć, što heta stvoryć šmat prablem. Moža być, biełaruski nacyjanalizm nie vielmi mocny, ale jon isnuje, i takoje rašeńnie jaho moža padahreć.
Akramia taho, całkam jasna, što na Zachadzie heta budzie ŭspryniata jak «čarhovaja prajava rasijskaha ekspansijanizmu» i moža navat spravakavać niejkija dadatkovyja antyrasijskija akcyi», — skazaŭ Kartunoŭ.
«Novyje Iźviestija»: Łukašenka dyktuje Maskvie svaju volu, vykarystoŭvajučy blef i šantaž
Miarkujučy pa tym, jakija ŭmovy vystaŭlaje Łukašenka Kramlu, ni ab jakoj intehracyi dźviuch dziaržaŭ u najbližejšyja hady havorki być nie moža, piša vydańnie.
«I heta ž pry tym, što doŭh Biełarusi pierad Rasijaj składaje 18,1 młrd dalaraŭ, a ŭsie reziervy biełaruskaha Nacbanka — tolki 7,8 młrd dalaraŭ. To-bok Minsk nie vyžyvie biez padtrymki Kramla!
I tym nie mienš, Łukašenka krucić kredytoram jak choča, vykarystoŭvajučy blef i šantaž. Unikalny stan rečaŭ… Hienijalnyja (u dvukośsiach) hieapalityki siadziać u Maskvie, kali chutka jany za 20 hadoŭ daviali prostuju i zrazumiełuju situacyju ŭ Sajuznaj dziaržavie da takoha dzikaha stanu…» — piša ŚMI.
«Novaja hazieta»: Adzinaja kankretyka — admiena abmiežavańniaŭ na avijarejsy
Adzinaja kankretnaja zajava na sumiesnaj pres-kanfierencyi Łukašenki i Pucina — ab admienie «kavidnych» abmiežavańniaŭ na rasijska-biełaruskija avijarejsy, piša hazieta.
«A dla taho kab na pres-kanfierencyi prahučała choć by niešta nie zanadta abstraktnaje i možna było nazvać papiaredniuju joj sustreču histaryčnaj, było ŭračysta abvieščana, što ŭsie «kavidnyja» abmiežavańni z avijapieravozak pamiž Rasijaj i Biełaruśsiu zdymajucca, i chutka rejsaŭ budzie stolki ž, kolki da pandemii — 200 na tydzień.
Praŭda, takoha rodu pytańni vyrašajucca zvyčajna ŭ pracoŭnym paradku, na ŭzroŭni ŭradaŭ i biez pryciahnieńnia viasielnych hienierałaŭ, ale kali havorka idzie ab vybarčych technałohijach, to dla pryhožaha zaviaršeńnia kampanii prosta nieabchodna zrabić padarunak ludziam. Dyk voś vam avijarejsy ŭ vialikaj kolkaści. Lacicie, hałuby! I pamiatajcie, chto daŭ vam kryły», — piša žurnalistka.
«Moskovskij komsomolec»: Niezrazumieła, što staić za «harmanizacyjaj»
Mišuścin i Hałoŭčanka padpisali 28 sajuznych prahram, napiaredadni ŭchvalenych Pucinym i Łukašenkam. Ale heta ŭsio jašče pramiežkavy etap. Pakul što vidavočna, što baki damovilisia ab «harmanizacyi» praktyčna va ŭsich śfierach, ale što staić za hetymi słovami, pa-raniejšamu nie zrazumieła, piša hazieta.
Pa słovach Ramana Hałoŭčanki, realizacyja sajuznych prahram pavinna pryvieści da «vyraŭnoŭvańnia sacyjalna-ekanamičnych umoŭ» dla hramadzian Rasii i Biełarusi i «roŭnych mahčymaściaŭ na terytoryjach abiedźviuch dziaržaŭ».
Što heta aznačaje na praktycy — u pryvatnaści, jaki ŭzrovień piensij i inšych sacyjalnych vypłat praduhledžvaje heta «vyraŭnoŭvańnie», — daviedacca nie ŭdałosia. Nijakaj kankretyki pa źmieście prahram na pasiadžeńni Saŭmina pradstaŭlena nie było.
Jasnaści nie dadałasia navat pa takim źbitym pytańni, jak admiena roŭminhu. U dakumiencie, apublikavanym pa vynikach pasiadžeńnia, adznačajecca, što funkcyjanavańnie adzinaha rynku suviazi i infarmacyi praduhledžvaje «admienu roŭminhu na terytoryi Sajuznaj dziaržavy», ale ŭ jakija terminy heta adbudziecca, pa-raniejšamu nie viadoma.
Ahulny rynak hazu nie pačnie dziejničać z 1 śniežnia 2023 hoda, jak padumali niekatoryja. I Biełaruś nie budzie kuplać rasijski haz pa canie, ustalavanaj dla Smalenskaj vobłaści, jak maryć Łukašenka. Da hetaha jašče pavinna adbycca «zbližeńnie ŭmoŭ haspadarańnia», a kali heta zdarycca i ci zdarycca ŭvohule — adnamu Bohu viadoma.
