60-hadovym piensijanierkam dali pa 15 i 30 sutak za akcyju ŭ padtrymku palitviaźniaŭ
9 vieraśnia adbyŭsia pieratrus u niekalkich piensijanierak. Paśla zatrymali 60-hadovuju Irynu Novik, 61-hadovuju Natallu Ahiejčyk i Ału Bujankovu. Siońnia nad piensijanierkami adbyŭsia sud. Spravy ŭsich žančyn razhledzieŭ sudździa Dźmitryj Karsiuk, paviedamlajuć pravaabaroncy.
Žančyn abvinavačvali va ŭdziele ŭ niesankcyjanavanym masavym mierapryjemstvie 6 vieraśnia na vulicy Staražoŭskaj u Minsku. Milicyjant «Aleksandrovič» na sudzie śćviardžaŭ, što bačyŭ dziesiać čałaviek u biełych cišotkach z nadpisam «23.34», ale zapomniŭ tolki Irynu, Natallu i Ału.
Natalla Ahiejčyk svaju vinu nie pryznała. Viadoma, što pieratrus u jaje kvatery pravodzili supracoŭniki KDB. Žančyna źviarnuła ŭvahu sudździ, što jany tak i nie znajšli cišotku, u jakoj jana nibyta była na akcyi. Sudździa adchiliŭ jaje chadajnictva ab prahladzie videa z kamier nazirańnia, na jakich bačna, što ŭ čas «pravaparušeńnia» jana razmaŭlała z susiedkaj. Vynik — 30 sutak aryštu.
Iryna Novik raspaviała, što 6 vieraśnia była ŭ parku z dačkoj. Sudździa taksama adchiliŭ jaje chadajnictva ab prahladzie videa z kamier nazirańnia banka, u jaki Iryna zachodziła. Karsiuk pryznaŭ vinavataj Novik i aryštavaŭ jaje na 15 sutak.
Ała Bujankova admoviłasia davać pakazańni, bo nie bačyć u hetym sensu. Sudździa pakaraŭ jaje 15-sutačnym aryštam.
